The Phnom Penh Post Search

Search form




Logo of Phnom Penh Post newspaper Phnom Penh Post - ជន​ម្នាក់​ត្រូវបាន​ប្ដឹង​​ រឿង​ប្រមាថ​ជីវិត​នាយក​រដ្ឋមន្ត្រី

ជន​ម្នាក់​ត្រូវបាន​ប្ដឹង​​ រឿង​ប្រមាថ​ជីវិត​នាយក​រដ្ឋមន្ត្រី

Content image - Phnom Penh Post
លោក ផៃ ស៊ីផាន អ្នកនាំពាក្យរាជរដ្ឋាភិបាលកម្ពុជា។ ផា លីណា

ជន​ម្នាក់​ត្រូវបាន​ប្ដឹង​​ រឿង​ប្រមាថ​ជីវិត​នាយក​រដ្ឋមន្ត្រី

ភ្នំពេញៈ លោក ផៃ ស៊ី​ផាន អ្នកនាំពាក្យ​រាជរដ្ឋាភិបាល​កម្ពុ​ជាកា​លពី​ម្សិលមិញ​បានដាក់​ពាក្យបណ្តឹង​ទៅ​ក្រសួង មហាផ្ទៃ​ដើម្បីឲ្យ​ចាប់ខ្លួន​ជន​ម្នា​ក់ដោយ​ចោទថា​បាន​ប្រមាថ​អាយុជីវិត​លោកនាយក​រដ្ឋមន្ត្រី ហ៊ុន សែន តាម​បណ្ដាញ​សង្គម តែ​ក្រសួង​មហាផ្ទៃ​​ថា មិនទាន់​ទទួលបាន​ព័ត៌មាន​នេះ​ខណៈ​សង្គម​ស៊ីវិលរិះគន់​លើ​វិធានការ​ថា មាន ស្តង់ដារ ២ លើ​អ្នក​រិះគន់។

កាលពី​ថ្ងៃ​សៅរ៍ លោក ​ផៃ ស៊ីផាន បាន​សរសេរ​លើ​ហ្វេ​សប៊ុ​ក​របស់លោក​ថា «ហ្វេ​ស​ប៊ុ​ក (Tharith Bun) នេះ​បាន​គំរាម​ធ្វើឃាត​លោកនាយក​រដ្ឋមន្ត្រី​ ហ៊ុន សែន ដែលជា​អំពើ​ល្មើស​ត្រូវ​ប្រឈម​នឹង​ច្បាប់ ហើយ​លោក​ក៏​ប្រកាស​ផ្ដល់​រង្វាន់​ចំពោះ​អ្នកណា​ដែល​រកឃើញ​ឪពុកម្ដាយ ឬ​កន្លែង​ស្នាក់នៅ​របស់​អ្នកប្រើប្រាស់​ហ្វេ​ស​ប៊ុ​ក​ម្នាក់​នោះដែរ។

បន្ទាប់ពី​ប្រកាស​យ៉ាង​ដូច្នេះ លោក ផៃ ស៊ី​ផាន បាន​ប្រាប់​ភ្នំពេញ​ប៉ុស្តិ៍​ពី​ម្សិលមិញ​ថា លោក​បានដាក់​បណ្តឹង​ទៅ​ក្រសួងមហាផ្ទៃ​រួចហើយ និង​សង្ឃឹមថា ក្រសួងមហាផ្ទៃ​នឹង មាន​វិធានការ​តាមច្បាប់​ចំពោះ​ជនសង្ស័យ​ដែល​បាន​ប្រមាថ​អាយុជីវិត​នាយករដ្ឋមន្ត្រី​កម្ពុជា​នេះ។

លោក​បន្តថា ជាទូទៅនាយករដ្ឋមន្ត្រី​ គឺមាន​ច្បាប់​ការពារ​ដោយ​មិន​អាចមាន​បុគ្គល​ណា អាច​ប្រមាថ គំរាម និង​សម្លុត​លើ​រូបលោក​បានទេចំណែក​បុគ្គល​រូបនេះ​បាន​ប្រើពាក្យ​ញុះញង់​ម្តង​ហើយ​ម្តងទៀត​និង​បាន​ព្រមាន​សម្លាប់​លោក​នាយក​រដ្ឋមន្ត្រី ហ៊ុន សែន។

លោក​បញ្ជាក់ថា៖ «យុវជន​ហ្នឹង មិនមែន​ខ្ញុំ​ទើបតែ​ចាត់វិធានការ​ដោយ​មិន​ធ្វើ​ការអប់រំ​ទេ​គឺ​យើង​បាន​ពន្យល់​ប្រាប់ តែ​នៅតែ​ឈ្លើយ​បន្ត បានន័យថា ការងារ​នេះ គេ​ធ្វើជា​ប្រព័ន្ធ ស្ថិតក្នុង​ការគាំទ្រ​ក្រុម​ណាមួយ​ដែលមាន​ការ​បំផុស​បំផុល។ តាម​យើង​ដឹង​គឺ​ម្ចាស់​ហ្វេ​ស​ប៊ុ​ក​នេះ គាត់​រស់នៅ​ធ្វើការ​នៅ​ថៃ តែ​មិន​ច្បាស់​ទេ គឺ​ទុក​ឲ្យ​សមត្ថកិច្ច​គេ​ចាត់​ចែង»។

