.jpg)
ក្រុមអ្នកជួយសង្គ្រោះកំពុងសែងសាកសពកម្មករចេញពីគំនរអគារ។ សហការី
ព្រះសីហនុៈ ជនរងគ្រោះជិត ៥០ គ្រួសារ ក្នុងឧបទ្ទវហេតុរលំបាក់អគារនៅខេត្តព្រះសីហនុ ជំរុញឲ្យតុលាការពន្លឿននីតិវិធីស្វែងរកយុត្តិធម៌ដល់ពួកគេ ខណៈទាមទារសំណងជំងឺចិត្តពីក្រុមហ៊ុនចិនក្នុងម្នាក់ៗពី ២ ម៉ឺនដុល្លារដល់ជាង ១០ ម៉ឺនដុល្លារ ផ្អែកលើចំនួនជនរងគ្រោះក្នុងគ្រួសារ បន្ទាប់ពីក្រុមហ៊ុនបានសាងសង់អគារកម្ពស់ ៧ ជាន់ គ្មានច្បាប់អនុញ្ញាតបណ្តាលឲ្យបាក់រលំកាលពីខែមិថុនា។
ក្នុងឧបទ្ទវហេតុរលំបាក់អគារនោះករណីដំបូងបានបណ្តាលឲ្យកម្មករដែលសម្រាកបណ្តោះអាសន្នក្នុងអគារនេះចំនួន ២៨ នាក់ស្លាប់ ក្រោមគំនរបាក់បែក ឯកម្មករចំនួន ២៦ នាក់ផ្សេងទៀត នៅរស់រានមានជីវិត ដោយអ្នកខ្លះ បានជាប់ក្រោមអគារជាង ៤៨ ម៉ោង។
ជនរងគ្រោះម្នាក់ ដែលនៅមានជីវិតក្រោយបាក់រលំអគារចិននេះ លោក អ៊ុក សាវ៉ាត បានប្រាប់ភ្នំពេញប៉ុស្តិ៍ពីម្សិលមិញថា លោករួមទាំងកម្មករចំនួន ៣ នាក់ផ្សេងទៀត ទើបតែបានជួបមន្ត្រីតុលាការនៅពាក់កណ្តាលខែនេះ ដើម្បីបំភ្លឺជុំវិញករណីនេះខណៈក្រុមមេធាវីលោកនាយករដ្ឋមន្ត្រី ហ៊ុន សែន បានជួយការពារក្តីក្នុងការទាមទារសំណងពីក្រុមហ៊ុនចិននោះ។
បុរសវ័យ ៣១ ឆ្នាំ ដែលរៀបរាប់តាមទូរស័ព្ទបង្ហាញពីអារម្មណ៍ភ័យខ្លាច និងលែងហ៊ានធ្វើការជាកម្មករសំណង់បន្តទៀតបាននិយាយថា ក្រោយពីកើតហេតុបែបនេះ ខ្លួនមិនមានការងារធ្វើនោះទេ ព្រោះមិនមានជំនាញអ្វីក្រៅពីធ្វើជាកម្មករសំណង់ ដូច្នេះដើម្បីចិញ្ចឹមជីវិត និងស្វែងរកជំនាញថ្មី ខ្លួនសម្រេចទាមទារសំណងពីក្រុមហ៊ុន ដោយក្នុងម្នាក់ ២ ម៉ឺនដុល្លារ។
លោកបញ្ជាក់ថា៖ «[ខ្ញុំ] ទាមទារសំណងជំងឺចិត្តពី [ការរងគ្រោះ] ហើយយើងអត់មានការងារធ្វើទៀត ព្រោះឲ្យតែឃើញអគារភ័យៗ។ សមត្ថភាពរបស់ខ្ញុំ ធ្លាប់ធ្វើតែសំណង់ តែពេលនេះធ្វើមិនកើតទេ។ បើបាន [លុយ] ពីគេហ្នឹងមក យើងក៏ល្មមបង់ថ្លៃជីវភាព»។
