The Phnom Penh Post Search

Search form




Logo of Phnom Penh Post newspaper Phnom Penh Post - ជន​ភៀសខ្លួន​អូស្ត្រាលី​នឹង​បញ្ជូន​មក​ដល់​ភ្នំពេញ​នៅ​ព្រឹក​នេះ

ជន​ភៀសខ្លួន​អូស្ត្រាលី​នឹង​បញ្ជូន​មក​ដល់​ភ្នំពេញ​នៅ​ព្រឹក​នេះ

ជនភៀសខ្លួន​នៅ​កោះ​ណូរុ តវ៉ា​ប្រឆាំង​ការ​ប៉ុនប៉ង​បញ្ជូន​ពួកគេ​មក​កម្ពុជា​កាលពី​ឆ្នាំ​មុន​។
ជនភៀសខ្លួន​នៅ​កោះ​ណូរុ តវ៉ា​ប្រឆាំង​ការ​ប៉ុនប៉ង​បញ្ជូន​ពួកគេ​មក​កម្ពុជា​កាលពី​ឆ្នាំ​មុន​។ រូបថត សហការី

ជន​ភៀសខ្លួន​អូស្ត្រាលី​នឹង​បញ្ជូន​មក​ដល់​ភ្នំពេញ​នៅ​ព្រឹក​នេះ

ភ្នំពេញៈ ក្រុម​ជនភៀសខ្លួន​ដំបូង​ដែល​ទទួល​យក​នូវ​ការ​តាំង​លំនៅ​ថ្មី ក្រោម​កិច្ចព្រមព្រៀង​ដែល​រង​ការ​រិះគន់​យ៉ាង​ខ្លាំង​រវាង​កម្ពុជា និង​អូស្ត្រាលី គ្រោង​នឹង​មក​ដល់​រាជធានី​ភ្នំពេញ​នា​ព្រឹក​នេះ​។ នេះ​បើ​យោង​​តាម​មន្រ្តី​រដ្ឋាភិបាល។

លោក ខៀវ សុភ័គ អ្នក​នាំពាក្យ​ក្រសួង​មហាផ្ទៃ បាន​ប្រាប់​ភ្នំពេញ ប៉ុស្តិ៍ កាលពី​ម្សិលមិញ​ថា ជនភៀស​ខ្លួន​ចំនួន​បួន​នាក់​គឺ​បី​នាក់​មក​ពី​ប្រទេស​អ៊ីរ៉ង់ និង​ម្នាក់​មកពី​ប្រទេស​មីយ៉ាន់ម៉ា «នឹង​មក​ដល់​នៅ​ព្រឹក​ថ្ងៃ​ស្អែក​ (ថ្ងៃ​នេះ) តាម​ជើង​ហោះហើរ​របស់​ក្រុមហ៊ុន​អាកាសចរណ៍​ម៉ាឡេស៊ី​»​។

មន្ត្រី​អន្តោប្រវេសន៍​ជាន់ខ្ពស់​ម្នាក់​ដែល​សុំ​មិន​បញ្ចេញ​ឈ្មោះ បាន​ធ្វើការ​បញ្ជាក់​ថា ការ​មក​ដល់​នេះ​គឺ​ពិតប្រាកដ​មែន។ លោក​បាន​បន្ត​ថា៖ «ជនភៀសខ្លួន​នឹង​ចាកចេញ​ពី​អាកាសយានដ្ឋាន Darwin នៅ​ថ្ងៃ​ពុធ និង​មក​ដល់​ទីក្រុង​គូឡាឡាំពួ នៅពេល​ព្រឹក​មុន​បន្ត​ហោះហើរ​មក​​រាជធានី​ភ្នំពេញ​»។

