The Phnom Penh Post Search

Search form




Logo of Phnom Penh Post newspaper Phnom Penh Post - ជន​ភៀស​ខ្លួន​អូស្ត្រាលី​បាន​មក​ដល់​ភ្នំពេញ​តាម​ការ​គ្រោង​ទុក

ជន​ភៀស​ខ្លួន​អូស្ត្រាលី​បាន​មក​ដល់​ភ្នំពេញ​តាម​ការ​គ្រោង​ទុក

ក្រុម​ជនភៀស​ខ្លួន​មកពី​អូស្ត្រាលី​ពេល​នាំ​ចេញ​ពី​ព្រលាន​យន្តហោះ​អន្តរជាតិ​ភ្នំពេញ​ពី​ម្សិលមិញ​។
ក្រុម​ជនភៀស​ខ្លួន​មកពី​អូស្ត្រាលី​ពេល​នាំ​ចេញ​ពី​ព្រលាន​យន្តហោះ​អន្តរជាតិ​ភ្នំពេញ​ពី​ម្សិលមិញ​។ ផា លីណា

ជន​ភៀស​ខ្លួន​អូស្ត្រាលី​បាន​មក​ដល់​ភ្នំពេញ​តាម​ការ​គ្រោង​ទុក

ភ្នំពេញៈ ជន​ភៀសខ្លួន​ដំបូង ដែល​ទទួល​យក​ការ​តាំង​លំនៅ​ថ្មី​ពី​កោះ​ប៉ាស៊ីហ្វិកណូរុ បាន​មក​ដល់​​​ភ្នំពេញ​ហើយ កាលពី​ម្សិលមិញ ដែល​នេះ​គឺជា​ការ​ពង្រឹង​​នូវ​កិច្ចព្រមព្រៀង​ប្រាក់​រាប់​លាន​ដុល្លារ​ដ៏​ចម្រូងចម្រាស ដែល​កម្ពុជា​បាន​ចុះ​ហត្ថលេខា​ជាមួយ​នឹង​អូស្រ្តាលី​ កាលពី ៩ ខែ​មុន​។

ជនភៀសខ្លួន​ចំនួន ​៤ នាក់ គឺ​ជនជាតិ រ៉ូហ៊ីងយ៉ា ម្នាក់​មកពី​មីយ៉ាន់ម៉ា និង​ជនជាតិ​អ៊ីរ៉ង់​ ​៣ នាក់​បាន​មក​ដល់​នៅ​ម៉ោង ១០ និង ២០ នាទី​នៅ​អាកាសយានដ្ឋាន​អន្តរជាតិ​ភ្នំពេញ។ ការ​ធ្វើ​ដំណើ​របស់​ពួកគេ ដែល​ភ្នំពេញ ប៉ុស្តិ៍ ​បាន​ផ្សាយ​ដំបូង​គេ កាលពី​ថ្ងៃ​ពុធ​គឺ​បាន​ដឹក​ជញ្ជូន​ពួកគេ​ពី​កោះ Darwin នៅ​ទឹកដី​ខាង​ជើង​នៃ​ប្រទេស​អូស្រ្តាលី​ដោយ​ឆ្លងកាត់​ទីក្រុង​គូឡាឡំាពួ តាម​ជើង​ហោះហើរ​ម៉ាឡេស៊ី។

នៅ​អាកាសយានដ្ឋាន​គូឡាឡំាពួ គេ​ឃើញ​មន្រ្តី​អូស្រ្តាលី​អម​ដំណើរ​ពួកគេ​ទៅ​ស្ថានីយ ដើម្បី​ជិះ​យន្តហោះ​មក​ភ្នំពេញ​។

គេ​អាច​ងាយ​ច្រឡំ​ពួកគេ​ថា ជា​អ្នក​ទេសចរ​គឺ​បុរស​អ៊ីរ៉ង់​ពីរ​នាក់​ពាក់អាវ Polo ហើយ​ជន​ភៀស​ខ្លួន​រ៉ូហ៊ីងយ៉ា​ពាក់​មួក និង​អាវ​រងា។

នៅពេល​ដែល​ពួកគេ​បាន​មក​ដល់​រាជធានី​ភ្នំពេញ មាន​រថយន្ត​បិទ​វាំងនន​ដឹក​ពួកគេ​ភ្លាម​ចេញ​ពី​ស្ថានីយ VIP នៃ​អាកាសយានដ្ឋាន​ដែល​អ្នក​សារព័ត៌មាន​រាប់​សិប​នាក់​កំពុង​រង់ចាំ។ ពួកគេ​ត្រូវ​បាន​ដឹកជញ្ជូន​ទៅ​កន្លែង​ស្នាក់នៅ​បែប​វីឡា នៅ​ជាយក្រុង​ដែល​រៀបចំ​ដោយ​អង្គការ​ទេសន្តរប្រវេសន៍​ដែល​ភាគី​អូស្រ្តាលី​បាន​ចុះ​កិច្ចសន្យា​សម្រាប់​ពួកគេ។

