កោះកុងៈ ដីគម្របព្រៃឈើរបស់រដ្ឋរាប់ពាន់ម៉ែត្រការ៉េក្នុងទំហំដីបម្រុងរបស់រដ្ឋទំហំប្រមាណ ១១ ហិកតា ស្ថិតនៅភូមិកោះស្តេច ឃុំកោះស្តេច ស្រុកគិរីសាគរ ខេត្តកោះកុងត្រូវបានជនមិនស្គាល់អត្តសញ្ញាណចាប់ផ្ដើមលួចបោះបង្គោលថ្ម និងឈើទន្ទ្រានយកដោយខុសច្បាប់។
លោក សុខ សុទ្ធី អភិបាលរងខេត្តកោះកុងបានប្រាប់ ភ្នំពេញ ប៉ុស្តិ៍ កាលពីម្សិលមិញថា មន្ត្រីចុះទៅត្រួតពិនិត្យមើលជាក់ស្តែងនៅតំបន់ដែលកំពុងត្រូវបានទន្ទ្រានយកនោះបានរកឃើញបង្គោលថ្ម និងឈើប្រមាណ ២០ ដើម ហ៊ុមព័ទ្ធលើដីជាច្រើនពាន់ម៉ែត្រការ៉េ។
លោក សុខ សុទ្ធី បានបន្តថា៖ «យើងបានប្រាប់ឱ្យមន្ត្រីដកហូតបង្គោលទាំងនោះចេញ និងឃ្លាំមើលជាប្រចាំ ដើម្បីឈានទៅរកចាប់ខ្លួនអ្នកប្រព្រឹត្ត បញ្ជូនមកឱ្យរដ្ឋបាលខេត្តដើម្បីកសាងសំណុំរឿងបញ្ជូនទៅតុលាការចាត់ការទៅតាមផ្លូវច្បាប់។ ប៉ុន្តែរហូតមកដល់ពេលនេះ មិនទាន់បានកំណត់មុខសញ្ញាលើបុគ្គលណាមួយនៅឡើយទេ»។
លោក សុខ សុទ្ធី ថ្លែងថា ប្រជាពលរដ្ឋខិលខូចបានលួចដាំបង្គោលនៅពេលយប់ ហើយនៅពេលដែលអាជ្ញាធរ មិនអើពើ និងមានការធ្វេសប្រហែសក្នុងរយៈពេល ២ ឆ្នាំ ទៅ ៣ ឆ្នាំ វានឹងក្លាយជាចលនាប្តឹងផ្តល់តវ៉ា ពិបាកដល់អាជ្ញាធរក្នុងការដោះស្រាយ។
លោក សុខ សុទ្ធី បានឱ្យដឹងថា ដីចំនួន ១១ ហិកតា នៅលើកោះស្តេចនេះជាដីកម្មសិទ្ធិរបស់រដ្ឋបន្ទាប់ពីរាជរដ្ឋាភិបាលបានធ្វើអនុប្រយោគជូនប្រជាពលរដ្ឋនៅទីនេះរួចហើយ ដីនេះមានគម្របព្រៃឈើ ដែលអាចរក្សាទុក ដើម្បីឱ្យមានភ្លៀងសម្រាប់ផ្គត់ផ្គង់ជូនដល់ប្រជាពលរដ្ឋដែលរស់នៅលើកោះនេះសម្រាប់ប្រើប្រាស់។
លោក ថោង ច័ន្ទតារា អ្នកសម្របសម្រួលសមាគមការពារ សិទ្ធិមនុស្ស អាដហុកប្រចាំខេត្តកោះកុងថ្លែង ដោយអះអាងថា អ្នកទៅទន្ទ្រានកាន់កាប់ដីរបស់រដ្ឋធ្វើជាកម្មសិទ្ធិនៅក្នុងឃុំកោះស្តេចនេះ មិនមែនពលរដ្ឋធម្មតាអាចធ្វើបានទេគឺមានតែអ្នកមានលុយ និងមានខ្សែបណ្តាញទើបធ្វើបាន។
លោកថ្លែងថា៖ «ថ្មីៗមានការចូលទៅទន្ទ្រានកាន់កាប់ដីរដ្ឋខុសច្បាប់ជាច្រើនកន្លែង ហើយនៅពេលដែលគេមានខ្នង មានខ្សែទៅ ចេះតែស្ងាត់ៗទៅ»។
លោក ថោង ច័ន្ទតារា ថ្លែងថា អាជ្ញាធរបានស្គាល់ពីមុខសញ្ញានៃជនល្មើសចូលទៅទន្ទ្រានដីរបស់រដ្ឋស្ទើរតែទាំងអស់ ប៉ុន្តែពួកគាត់ហាក់បីដូចជាព្រងើយកន្តើយក្នុងការចាត់វិធានការ ឬចាប់បញ្ជូនទៅតុលាការ ដោយសារវាជាការទន្ទ្រានដីជាប្រព័ន្ធ មិនមែនប្រជាពលរដ្ឋធម្មតា ឬមកពីក្រៅចូលទៅទន្ទ្រាននោះទេ។
យោងតាមមាត្រា ១៨ និង ១៩ នៃច្បាប់ភូមិបាល បញ្ជាក់ថា រាល់ការចូលទៅទន្ទ្រានកាន់កាប់សម្បត្តិសាធារណៈ និងរបស់នីតិបុគ្គលសាធារណៈនឹងរាល់ការបំប្លែងការកាន់កាប់ទ្រព្យសម្បត្តិឯកជនរបស់រដ្ឋទៅជាកម្មសិទ្ធិផ្ទាល់ខ្លួននឹងត្រូវផ្តន្ទាទោស ពិន័យជាប្រាក់ពី ៥ លានរៀល ដល់ ៥០ លានរៀល ឬ និងផ្តន្ទាទោសដាក់ពន្ធនាគារពី ១ ឆ្នាំដល់ ៥ ឆ្នាំ។
លោក ជិន ម៉ាលីន អ្នកនាំពាក្យក្រសួងយុត្តិធម៌ថ្លែងថា អ្នកដែលចូលទៅទន្ទ្រានដី ឬដីព្រៃកម្មសិទ្ធិរបស់រដ្ឋនឹងត្រូវចោទពីបទល្មើសព្រហ្មទណ្ឌតាមបញ្ញត្តិក្រមព្រហ្មទណ្ឌ និងច្បាប់មួយចំនួនទៀតទាក់ទងបរិស្ថាន និងធនធានធម្មជាតិ។ ចំណែកប្រភេទបទល្មើស និងទោសទណ្ឌគឺអាស្រ័យតាមសកម្មភាពនីមួយៗដែលកំណត់ដោយស្ថាប័នអយ្យការ៕