ភ្នំពេញៈ ជនជាប់ចោទម្នាក់បានសារភាព ខណៈគូកនម្នាក់ទៀតបដិសេធនៅសាលាឧទ្ធរណ៍នៅថ្ងៃទី ៤ ធ្នូនេះ ពាក់ព័ន្ធបទចោទជួញដូរគ្រឿងញៀនមេតំហ្វេតាមីនទម្ងន់១៤៥,៩៧ក្រាមនៅភូមិពាណិជ្ជកម្ម សង្កាត់រការធំក្រុងច្បារមន ខេត្តកំពង់ស្ពឺកាលពីថ្ងៃទី២៩កញ្ញា ឆ្នាំ ២០១៧ ។
ជនជាប់ចោទ យី សំបូរ អាយុ ២៦ឆ្នាំ បានប្រាប់ចៅក្រមថា នៅថ្ងៃកើតហេតុ គាត់បានទូរស័ព្ទទៅបុរសម្នាក់ឲ្យយកថ្នាំញៀនមកឲ្យគាត់ ។ បន្ទាប់ពីបានកញ្ចប់គ្រឿងញៀនហើយ ចៃដន្យឈ្មោះ នួន សារិទ្ធឌី អាយុ ២១ឆ្នាំ បានមកផ្ទះរបស់ខ្លួន ដើម្បីហូបបាយ។
ជនជាប់ចោទបន្តថា បន្ទាប់ពីឈ្មោះ នួន សារិទ្ធឌី ហូបបាយរួច រូបគេក៏បោះកញ្ចប់ថ្នាំញៀនឲ្យកាន់ហើយបបួលគ្នាយកទៅប្រគល់ឲ្យម៉ូយនៅមុខសាលាខេត្តកំពង់ស្ពឺ ប៉ុន្តែពេលនោះសមត្ថកិច្ចអាវុធហត្ថបានបើករថយន្តតាមពីក្រោយ ។ ពេលនោះ ដោយភ័យពេក ពួកគេក៏ព្យាយាមបើកម៉ូតូគេចខ្លួន តែដោយស្លន់ស្លោ ពេកឈ្មោះ នួន សារិទ្ធឌី បានលោតចូលក្នុងទឹក តែដោយខ្លួនមិនចេះហែលទឹកក៏ស្រែកឲ្យគេជួយរួមត្រូវសមត្ថកិច្ចចាប់ខ្លួនបានទាំង២នាក់តែម្តង ។
ជនជាប់ប្រាប់ចៅក្រមទៀតថា ពេលនោះសមត្ថកិច្ចអាវុធហត្ថដកហូតបានថ្នាំញៀនពីពួកគេបាន២កញ្ចប់ស្មើ នឹង ទម្ងន់១៤៥,៩៥ ក្រាម ។
ជនជាប់ចោទ សំបូរ និងឈ្មោះ សារិទ្ធឌី បញ្ជាក់ប្រាប់ចៅក្រមថា ៖ « តុលាការខេត្តកំពង់ស្ពឺបានផន្តាទោសពួកខ្ញុំម្នាក់ៗ១២ឆ្នាំនិងពិន័យប្រាក់ម្នាក់ៗ៤លានរៀល។តែខ្ញុំសុំដល់តុលាការឧទ្ធរណ៍កំណត់ទោសខ្ញុំត្រឹម៦ឆ្នាំបានហើយ ហើយខ្ញុំ នួន សារិទ្ធឌី សុំតុលាការដោះលែងខ្ញុំវិញព្រោះខ្ញុំមិនបានប្រព្រឹត្តទេ » ។
លោក ស្រី ព្រះរាជអាជ្ញា យិន សុគន្ធារី តំណាងមហាអយ្យការសន្និដ្ឋានថា ករណីជនជាប់ចោទ ឈ្មោះ យី សំបូរ បានសារភាព ប៉ុន្តែ បើតាមអង្គហេតុគាត់ជាអ្នកប្រព្រឹត្ត ។ ឯឈ្មោះ សារិទ្ធឌី ឆ្លើយថា មិនបានចូលរួម តែការសម្រេចរបស់សាលាដំបូងខេត្តកំពង់ស្ពឺត្រឹមត្រូវហើយ ដូច្នេះលោកស្រី សុំតម្កល់សាលក្រម ទុកជាបានការ ។
លោក ឈី សុជាតិ មេធាវីការពារសិទ្ធិឲ្យជនជាប់ចោទសន្និដ្ឋានថា កូនក្តីលោកម្នាក់ បានទទួលកំហុស ហើយគាត់សុំជាប់ពន្ធនាគារតែ៦ឆ្នាំបានហើយ រីឯកូនក្តីលោកម្នាក់ទៀតគាត់មិនបានចូលរួមជួញដូរថ្នាំញៀនទេ ។
លោកថ្លែងថា៖« កូនក្តីខ្ញុំឈ្មោះ សំបូរ សុំតុលាការត្រឹមជាប់ឃុំ៦ឆ្នាំ ហេតុដូច្នេះសូមតុលាការមេត្តាអនុ-ញ្ញាតឲ្យគាត់ផង។ ឯឈ្មោះ សារិទ្ធឌី សុំតុលាការដោះលែងគាត់វិញ ព្រោះគាត់គ្រាន់តែជិះម៉ូតូជាមួយគ្នា » ។
ក្រោយជំនុំជម្រះប្រមាណជាកន្លះម៉ោង លោក ស៊ិន វិសាល ប្រធានក្រុមប្រឹក្សាជំនុំជម្រះបានថ្លែងថា សាលដីកានេះ នឹងប្រកាសថ្ងៃទី១៧ ខែធ្នូ ខាងមុខ ៕