លោក Joe Lowry អ្នកនាំពាក្យ​អាស៊ី​ប៉ាស៊ីហ្វិក​នៃ​អង្គការ​ទេសន្តរប្រវេសន៍ បាន​ថ្លែង​ថា ក្រុម​នេះ ​«​បាន​ចូល​កន្លែង​ស្នាក់នៅ​» យ៉ាង​ឆាប់​រហ័ស។

លោក​ឲ្យ​ដឹង​ក្នុង​បទសម្ភាស នៅ​ការិយាល័យ IOM នៅ​រាជធានី​ភ្នំពេញ ប៉ុន្មាន​ម៉ោង​បន្ទាប់ពី​ជនភៀស​ខ្លួន​មក​ដល់​ថា៖ «​ពួកគេ​បាន​ធ្វើ​ដំណើរ​ឆ្ងាយ ហើយ​ពួកគេ មិន​បាន​ដេក​ច្រើន​ទេ កាលពី​យប់​មិញ [ប៉ុន្តែ] ពួកគេ​មាន​ស្មារតី​ល្អ»។

អង្គការ​ទេសន្តរប្រវេសន៍​បាន​​រៀបចំ​អាហារ​អ៊ីរ៉ង់​កាលពី​ម្សិលមិញ សម្រាប់​ជន​ភៀស​ខ្លួន​ដែល​លោក Lowry បាន​ឲ្យ​ដឹង​ថា ពួកគេ​​មាន​សុទិដ្ឋិនិយម​អំពី​ជីវិត​ថ្មី​របស់​ពួកគេ​ នៅ​កម្ពុជា។

លោក​បន្ថែម​ថា៖ «​ខ្ញុំ​បាន​សួរ​ជន​ភៀស​ខ្លួន​ម្នាក់ ហើយ​គាត់​ថា គាត់​គិត​ថា ភ្នំពេញ​ជា​កន្លែង​ក្រីក្រ​។ តែ​គាត់​បាន​មើល​ឃើញ​មាន​រថយន្ត​ថ្មី អាជីវកម្ម​ជាច្រើន និង​សកម្មភាព​ជាច្រើន​នៅ​តាម​ផ្លូវ​»។

ពួកគេ​បាន​និយាយ​ពី​ឱកាស​រក​ការងារ​ធ្វើ​រួច​ហើយ។ លោក​បន្ត​ថា៖ «​ចាប់ពី​ថ្ងៃ​ស្អែក​ពួកគេ​នឹង​ចេញ​ទៅ​ទិញ​ម្ហូបអាហារ​ផ្ទាល់​ខ្លួន ហើយ​ស្វែងយល់​ពី​ផ្លូវ​នៅក្នុង​សង្កាត់ ទៅ​ផ្សារ​នៅ​ក្បែរ​នោះ។ ពួកគេ​រីករាយ​ដែល​ដឹង​ថា ប្រាក់​រៀល និង​ដុល្លារ​ប្រើប្រាស់​បាន​ដូច​គ្នា។ ពួកគេ​មិន​ធ្លាប់​ដឹង​ទេ»។

កិច្ចព្រមព្រៀង​ស្តីពី​ការ​តាំង​លំនៅ​ថ្មី ទទួល​រង​ការ​រិះគន់​យ៉ាង​​ខ្លាំង ចាប់​តាំងពី​កិច្ចព្រមព្រៀង​នេះ ត្រូវ​បាន​លើក​ឡើង​ជា​បឋម ក្នុង​កិច្ច​ប្រជុំ​បិទ​ទ្វារ​រវាង​លោកស្រី Julie Bishop ​រដ្ឋមន្រ្តី​ការបរទេស​អូស្រ្តាលី និង​លោក​នាយករដ្ឋមន្រ្តី ហ៊ុន សែន កាលពី​ជាង​មួយ​ឆ្នាំ​មុន​។

បន្ទាប់ពី​កិច្ចប្រជុំ​មាន​ការ​លាក់​បាំង​ពី​កិច្ចព្រមព្រៀង។ សូម្បីតែ​មុន​ថ្ងៃ​មក​ដល់​របស់​ជនភៀស​ខ្លួន​អូស្រ្តាលី​​ក៏​មន្ត្រី​បាន​បដិសេធ​ផ្តល់​ការ​បញ្ជាក់​ដែរ​។ ដើម្បី​បោះ​ចោល​ជនភៀសខ្លួន ដែល​មិន​ចង់​បាន អូស្រ្តាលី​បាន​ព្រមព្រៀង​ជា​បឋម ក្នុង​​ការ​ផ្តល់​ជំនួយ​បន្ថែម ៤០ លាន​ដុល្លារ​អូស្រ្តាលី (៣១ លាន​ដុល្លារអាមេរិក​) មក​ឲ្យ​កម្ពុជា ហើយ​ក្រោយមក បាន​ប្រកាស​ថា អូស្រ្តាលី​នឹង​ចំណាយ​ប្រហែល​ ១៥,៥ លាន​ដុល្លារ​អូស្រ្តាលី​​បន្ថែម​ទៀត ដើម្បី​បង់​សេវា​តាំងលំនៅ​ថ្មី។