ចំណែកយុវជន ឈុំ ចិនឡាំង ត្រូវជាកូនប្រុសរបស់ប្តីប្រពន្ធ ២ នាក់ ដែលបានស្លាប់ ខណៈប្អូនស្រីម្នាក់របស់ខ្លួនបានជាប់ក្រោមអគារប្រមាណ ២០ ម៉ោង ប្រាប់ភ្នំពេញប៉ុស្តិ៍ពីម្សិលមិញថា ខ្លួន និងប្អូនស្រី ទើបតែបានចូលបំភ្លឺនៅតុលាការ ខេត្តព្រះសីហនុ ប្រមាណ ១០ ថ្ងៃមុនប៉ុណ្ណោះ ជុំវិញសំណុំរឿងនៃការរលំបាក់អគារនេះ ខណៈដែលខ្លួនបានពឹងពាក់មេធាវីលោកនាយករដ្ឋមន្ត្រីហ៊ុន សែនដើម្បីជួយរកយុត្តិធម៌ឲ្យគ្រួសារខ្លួន។
យុវជនវ័យ ២៣ ឆ្នាំ រូបនេះ សង្ឃឹមថា សំណងដែលពួកខ្លួនទាមទារពីក្រុមហ៊ុនចិន ប្រមាណជាង ១០ ម៉ឺនដុល្លារ លើការបាត់បង់ឪពុកម្តាយរបស់ខ្លួន និងប្អូនស្រីស្ទើរតែបាត់បង់ជីវិតដែរនោះ នឹងទទួលបានយុត្តិធម៌ឆាប់ ខណៈខ្លួន ក៏ឃើញជនជាប់ពាក់ព័ន្ធក្នុងការបាក់រលំអគារនេះ ឆាប់ទទួលទោសទណ្ឌតាមច្បាប់ផងដែរ។
ចិនឡាំងបញ្ជាក់ថា៖ «ខ្ញុំក៏ធ្លាប់ធ្វើកន្លែងហ្នឹងដែរ បន្ទាប់មកម៉ាក់ខ្ញុំ ប៉ាខ្ញុំ ប្អូនខ្ញុំ គាត់ធ្វើនៅហ្នឹង គឺមូលហេតុមកពីអគារចិនហ្នឹង បានម៉ាក់ប៉ាខ្ញុំស្លាប់។ ខ្ញុំចង់ទទួលបានយុត្តិធម៌ឆាប់ៗព្រោះថាខ្ញុំតែម្នាក់ឯង ប្អូនខ្ញុំដែលរបួសហ្នឹងមិនទាន់ជាស្រួលបួលទេ ខ្ញុំរត់ឯកសារម្នាក់ឯង ធ្វើអីៗតែម្នាក់ឯង ខ្ញុំពិបាក ខ្ញុំហត់»។
លោកគី តិច ប្រធានក្រុមមេធាវីស្ម័គ្រចិត្តរបស់លោក ហ៊ុន សែន ប្រាប់ភ្នំពេញប៉ុស្តិ៍ពីម្សិលមិញថា រហូតមកដល់ពេលនេះ ក្រុមមេធាវី បានទទួលការពារក្តីដល់ជនរងគ្រោះពីការរលំបាក់អគារចំនួន ៤៨ គ្រួសារ ដោយចែកជា ៣ ក្រុម គឺក្រុមគ្រួសារអ្នកស្លាប់ និងអ្នក របួស ខណៈមាន ៣ គ្រួសារ ដែលជាអ្នករងគ្រោះជុំវិញអគារ ដោយការខូចខាតទ្រព្យសម្បត្តិ។ លោក គី តិច បន្តថា ក្រុមមេធាវីក៏កំពុងបន្តចុះទៅដល់មូលដ្ឋានរបស់សាច់ញាតិ និងជនរងគ្រោះដទៃទៀត ដែលមិនទាន់បានដាក់ពាក្យបណ្តឹងទាមទារសំណង ស្របពេលមានជនរងគ្រោះមួយចំនួនបានបញ្ឈប់ការទាមទាររបស់ពួកគេ ដោយមិនចង់ទាមទារសំណងអ្វីបន្ថែមទៀតនោះទេ ក្រោយទទួលបានប្រាក់ឧបត្ថម្ភពីលោកនាយករដ្ឋមន្ត្រី។