ជនភៀសខ្លួន ដែល​​ពី​មុន ជាប់​ឃុំ​នៅលើ​កោះ​ប៉ាស៊ីហ្វិក ណូរុ​ត្រូវ​បាន​ដឹក​តាម​យន្តហោះ ដោយ​សម្ងាត់​​ទៅ Darwin នៅ​ទឹកដី​ខាង​ជើង​នៃ​ប្រទេស​អូស្រ្តាលី នៅ​ដើម​ខែ​ឧសភា ហើយ​ត្រូវ​បាន​ដាក់​​ឲ្យ​ស្នាក់នៅ​កន្លែង​អន្តោប្រវេសន៍​ជិត​អាកាសយានដ្ឋាន ចាប់ពី​ពេល​នោះ​មក​។

ពេល​មក​ដល់​រាជធានី​ភ្នំពេញ លោក សុភ័គ បាន​ឲ្យ​ដឹង​ថា ជនភៀសខ្លួន​នឹង​​ដឹក​ទៅ​កន្លែង​ស្នាក់នៅ​បណ្តោះអាសន្ន​ភ្លាមៗ «ដែល​បាន​រៀបចំ​ឡើង សម្រាប់​ពួកគេ ដោយ​ប្រើ​មូលនិធិ​ពី​ប្រទេស​អូស្រ្តាលី​»។

បន្ទាប់ពី​បាន​បដិសេធ​មិន​​​ធ្វើ​ជា​ភាគី​នៃ​កិច្ចព្រមព្រៀង ដែល​បាន​ចុះ​ហត្ថលេខា​នៅក្នុង​ខែ​កញ្ញា ជនភៀសខ្លួន​បួន​នាក់ បាន​ស្ម័គ្រចិត្ត តាំង​លំនៅ​ថ្មី បន្ទាប់ពី​លិខិត​មួយ​ត្រូវ​បាន​ចែកចាយ​នៅក្នុង​មជ្ឈមណ្ឌល​ឃុំឃាំង​កោះ ណូរុ ដែល​បញ្ជាក់​ថា ក្រសួង​អន្តោប្រវេសន៍​អូស្រ្តាលី​​ផ្តល់​ប្រាក់​ច្រើន និង​​ការ​លើក​ទឹកចិត្ត​ជាច្រើន​ដល់​អ្នក​ទាំងឡាយ​ដែល​បាន​ព្រមព្រៀង​ផ្លាស់លំនៅ​ភ្លាមៗ​។

លិខិត​នោះ​បាន​ព្រមាន​ថា កម្រិត​នៃ​ការ​ឧបត្ថម្ភ​ដូច​គ្នា​អាច​នឹង​មិន​មាន​ចំពោះ​អ្នក​ដែល​បាន​ជ្រើសរើស​ការ​ទទួល​តាំងលំនៅ​ថ្មី​នៅ​ថ្ងៃ​ក្រោយ។ លិខិត​នោះ​ក៏​បាន​បញ្ជាក់​ថា កន្លែង​ស្នាក់នៅ ​«បែប​វីឡា» ​នឹង​មាន​ជូន​នៅពេល​មក​ដល់​ភ្នំពេញ។

កាលពី​ដើម​ខែ​នេះ អង្គការ​អន្តរទេសន្តរប្រវេសន៍ (IOM) បាន​ប្រកាស​ថា ខ្លួន​បាន​រៀបចំ​កន្លែង​ស្នាក់នៅ បែប​វីឡា​បណ្តោះអាសន្ន​ដល់​ជនភៀសខ្លួន ដែល​ត្រូវ​បាន​រំពឹង​ថា នឹង​ស្នាក់នៅ​ «រហូត​ដល់​បី​ខែ»។

អ្នក​នាំ​ពាក្យ​របស់​អង្គការ IOM ​ថ្លែង​ថា ក្រុម​នេះ​មិន​បាន​ដឹង​ពី​ពេល​​មក​ដល់ ឬ​កាលបរិច្ឆេទ​មក​ដល់​ភ្នំពេញ​ទេ៕ TK

អត្ថបទគួរចាប់អារម្មណ៍