The Phnom Penh Post Search

Search form




Logo of Phnom Penh Post newspaper Phnom Penh Post - ជនពិការ​ភាគច្រើន​មិន​បាន​បោះឆ្នោត

ជនពិការ​ភាគច្រើន​មិន​បាន​បោះឆ្នោត

ជនពិការ​ម្នាក់​ទៅ​បោះឆ្នោត​កាលពី​ខែ​កក្កដា​ ២០១៣ ​​។
ជនពិការ​ម្នាក់​ទៅ​បោះឆ្នោត​កាលពី​ខែ​កក្កដា​ ២០១៣ ​​។ ស្រេង ម៉េងស៊្រុន

ជនពិការ​ភាគច្រើន​មិន​បាន​បោះឆ្នោត

ភ្នំពេញៈ អង្គការ​សង្គម​ស៊ីវិល​ដែល​ធ្វើការ​លើក​ស្ទួយ​ក្នុង​វិស័យ​សិទ្ធិ​ជនពិការ​បាន​បង្ហាញ​ការ​សិក្សា​របស់​ខ្លួន​ដែល​រកឃើញ​ថា​ជនពិការ​កម្រិត​ធ្ងន់ធ្ងរ​ភាគច្រើន​នៅ​កម្ពុជា​មិន​អាច​ចូលរួម​បោះឆ្នោត​បាន​ដោយសារ​តែ​ពួកគេ​ទទួល​រង​ការ​រើសអើង​ពី​សំណាក់​អាជ្ញាធរ​មូលដ្ឋាន​ក្នុង​ការ​ធ្វើ​អត្តសញ្ញាណ​ប័ណ្ណ​។

ថ្លែង​ក្នុង​សន្និសីទ​សារព័ត៌មាន​ក្នុង​សិក្ខា​សាលា​ថ្នាក់​ជាតិ​ស្តីពី​ក្រុម​ជួយ​ខ្លួន​ឯង​របស់​ជនពិការ​ខ្សោយ​សតិបញ្ញា និង​អូទីស្សឹម​កាលពី​ម្សិលមិញ​នាយក​ប្រតិបត្តិ​អង្គការ​មូលនិធិ​កុមារ​ពិការ​លោក គន់ វិចិត្រា បាន​ឲ្យ​ដឹង​ថា​ក្នុង​ចំណោម​ជនពិការ​ទាំងអស់​នៅ​កម្ពុជា​មាន​ពី ៦ ទៅ ៧ ម៉ឺន​នាក់​ដែល​បច្ចុប្បន្ន​មាន​សភាព​ធ្ងន់ធ្ងរ​ខ្សោយ​សតិបញ្ញា​មិន​អាច​រស់នៅ​បាន​ដោយ​ខ្លួនឯង​មិន​អាច​រៀនសូត្រ​តាម​សាលារៀន​ហើយ​ងាយ​ប្រឈម​នឹង​ការ​រើសអើង​ផង​ដែរ។ តាមរយៈ​ការ​ធ្វើការ​ផ្ទាល់​ជាមួយ​អាណាព្យាបាល​របស់​ជនពិការ​ជាច្រើន លោក គន់ វិចិត្រា បាន​រកឃើញ​ថា​ជនពិការ​ភាគ​តិច​ណាស់​ដែល​បាន​បោះឆ្នោត​នៅ​កម្ពុជា​ព្រោះ​តែ​ពួកគេ​មិន​មាន​អត្តសញ្ញាណប័ណ្ណ​ហើយ​ការ​មិន​មាន​អត្តសញ្ញាណប័ណ្ណ​នេះ​គឺ​បណ្តាល​មកពី​ការ​​រើសអើង​ពី​សំណាក់​អាជ្ញាធរ​តាម​មូលដ្ឋាន។

លោក​ថា៖ «ដោយសារ​តែ​ពេល​ខ្លះ​ឃើញ​គាត់​ពិការ​គឺ​អត់​មាន​ការ​ធ្វើ​អត្តសញ្ញាណប័ណ្ណ​ឲ្យ​គាត់​ទេ​រហូត​ដល់​មាន​ឪពុកម្តាយ​ខ្លះ​ធានា​ថា​ជា​កូន​របស់​គាត់​ក្តី​ប៉ុន្តែ​ជួនកាល​អត់​មាន​ការ​ទទួល​ស្គាល់​ពី​អាជ្ញាធរ​ទេ​អ៊ីចឹង​ខ្ញុំ​មិន​ហ៊ាន​លើក​ឡើង​ថា​ចំនួន​ប៉ុន្មាន​ទេ​ប៉ុន្តែ​ភាគតិច​ដែល​បាន​បោះឆ្នោត»។

