ភ្នំពេញៈ ជនប្រុស-ស្រី ១០ នាក់ ត្រូវបានសមត្ថកិច្ចការិយាល័យប្រឆាំងគ្រឿងញៀនរាជធានីភ្នំពេញបញ្ជូនទៅសាលាដំបូងរាជធានីភ្នំពេញពីម្សិលមិញពាក់ព័ន្ធគ្រឿងញៀន ១៧១,៨៦ ក្រាម ប្រព្រឹត្តនៅភូមិផ្សារតូច សង្កាត់ទួលសង្កែ ១ ខណ្ឌប្ញស្សីកែវ រាជធានីភ្នំពេញ។
លោក អ៊ីវ ភារិទ្ធ នាយការិយាល័យប្រឆាំងបទល្មើសគ្រឿងញៀនប្រាប់ពីម្សិលមិញថា សមត្ថកិច្ចរបស់លោកបានកសាងសំណុំរឿងបញ្ជូនជនសង្ស័យប្រុស-ស្រីចំនួន ១០ នាក់ ទៅសាលាដំបូងរាជធានីភ្នំពេញនៅថ្ងៃទី ១ មីនា ក្នុងនោះមានជនឈ្មោះ ឡេង សុភួង ភេទប្រុស អាយុ ៣១ ឆ្នាំ និងស្ត្រីឈ្មោះ ឃុន សូរីហ្សា អាយុ ២៣ ឆ្នាំ។ អ្នកទាំង ២ មានគ្រឿងញៀនប្រភេទមេតំហ្វេតាមីន (ICE) សរុប ១៧១,៨៦ ក្រាម។ ពួកគេត្រូវបានសមត្ថកិច្ចចាប់បានគ្រឿងញៀនជាក់ស្តែង។ រីឯមនុស្សប្រុស ៨ នាក់ទៀត ជាអ្នកពាក់ព័ន្ធនឹងគ្រឿងញៀន។
លោកបញ្ជាក់ថា៖ «ជន ២ នាក់នេះជាអ្នកជួញដូរគ្រឿងញៀន ប៉ុន្តែឈ្មោះ ឡេង សុភួង មានថ្នាំញៀនច្រើនជាងគេ»។
លោកបន្ថែមថា ចំណែកមនុស្សដែលនៅសល់ចំនួន ២២ នាក់ គឺសមត្ថកិច្ចមិនបញ្ជូនទៅសាលាដំបូងរាជធានីភ្នំពេញទេព្រោះដោយពិនិត្យឃើញថាពួកគេមិនជាប់ពាក់ព័ន្ធគ្រឿងញៀន។ ម្យ៉ាងទៀតមានសំណូមពររបស់អាណាព្យាបាលសុំធានាយកពួកគេទៅដាក់មណ្ឌលបន្សាបគ្រឿងញៀន។ ឯអ្នកខ្លះត្រូវយកទៅអប់រំតាមសហគមន៍វិញនោះ សមត្ថកិច្ចក៏អនុញ្ញាតឲ្យអាណាព្យាបាលយកពួកគេទៅព្យាបាល។
លោកប្រាប់ថា មុនមានការឃាត់ខ្លួននៅទីតាំងខាងលើកាលពីវេលាម៉ោង ៧ យប់ ថ្ងៃទី ២៧ ខែកុម្ភ: នៅចំណុចសំណង់មិនរៀបរយ ក្រោយប៉ុស្តិ៍ទួលសង្កែ ១ ផ្លូវលំ ភូមិផ្សារតូច ខណ្ឌប្ញស្សីកែវ រាជធានីភ្នំពេញ សមត្ថកិច្ចរបស់លោកជាមួយសមត្ថកិច្ចមូលដ្ឋានបានពិនិត្យឃើញថាតំបន់នោះជាតំបន់មិនរៀបរយ។ កម្លាំងសមត្ថកិច្ចរបស់លោកជាមួយសមត្ថកិច្ចមូលដ្ឋានបានឃ្លាំមើលទីតាំងកើតហេតុខាងលើ និងបានឃើញមនុស្សចេញចូលទីនោះមិនដាច់។
ដោយមានការសង្ស័យថា មនុស្សមួយចំនួនមិនមែនរស់នៅក្នុងមូលដ្ឋាននោះផង ពេលនោះសមត្ថកិច្ចចម្រុះបានស្នើសុំអ្នកដែលទៅកន្លែងនោះដើម្បីត្រួតពិនិត្យទឹកនោមក៏ឃើញមានផ្ទុកសារធាតុញៀនក្នុងទឹកនោម។ សមត្ថកិច្ចបានសុំការសម្របសម្រួលពីលោក សឿន មុន្នីរ័ត្ន ព្រះរាជអាជ្ញារងអមអយ្យការសាលាដំបូងរាជធានីភ្នំពេញ និងឃាត់ខ្លួនមនុស្សបានចំនួន ៣២ នាក់។
លោកប្រាប់ថា៖ «កន្លែងដែលយើងបង្ក្រាបជាតំបន់មិនរៀបរយ។ អ៊ីចឹងហើយយើងព្យាយាមបង្ក្រាបដើម្បីកាត់បន្ថយឲ្យទៅជាតំបន់មួយល្អប្រសើរ។ ព្រោះវាពាក់ព័ន្ធនឹងការរស់នៅរបស់ប្រជាពលរដ្ឋនៅតំបន់នោះ»។
លោកបញ្ជាក់ថា មុនដំបូងសមត្ថកិច្ចឃាត់ខ្លួនជនសង្ស័យ ឈ្មោះ ឡេង សុភួង ភេទប្រុស អាយុ ៣១ ឆ្នាំ មុខរបរមិនពិតប្រាកដជនជាតិខ្មែរមានថ្នាំញៀនចំនួន ១៦៩ ក្រាមគិតទាំងថង់ និងឈ្មោះ ឃុន សូវីហ្សា ភេទស្រី អាយុ ២៣ ឆ្នាំ មុខរបរ អ៊ុតសក់ជនជាតិខ្មែរមានថ្នាំចំនួន ០,៤៥ ក្រាម។ សមត្ថកិច្ចបានបន្តធ្វើរដ្ឋបាលនៅចំណុចខាងលើ និងឃាត់ខ្លួនជនសង្ស័យដែលចូលមកទិញថ្នាំញៀនបានចំនួន ៣០ នាក់ទៀត ដែលជាអ្នកប្រើប្រាស់គ្រឿងញៀន។
អ្នកនាំពាក្យសាលាដំបូងរាជធានីភ្នំពេញលោក គុជ គឹមឡុង មិនអាចទាក់ទងសុំអត្ថាធិប្បាយបានទេពីម្សិលមិញ៕