ភ្នំពេញៈ ទីប្រឹក្សាគណៈកម្មាធិការជាតិគ្រប់គ្រងគ្រោះមហន្តរាយលោក កែវ វី បានអះអាងពីថ្ងៃអាទិត្យថា គិតពីដើមឆ្នាំមកទល់ថ្ងៃទី ២០ ខែកញ្ញា ជនរងគ្រោះដោយសាររន្ទះបាញ់បានកើនដល់ ៩៨ នាក់ ក្នុងនោះ ៦១ នាក់បានស្លាប់ និង ៣៧ នាក់បានរងរបួស ដែលតួលេខនេះរាប់បញ្ចូលទាំងករណីរន្ទះបាញ់ស្លាប់ និងរបួស ១១ នាក់ នៅបាត់ដំបងកាលពីថ្ងៃព្រហស្បតិ៍ផង។
លោកបានបន្តថា ក្រៅពីបង្កឲ្យមនុស្សស្លាប់ និងរងរបួស បាតុភូតរន្ទះបាញ់ក្នុងរយៈពេល ៩ ខែឆ្នាំនេះក៏បានបង្កឲ្យសត្វពាហនៈចំនួន ៥៣ ក្បាលបានងាប់ និងខូចខាតផ្ទះ ១២ ខ្នងផងដែរ។
លោក កែវ វី បានបញ្ជាក់ថា៖ «ករណីរន្ទះបាញ់នៅឆ្នាំនេះ មានលក្ខណៈអាក្រក់បំផុតបើធៀបនឹងឆ្នាំមុនៗ ហើយរហូតមកទល់ពេលនេះគ្មានការសិក្សាណាមួយអាចបកស្រាយអំពីគន្លងផ្លូវនៃបាតុភូតរន្ទះបាននោះទេ»។
កាលពីថ្ងៃព្រហស្បតិ៍ដែលជាថ្ងៃចុងក្រោយនៃពិធីបុណ្យភ្ជុំមានមនុស្សយ៉ាងហោច ៨ នាក់បានស្លាប់ និង ៣ នាក់ទៀតរងរបួសដោយសាររន្ទះបាញ់នៅឃុំព្រែកជីក ស្រុករុក្ខគិរី ខេត្តបាត់ដំបង។ នេះបើតាមនគរបាលមូលដ្ឋាន។
លោក ទូច វិន អធិការរងស្រុករុក្ខគិរីបានប្រាប់ភ្នំពេញប៉ុស្តិ៍ពីថ្ងៃទី ២០ កញ្ញាថា ករណីរន្ទះបាញ់នេះបានកើតឡើង ខណៈក្រុមគ្រួសារ និងសាច់ញាតិជនរងគ្រោះកំពុងបរិភោគអាហារជុំគ្នានៅថ្ងៃចុងក្រោយនៃពិធីបុណ្យភ្ជុំបិណ្ឌដោយមនុស្ស ៦ នាក់ ក្នុងចំណោមគ្នា ១០ នាក់រួមមាន លោក យ៉ុម ញឹក អាយុ ៥៦ ឆ្នាំ មានលំនៅក្នុងភូមិបឹងធ្មួយ ឃុំព្រែកជីកជាម្ចាស់ផ្ទះ និងភរិយាឈ្មោះ ជា សុខណា ព្រមទាំងកូនប្រុសស្រីពួកគាត់ ២ និងសាច់ញាតិ ២ នាក់ទៀតមកពីក្រុងបាត់ដំបងបានស្លាប់ភ្លាមៗនៅនឹងកន្លែង។
ចំណែកមនុស្ស ៤ នាក់ទៀតបានរងរបួស តែម្នាក់ក្នុងចំណោមនោះគឺលោក ហួត ហុង អាយុ ៥៨ ឆ្នាំ មានលំនៅក្នុងក្រុងបាត់ដំបងបានស្លាប់នៅតាមផ្លូវ ខណៈសមត្ថកិច្ចកំពុងជួយដឹកទៅមន្ទីរពេទ្យបង្អែកស្រុកមោងឫស្សី។
លោក វិន បានបន្តថា ក្នុងថ្ងៃដដែលនោះបុរសម្នាក់ឈ្មោះ ឡោ វីរៈ អាយុ ៤៦ ឆ្នាំ រស់នៅភូមិព្រែកតាវេន ក្នុងឃុំព្រែកជីកតែមួយក៏ត្រូវបានរន្ទះបាញ់ស្លាប់ផងដែរ ខណៈគាត់កំពុងដឹកគោត្រឡប់ពីស្រែវិញ។
លោកថា៖ «ករណីរន្ទះបាញ់នៅថ្ងៃនោះពិតជាគួរឲ្យរន្ធត់ណាស់ មនុស្ស ៨ នាក់បានស្លាប់ និង ៣ នាក់ទៀតបានរងរបួសតែក្នុងរយៈពេលមុនក្រោយគ្នាប្រមាណតែ ១៥ នាទីប៉ុណ្ណោះ»។
គួរបញ្ជាក់ផងដែរថា ក្រោយទទួលបានដំណឹងពីករណីរន្ទះបាញ់ស្លាប់មនុស្ស ៨ នាក់ និងរងរបួស ៣ នាក់នេះ លោកឧបនាយករដ្ឋមន្ត្រី ស ខេង រដ្ឋមន្ត្រីក្រសួងមហាផ្ទៃបានផ្ញើសារចូលរួមរំលែកទុក្ខ និងបានឧបត្ថម្ភថវិកាសម្រាប់បុណ្យសពម្នាក់ៗ ៣ លានរៀល និងជួយអ្នករងរបួសម្នាក់ៗ ២ លានរៀល។
នេះបើតាមរបាយការណ៍រដ្ឋបាលខេត្តបាត់ដំបងកាលពីថ្ងៃទី ១៨ ខែកញ្ញា៕