The Phnom Penh Post Search

Search form

Logo of Phnom Penh Post newspaper Phnom Penh Post - ជនរងគ្រោះ​ទារ​សំណង​ ខណៈ​ ឈូក បណ្ឌិត ស្ថិត​ក្នុង​ស្ថានភាព​ល្អ​ប្រសើរ

ជនរងគ្រោះ​ទារ​សំណង​ ខណៈ​ ឈូក បណ្ឌិត ស្ថិត​ក្នុង​ស្ថានភាព​ល្អ​ប្រសើរ

ទណ្ឌិត ឈូក បណ្ឌិត​ចូល​ខ្លួន​មក​សារភាព​នៅ​ក្រសួង​មហាផ្ទៃ​នា​ពេល​កន្លង​មក​​។
ទណ្ឌិត ឈូក បណ្ឌិត​ចូល​ខ្លួន​មក​សារភាព​នៅ​ក្រសួង​មហាផ្ទៃ​នា​ពេល​កន្លង​មក​​។ រូបថត សហការី

ជនរងគ្រោះ​ទារ​សំណង​ ខណៈ​ ឈូក បណ្ឌិត ស្ថិត​ក្នុង​ស្ថានភាព​ល្អ​ប្រសើរ

ស្វាយរៀងៈ ជនរងគ្រោះ​បី​នាក់​ក្នុង​សំណុំ​រឿង​បង្ក​របួស​ស្នាម​ដោយ​ចេតនា​នៅក្នុង​តំបន់​សេដ្ឋកិច្ច​ពិសេស​ក្រុង​បាវិត​ដែល​ប្រព្រឹត្ត​ដោយ​អតីត​អភិបាល​ក្រុង​ ឈូក បណ្ឌិត ​ដ៏​មាន​ឥទ្ធិពល​បាន​​អំពាវនាវ​ឲ្យ​សមត្ថកិច្ច​តុលាការ​មេត្តា​ពន្លឿន​នីតិវិធី​បង្គាប់​ឲ្យ​ជនល្មើស​​ចេញ​ថ្លៃ​សំណង​ចំនួន​ ៣៨ ​លាន​​រៀល​ដល់​ពួកគេ​ស្រប​ពេល​ដែល​​ទណ្ឌិត​រូប​នោះ​កំពុង​ជាប់​ឃុំ​​នៅក្នុង​ពន្ធនាគារ​មាន​​សេរីភាព​ប្រសើរ​ជាង​ទណ្ឌិត​ដទៃ​។

កម្មការិនី​រងគ្រោះ នុត សាខន ដែល​រងរបួស​ដៃ​បាន​ថ្លែង​ថា​ពួក​នាង​ដែល​ជា​ជនរងគ្រោះ​ទាំង​បី​សប្បាយ​ចិត្ត​នៅពេល​​ដែល​ឃើញ​ជនល្មើស​ដែល​ជា​អ្នក​មាន​ឥទ្ធិពល​ត្រូវ​បាន​ចាប់​ឃុំ​ក្នុង​​ពន្ធនាគារ​ប៉ុន្តែ​អ្វី​ដែល​ធ្វើឲ្យ​ពួកនាង​នៅ​មាន​ការ​បារម្ភ​នោះ​គឺ​បញ្ហា​ប្រាក់​សំណង​ដែល​​តុលាការ​បាន​បង្គាប់​ឲ្យ​​ជនល្មើស​សង​មក​លើ​ពួកនាង។ នាង​បាន​ថ្លែង​ថា​៖ «​រហូត​មក​ដល់​ពេល​នេះ​រឿង​ប្រាក់​សំណង​គឺ​ស្ងាត់​ឈឹង​តែ​ម្តង​មិន​មាន​ឃើញ​ខាង​ណា​ទាក់ទង​មក​ពួកខ្ញុំ​សោះ​»។