នាយក​អង្គការ​ជនពិការ​កម្ពុជា​ លោក ងិន សាវរ័ត្ន បាន​អះអាង​ស្រដៀង​គ្នា​ជុំវិញ​ការ​រកឃើញ​ក្នុង​របាយការណ៍​របស់​អង្គការ​លោក​ដែល​គ្រោង​នឹង​ផ្សព្វផ្សាយ​នៅ​ដើម​សប្តាហ៍​ក្រោយ​នេះ​ថា​ភាគច្រើន​នៃ​ជនពិការ​ធ្ងន់ធ្ងរ​ត្រូវ​បាន​សង្គម​ចាត់​ទុក​ថា​ជា​មនុស្ស​គ្មាន​ប្រយោជន៍។

Content image - Phnom Penh Post

លោក​ថា៖ «ភាគច្រើន​ជនពិបាក​ធ្ងន់ធ្ងរ​គឺ​គ្មាន​អត្តសញ្ញាណប័ណ្ណ​តែ​ម្តង​ហើយ​ដោយសារ​តែ​ការ​យល់ដឹង​របស់​ក្រុម​ប្រឹក្សា​ភូមិ ឃុំ នៅ​មាន​កម្រិត​ទាប​ទើប​ចាត់​ទុក​ពួកគាត់​ថា​ជា​មនុស្ស​គ្មាន​ប្រយោជន៍​មិន​អើពើ និង​មិន​ផ្តល់​សេវា​សាធារណៈ​ដល់​ពួកគាត់​ឡើយ»។

អគ្គលេខាធិការ​ក្រុម​ប្រឹក្សា​សកម្មភាព​ជនពិការ​នៃ​ក្រសួង​សង្គមកិច្ច​លោក ឯម ច័ន្ទមករា បាន​ច្រានចោល​ការ​លើក​ឡើង​នេះ​ដោយ​ថ្លែង​ថា​ការ​សិក្សា​នេះ​មិនមាន​មូលដ្ឋាន​ច្បាស់លាស់​នោះ​ទេ។

លោក​បន្ត​ថា៖ «ដោយសារ​ការងារ​ពាក់ព័ន្ធ​នឹង​ជនពិការ​ក្នុង​ការ​បោះឆ្នោត​គឺ​យើង​អត់​ទាន់​បាន​ធ្វើ​ Survey ​ទេ​ហើយ​យើង​ក៏​អត់​ឃើញ​មាន​បងប្អូន​ជនពិការ​ណា​មក​ប្តឹង​ថា​គាត់​អត់​បាន​បោះឆ្នោត​ដោយសារ​មូលហេតុ​អ្វី​នោះ​ដែរ​ការ​ស្រាវជ្រាវ​នេះ​មិនមាន​ឯកសារ ឬ​សាក្សី​ណា​ជាក់លាក់​ទេ»។

អគ្គនាយករង​នៃ​អគ្គនាយកដ្ឋាន​អត្តសញ្ញាណកម្ម​នៃ​ក្រសួង​មហាផ្ទៃ​លោក ប្រុក ម៉ៃឧត្តម ឲ្យ​ដឹង​ថា​កន្លង​មក​អាជ្ញាធរ​ថ្នាក់​ជាតិ​បាន​ណែនាំ​ច្រើន​ដល់​ថ្នាក់​មូលដ្ឋាន​ពាក់ព័ន្ធ​នឹង​ឥរិយាបថ​ចំពោះ​ជនពិការ និង​ស្ត្រី​មាន​ផ្ទៃពោះ​ហើយ​លោក​ស្នើសុំ​អធ្យាស្រ័យ​ចំពោះ​ករណី​ខ្វះ​ចន្លោះ​ណា​មួយ​នោះ។

លោក​ថា៖ «បើ​ពិតជា​មាន​ការ​រើសអើង​មែន​សុំ​អធ្យាស្រ័យ​ហើយ​សុំ​ជូន​ដំណឹង​មក​ខាង​ជំនាញ​ដើម្បី​យើង​ណែនាំ​ពួកគាត់​ខ្ញុំ​សោកស្តាយ​បើ​មាន​អ៊ីចឹង​មែន»​។

បើ​តាម​លោក ឯម ច័ន្ទមករា ការ​ស្រាវជ្រាវ​របស់​វិទ្យាស្ថាន​ស្ថិតិ​បង្ហាញ​ថា​នៅ​ឆ្នាំ ២០១៣ ជនពិការ​នៅ​កម្ពុជា​មាន​ជាង ៣០ ​ម៉ឺន​នាក់​ហើយ​ចំនួន​នេះ​បាន​កើនឡើង​ដល់​ជាង ៥០ ​ម៉ឺន​នាក់​នៅ​ឆ្នាំ ២០១៥ នេះ​៕

អត្ថបទគួរចាប់អារម្មណ៍