លោកបញ្ជាក់ថា៖ «ជាគោលការណ៍ក្រុមមេធាវីរបស់យើង មិនមានការបង្ខិតបង្ខំនោះទេ ក្នុងការសម្រេចទាមទារសំណងនេះ ដោយគ្រាន់តែពន្យល់ ពិភាក្សាតាមផ្លូវច្បាប់របស់គាត់ទេ។ ចំពោះសំណងដែលបងប្អូនជនរងគ្រោះគាត់ទាមទារគឺមានចំនួនខុសគ្នា ប៉ុន្តែខ្ញុំសុំសរុបជារួមគឺមានទាបបំផុត គឺ ២ ម៉ឺន ហើយច្រើនបំផុត ១២ ម៉ឺនដុល្លារ។ ដោយក្នុង នោះមានអ្នកខ្លះទាមទារប៉ុននេះ មានអ្នកខ្លះទាមទារប៉ុននោះ»។
កាលពីថ្ងៃទី ២៤ ខែ មិថុនា ក្រោយបាក់រលំអគារភ្លាមៗ តុលាការខេត្តព្រះសីហនុ បានចេញដីកា ៤ ផ្សេងគ្នា ដោយសម្រេចឃុំខ្លួនជនជាតិចិន ៤ នាក់ ដែលជាអ្នកទទួលខុសត្រូវលើសំណង់អគារនេះ ដោយ ២ នាក់ ចោទពីបទមនុស្សឃាតដោយអចេតនា បង្កឲ្យមានរបួសដោយអចេតនា និងធ្វើឲ្យខូចខាតដោយចេតនាមានស្ថានទម្ងន់ទោសដោយបង្កការរបួសស្នាមដល់អ្នកដទៃ។
ចំណែកជនសង្ស័យ ២ នាក់ទៀត ចោទពីបទសមគំនិតក្នុងអំពើមនុស្សឃាតដោយអចេតនា សមគំនិតក្នុងអំពើបង្កឲ្យមានរបួសដោយអចេតនា និងសមគំនិតក្នុងការធ្វើឲ្យខូចខាតដោយចេតនាមានស្ថានទម្ងន់ទោសដោយបង្កការរបួសស្នាមដល់អ្នកដទៃ។
លោក លឹម ប៊ុនហេង អ្នកនាំពាក្យតំណាងអយ្យកាអមសាលាដំបូងខេត្តព្រះសីហនុ ប្រាប់ភ្នំពេញប៉ុស្តិ៍យ៉ាងខ្លីថា ករណីនេះ បានបញ្ជូនទៅចៅក្រមហើយ ដូច្នេះ លោកគ្មានអ្វីត្រូវបកស្រាយបន្ថែមទេ។ លោកក៏បានបដិសេធ ធ្វើការអត្ថាធិប្បាយជុំវិញនីតិវិធីបន្តក្នុងការស្វែងរកអ្នកពាក់ព័ន្ធដទៃទៀត។
លោកបញ្ជាក់ថា៖ «នីតិវិធីប្រែប្រួលអីទៀត ទាក់ទងទៅចៅក្រមទៅ ដូចខ្ញុំនិយាយពីខាងដើមអ៊ីចឹង ចោទប្រកាន់ប៉ុណ្ណឹងឯង មើលពីដើមទៅ»។
លោក យឹម ប៊ុណ្ណារ៉េត ប្រធានលេខាធិការដ្ឋានរដ្ឋបាលសាលាដំបូងខេត្តនេះ បានបដិសេធធ្វើការអត្ថាធិប្បាយ ដោយអះអាងថា លោកមិនបានដឹងពីករណីនេះ និងបានបង្វែរសំណួរទៅចៅក្រមស៊ើបសួរផ្ទាល់។
លោកបញ្ជាក់ថា៖ «តែព្រះរាជអាជ្ញាចោទៗហើយ អត់មានប្រែប្រួលក្រៅពីការចោទរបស់ព្រះរាជអាជ្ញានោះទេ។ ទាក់ទងចៅក្រមទៅ ការងារហ្នឹង»។