បន្ទាប់ពី​រយៈពេល​ជាច្រើន​ខែ​​ដែល​ជនភៀសខ្លួន​នៅលើ​កោះ​ណូរុ​បដិសេធ​មិន​ព្រម​មក​តាំង​លំនៅ​នៅ​ប្រទេស​ក្រៅ​ពី​ប្រទេស​អូស្រ្តាលី ក្រសួង​អន្តោប្រវេសន៍​របស់​អូស្ត្រាលី​​បាន​ចេញ​លិខិត​មួយ​​​ដោយ​ផ្តល់​ប្រាក់​ចំនួន​ច្រើន​​ និង​អត្ថប្រយោជន៍​ដទៃៗ​ទៀត​​ទៅ​​ជនភៀសខ្លួន​ណា​ដែល​យល់ព្រម​ចាកចេញ​ភ្លាមៗ​។

នៅក្នុង​សេចក្តី​ថ្លែងការណ៍​មួយ​កាលពី​ម្សិលមិញ លោក Phil Robertson ​អនុប្រធាន​អង្គការ​ឃ្លាំ​មើល​សិទ្ធិ​មនុស្ស​ប្រចាំ​តំបន់​អាស៊ី បាន​​លើក​យក​​ករណី​កម្ពុជា​ប្រព្រឹត្ត​មិន​គប្បី​ និង​បញ្ជូន​ជនភៀសខ្លួន​ជនជាតិ​ម៉ុងតាញ៉ា​ត្រឡប់​ទៅ​ប្រទេស​វៀតណាម​វិញ នៅក្នុង​ការ​រិះគន់​របស់​ខ្លួន​ទៅ​លើ​កិច្ចព្រមព្រៀង​របស់​កម្ពុជា​ជាមួយ​អូស្រ្តាលី​។ ​

លោក​បាន​បន្ត​ថា​៖ «​អូស្រ្តាលី​គប់​លុយ​រាប់​លាន​ដុល្លារ​មក​កម្ពុជា​​ដើម្បី​​ឲ្យ​កម្ពុជា​ទទួល​យក​​ជនភៀស​ខ្លួន​ទាំងនេះ បើ​ទោះបី​ជា​កម្ពុជា​​នៅក្នុង​កំណត់ត្រា​ថ្មីៗ​របស់​អង្គការ​សិទ្ធិ​មនុស្ស បាន​បណ្តេញ​ជន​សុំ​សិទ្ធិ​ជ្រកកោន​ពី​វៀតណាម​​ និង​ការ​គំរាមកំហែង​របស់​កម្ពុជា​ថា នឹង​បណ្តេញ​បន្ថែម​ទៀត​ប្រសិន​បើ​ប្រទេស​ដទៃ​ណា​មិន​យល់​ព្រម​ទទួល​យក​ពួកគេ​ឲ្យ​ទៅ​តាំង​លំនៅ​នៅ​ក្នុង​ប្រទេស​នោះ​​។ ប៉ុន្តែ បើ​ទោះបី​ជា​មាន​ការ​រិះគន់​យ៉ាង​ដូច្នេះ​ក៏ដោយ ទាំង​កម្ពុជា និង​អូស្រ្តាលី​​សង្ឃឹម​ថា ការ​មក​ដល់​នៃ​ជន​ភៀស​ខ្លួន​កាល​ម្សិលមិញ​នឹង​​ជំរុញ​ឲ្យ​មាន​ជនភៀសខ្លួន​បន្ថែម​ទៀត​បន្ត​​យល់​​ព្រម​មក​កាន់​កម្ពុជា​។

រដ្ឋមន្ដ្រី​អន្តោប្រវេសន៍​អូស្រ្តាលី លោក Peter Dutton បាន​ប្រាប់​សារព័ត៌មាន Sky News កាលពី​ម្សិលមិញ​ថា លោក​សង្ឃឹម​​ថា នឹង​មាន​ជនភៀសខ្លួន​បន្ថែម​ទៀត​​បន្ត​យល់ព្រម​មក​កម្ពុជា​។ លោក​បន្ត​ថា​៖ «​ខ្ញុំ​គិត​ថា យើង​​អាច​បង្ហាញ​ថា វា​អាច​ដំណើរការ​ល្អ​​សម្រាប់​ជនភៀស​ខ្លួន​ទាំង​បួន​នាក់​នេះ ហើយ​​អ្នក​ដទៃៗ​ទៀត​​អាច​នឹង​យក​គំរូ​តាម​»។

លោក កែម សារិន ប្រធាន​នាយកដ្ឋាន​ជនភៀស​ខ្លួន​នៃ​​ក្រសួង​មហាផ្ទៃ ថ្លែង​ថា កម្ពុជា​រីករាយ​ស្វាគមន៍​​​ជនភៀស​ខ្លួន​បន្ថែម​ទៀត​។ «​​ប្រសិន​បើ​​ពួកគេ​ចង់​​​មក​ដោយ​ស្ម័គ្រចិត្ត​យើង​នឹង​ទទួល​យក​»៕ TK/PS

អត្ថបទគួរចាប់អារម្មណ៍