ភ្នំពេញ​ប៉ុស្តិ៍​មិនអាច​សុំ​ការ​អត្ថាធិ​ប្បាយ​ពី​អ្នកនាំពាក្យ​ក្រសួងមហាផ្ទៃ លោក ខៀវ សុភ័គ បានទេ​កាលពី​ម្សិលមិញ​ដោយ​លោក​ថា កំពុង​ជាប់​ប្រជុំ។ ចំណែក​លោក ផាន សុ​ផានិត អ្នកនាំពាក្យ​រង​ក្រសួងមហាផ្ទៃ​បាន​បញ្ជាក់ថា លោក​ពុំទាន់​បានទទួល​ព័ត៌មាន​អំពី​ពាក្យបណ្តឹង​នេះ​ទេ ព្រោះ​ជាប់រវល់​រៀបចំ​សន្និបាត​របស់​ក្រសួងមហាផ្ទៃ។ តែបើ​តាម​សំណើ​របស់លោក ផៃ ស៊ី​ផាន លោក​ចង់​ឲ្យ​មាន​ការធ្វើ​បត្យាប័ន​នាំខ្លួន​បុគ្គល​រូបនោះ មក​ទទួលទោស​តាមច្បាប់​កម្ពុជា។

លោក ប៊ុន ថា​រិ​ទ្ធ ដែលជា​ម្ចាស់ហ្វេ​ស​ប៊ុ​ក​មានឈ្មោះ Tharith Bun បាន​ឆ្លើយតប​តាម​ហ្វេ​ស​ប៊ុ​ក​ផ្ទាល់ខ្លួន​ថា វា​គ្មាន​អ្វីដែល​ចម្លែក​ទេ​ចំពោះ​ការព្រមាន​ចាប់ខ្លួន និង​ប្តឹង​លោក​ពី​មន្ត្រីជាន់ខ្ពស់​នេះ​ដោយ​គ្រាន់តែ​រិះគន់​អំពី​ការបិទ​សិទ្ធិសេរីភាព​រឿង​តវ៉ា​ស្រូវ​ចុះថោក​នៅ​កម្ពុជា។

អ្នកនាំពាក្យ​សមាគម​អាដហុក លោក ស៊ឹង សែន​ករុណា បាន​លើកឡើងថា រហូតមកទល់​ពេលនេះ លោក​ពុំទាន់​ទទួលបាន​សារ​ណាមួយ​ដែល​បង្ហាញថា​យុវជន​រូបនោះ​បាន​ជេរប្រមាថ និង​គំរាម​សម្លាប់​លោកនាយក​រដ្ឋមន្ត្រី​ក្រៅ​តែ​ពី​ការ​អះអាង​របស់ លោក ផៃ ស៊ីផាន នោះ​ទេ។

លោក​បាន​បន្តថា បើ​ក្រសួង​មហាផ្ទៃ​ពិតជា​ចាត់វិធានការ​លើ​ជន​នោះ​មែន គឺ​បង្ហាញថា ជាការ​អនុវត្ត​ច្បាប់​មាន​ស្តង់ដា ២ ដែល​ចំពោះ​ក្រុម​ឬ​ជន​ដែល​គាំទ្រ​រដ្ឋាភិបាល​មិនត្រូវ​បានទទួល​ទោសទណ្ឌ​នោះទេ បន្ទាប់ពី​ពួកគេ​បាន​ប្រព្រឹត្ត​កំហុស​ស្រដៀង​គ្នា​នេះ តែ​ចំពោះ​ក្រុម​ឬ​ជន​ដែល​បង្ហាញ​ការ​ប្រឆាំង​ចំពោះ​ថ្នាក់​ដឹកនាំ​រដ្ឋាភិបាល គឺ​ភាគ​ច្រើន​មិន​អាច​រួច​ខ្លួន​នោះ​ឡើយ។

លោក​បាន​បញ្ជាក់ថា៖ «ប្រសិនបើ​សារ​របស់គាត់​គ្រាន់តែ​បញ្ចេញមតិ​តាម​ហ្វេ​ស​ប៊ុ​កដោយ​រិះគន់​ទៅលើ​ការ​ដឹកនាំ​របស់​រដ្ឋាភិបាល ឬ​ក៏​ការ​យកពន្ធ​ស្រូវ​អង្ករ​បែប​ហ្នឹង វា​អត់​មានអី​ជា​បទល្មើស​ទេ ព្រោះ​វា​ជា​រឿង​ធម្មតា ក្នុងប្រទេស​ដែល​កាន់​របប​ប្រជាធិប​តេយ្យ​សេរី។

អ៊ឹ​ចឹ​ង​ក្នុង​របប​ហ្នឹង វា​ចៀស​មិន​ផុតពី​ការ​បញ្ចេញ​មតិ ការ​រិះគន់ ចំពោះ​ការ​ដឹកនាំ​រដ្ឋ​របស់​រដ្ឋាភិបាល។ អ៊ីចឹង​បើ​គ្រាន់​ជាការ​រិះគន់ ហើយ​យើង​ចាត់​ទុក​ថា ជាការ​គំរាម​គំហែង សម្លាប់ ដូច្នេះ​យើង​គួរ​ពិនិត្យ​មើល​ខ្លឹមសារ​ហ្នឹង​ឡើងវិញ តើ​ពាក្យ​ទាំង​អស់​ហ្នឹង​មាន​កម្រិត​ជះ​ឥទ្ធិពល​របៀប​ម៉េច​ប៉ះពាល់​ទៅ​លើ​អាយុ​ជីវិត​របស់​នាយក​រដ្ឋមន្ត្រី»៕

អត្ថបទគួរចាប់អារម្មណ៍