នាង​បាន​ឲ្យ​ដឹង​ទៀត​ថា​ពួកនាង​សព្វថ្ងៃ​នេះ​នៅ​តែ​មាន​បញ្ហា​​សុខភាព​ដែល​បង្ក​ឡើង​ដោយ​​គ្រាប់​រំសេវ​នោះ​ដដែល​គឺ​តែងតែ​ឈឺ និង​បាន​សុំ​ច្បាប់​ពី​កន្លែង​ធ្វើការ​ជា​ញឹកញាប់​​ដូច្នេះ​ពួកនាង​សូម​ឲ្យ​តុលាការ​មេត្តា​ជួយ​ពន្លឿន​នីតិវិធី​ដើម្បី​ឲ្យ​ពួកនាង​បាន​ប្រាក់​ដើម្បី​យក​មក​ព្យាបាល​ជំងឺ​។

នាង​បាន​ឲ្យ​ដឹង​ទៀត​ថា៖ «​យុត្តិធម៌​បាន​រកឃើញ​ហើយ​តែ​បញ្ហា​សំណង​នៅ​ដដែល​បើ​ទោះបី​ជា​ពួកខ្ញុំ​មិន​ពេញ​ចិត្ត​សំណង​នោះ​តែ​ពួកខ្ញុំ​មិន​ចង់​បាន​យក​ទៅ​ធ្វើអ្វី​នោះ​ទេ​គឺ​គ្រាន់តែ​ដើម្បី​ទុក​ទិញ​ថ្នាំ​ព្យាបាល​ខ្លួន​តែ​ប៉ុណ្ណោះ​»។

ចំណែកឯ​កម្មការិនី កែវ នា បាន​ថ្លែង​ឲ្យ​ដឹង​ថា​ពួកនាង​សព្វថ្ងៃ​មិន​សូវ​ចេះ​ដឹង​ខាង​ច្បាប់​នោះ​ទេ​ដូច្នេះ​នាង​សុំ​អំពាវនាវ​ឲ្យ​តុលាការ​ដែល​ធ្វើការ​ផ្នែក​ច្បាប់​នោះ​មេត្តា​ធ្វើ​យ៉ាង​​ណា​បង្គាប់​ឲ្យ​ ឈូក បណ្ឌិត សង​ប្រាក់​ដែល​តុលាការ​បាន​​កំណត់​នោះ​មក​ឲ្យ​ពួកនាង​​ដើម្បី​បាន​យក​ទៅ​ទិញ​ថ្នាំ​។ នាង​​បាន​ថ្លែង​ថា៖ «​ខ្ញុំ​មិន​ដឹង​ធ្វើ​ម៉េច​ទេ​គឺ​រង់ចាំ​ដំណឹង​តែ​ពី​ខាង​តុលាការ​​តែ​ប៉ុណ្ណោះ​»​។

គួរ​រំឭក​ផង​ដែរ​ថា​លោក ឈូក បណ្ឌិត ត្រូវ​បាន​សាលា​ដំបូង​ខេត្ត​ស្វាយរៀង​កាត់​ទោស​ដាក់​ពន្ធនាគារ ១ ​ឆ្នាំ​ ៦ ​ខែ និង​ពិន័យ​ជា​ប្រាក់​ចំនួន ៣៨ ​លាន​រៀល​ជា​សំណង​ដល់​​ជនរងគ្រោះ​ក្នុង​បទ​បង្ក​របួស​ស្នាម​ដោយ​អចេតនា។ ការ​ចោទប្រកាន់​នេះ​ធ្វើ​ឡើង​បន្ទាប់ពី​លោក ឈូក បណ្ឌិត ត្រូវ​បាន​គេ​រកឃើញ​ថា​បាន​បាញ់រះ​ធ្វើឲ្យ​កម្មការិនី​រោងចក្រ​ស្បែក​ជើង​កៅវ៉េ (Kaoway) ក្នុង​ក្រុង​បាវិត ចំនួន ៣ ​នាក់​រងរបួស​ក្នុង​ពេល​ពួកគេ​តវ៉ា​ទាមទារ​លក្ខខណ្ឌ​ការងារ​ល្អ​កាលពី​ថ្ងៃ​ទី​ ២០ ខែ​កុម្ភៈ ឆ្នាំ​ ២០១២។ ប្រាក់ ៣៨ ​លាន​រៀល​នោះ​ត្រូវ​បង់​ទៅ​ឲ្យ​កម្មការិនី កែវ នា ចំនួន ៨ ​លាន​រៀល នុត សាខន ចំនួន ១០ ​លាន​រៀល និង ប៊ុន ចិន្តា ចំនួន ២០ ​លាន​រៀល។