ភ្នំពេញប៉ុស្តិ៍មិនអាចទាក់ទងលោក សុក ហេង ចៅក្រមស៊ើបសួរនៃសាលាដំបូងខេត្តនេះ ដែលបានចេញដីកាឃុំខ្លួនជនជាតិចិនទាំង ៤ នាក់ ដើម្បីសុំលម្អិតពីព័ត៌មានបន្ថែមបានទេពីម្សិលមិញ។
លោកមេធាវី សុក សំអឿន លើកឡើងថា ក្នុងន័យដែលតុលាការចោទប្រកាន់ជនសង្ស័យមួយករណីក្នុងចំណោម ៣ ករណី ពីបទចេតនាដូច្នេះ សម្រាប់លោកមានន័យថា អ្នកធ្វើអគារមានចេតនាឲ្យអគារហ្នឹងរលំ និងបង្ហាញថាការសាងសង់របស់ជនជាតិចិននេះ គឺមានចេតនាឲ្យអគារហ្នឹងរលំមែន។ ប៉ុន្តែបើសិនមិនស្ថិតក្នុងន័យហ្នឹងទេ ឬគ្រាន់តែក្នុងន័យធ្វេសប្រហែស នោះមិនអាចចោទពីបទធ្វើឲ្យខូចខាតដោយចេតនាបានទេ។
លោកបញ្ជាក់ថា៖ «នៅពេលបទល្មើសមួយរួចផុត អាចនៅបទល្មើសមួយទៀត ព្រោះថា ក្នុងការចោទប្រកាន់ គឺតុលាការ អាចចោទប្រកាន់បានច្រើនករណី ហើយរួមទាំងការដាក់ទោសផងដែរ ដូចជាការស្រូបទោសជាដើម។ ប៉ុន្តែយ៉ាងណា ចំពោះការចោទប្រកាន់របស់តុលាការក្នុងបទល្មើសទាំងនេះ លោកមិនអាចធ្វើការសន្និដ្ឋានបានទេ។
មន្ត្រីសម្របសម្រួលសមាគមការពារសិទ្ធិមនុស្ស អាដហុក ប្រចាំខេត្តព្រះសីហនុ លោកស្រី ជៀប សុធារី មានប្រសាសន៍ថា ការទាមទាររបស់ជនរងគ្រោះ គឺជាសិទ្ធិដែលផ្តល់ឲ្យទៅតាមច្បាប់។
ប៉ុន្តែលោកស្រី ក៏នៅតែទាមទារឲ្យមានការស៊ើបអង្កេតរកអ្នកពាក់ព័ន្ធក្នុងសោកនាដកម្មនេះបន្ថែមទៀត ព្រោះការបណ្តោយឲ្យមានសំណង់អគារខុសច្បាប់ អាចសាងសង់បានដូច្នេះ គឺជាអំពើមួយដែលត្រូវតែបើកការស៊ើបអង្កេតឲ្យបានច្បាស់លាស់ ជាពិសេសអ្នកទទួលខុសត្រូវ។
លោកស្រីក៏បានបញ្ជាក់ផងដែរថា៖ «នៅពេលដែលមានការបើកសវនាការលើសំណុំរឿងនេះ សុំឲ្យមានការជូនដំណឹងជាសាធារណៈ ព្រោះរឿងហ្នឹងអ្នកណាក៏ចង់ដឹងដែរ ហើយវាមិនមែនអាថ៌កំបាំងអីដូចរឿងរដ្ឋប្បវេណីទេ។ គួរតែឲ្យមានការជូនដំណឹងជាសាធារណៈ ហើយនៅពេលបានលទ្ធផលយ៉ាងណាៗ គួរតែអ្នកនាំពាក្យតុលាការហ្នឹង ផ្សព្វផ្សាយឲ្យប្រជាពលរដ្ឋបានដឹងផង»៕