ទាក់ទង​នឹង​សំណង​នេះ​ដែរ​អ្នកស្រី សារី បុត្រចរិយា មេធាវី​ការពារ​ឲ្យ​កម្មការិនី​ទាំង​បី​នាក់​បាន​ថ្លែង​ថា​យើង​​មិន​អាច​ធ្វើ​អ្វី​លឿន​តាម​ចិត្ត​បាន​នោះ​ទេ​គឺ​អ្នកស្រី​កំពុង​រង់ចាំ​លិខិត​បញ្ជាក់​សាល​ដីកា​ស្ថាពរ​របស់​តុលាការ​កំពូល។ អ្នកស្រី​ថា៖ «មុន​នឹង​ឈាន​ដល់​ការ​ដាក់​បណ្ដឹង​សុំ​អនុវត្ត​ទាមទារ​សំណង​នៅ​សាលា​ដំបូង​ខេត្ត​ស្វាយរៀង​លុះត្រា​តែ​យើង​មាន​លិខិត​បញ្ជាក់​សាល​ដីការ​ស្ថាពរ​របស់​តុលាការ​កំពូល»​​។

ទាក់ទិន​ទៅ​នឹង​​បញ្ហា​ឃុំ​ខ្លួន​នេះ​លោក នុត បូពិណ្ណរ័ត្ន មន្ត្រី​សម្របសម្រួល​នៃ​​អង្គការ​សិទ្ធិមនុស្ស​លីកាដូ ប្រចាំ​ខេត្ត​ស្វាយរៀង​ដែល​ធ្លាប់​បាន​ចូល​ទៅ​​មើល​ស្ថានភាព​រស់នៅ​របស់​លោក ឈូក បណ្ឌិត ក្នុង​ពន្ធនាគារ​​នោះ​ឲ្យ​ដឹង​ថា​ទណ្ឌិត​ដែល​​ធ្លាប់​​មាន​ឥទ្ធិពល​រូប​នេះ​អាច​ចេញ​ពី​ក្នុង​បន្ទប់​ឃុំឃាំង​​បាន​ច្រើន​ជាង​គេ​។

លោក​បាន​ថ្លែង​ថា៖ «បើ​ទោះបី​ជា​គាត់​ជាប់​ពន្ធនាគារ​គាត់​នៅ​តែ​មាន​ឥទ្ធិពល​ពីព្រោះ​យើង​មើល​​តាំងពី​នៅ​កន្លែង​តុលាការ​គឺ​គាត់​ជា​ទណ្ឌិត​នៅ​តែ​មាន​គេ​ចាក់​ទឹក​តែ​ឲ្យ​ផឹក​មក​ដល់​គុក​គាត់​អាច​ចេញ​មក​បណ្ណាល័យ​ ១ ​ថ្ងៃ​ពេញ​ដែល​ផ្ទុយ​ពី​អ្នក​ទោស​ដទៃ​គឺ​បើ​ចេញ​ពេល​ព្រឹក​ត្រូវ​ចូល​បន្ទប់​នៅពេល​ល្ងាច​ដើម្បី​ដោះដូរ​អ្នកទោស​ដទៃ​លើកលែង​តែ​អ្នក​ទោស​ស្ត្រី​ទើប​អាច​នៅ​ពេញ​មួយ​ថ្ងៃ​បាន​។ ដូច្នេះ​គាត់​នៅ​តែ​ស្ថានភាព​ប្រសើរ»។

លោក សួស សាខូ ប្រធាន​ពន្ធនាគារ​ខេត្ត​ស្វាយរៀង​មាន​ប្រសាសន៍​ថា​លោក ឈូក បណ្ឌិត គឺ​ត្រូវ​រស់​នៅក្នុង​បន្ទប់​ទំហំ ៥ ​ម៉ែត្រ​គុណ​នឹង ៦ ​ម៉ែត្រ ដាក់​អ្នកទោស​សរុប ៣០ ​នាក់ ដូច​គេ​ដូច​ឯង។

លោក​​បាន​ថ្លែង​ថា៖ «រឿង​អាន​សៀវភៅ​នៅ​បណ្ណាល័យ​គឺ​អ្នកទោស​ណា​ក៏​អាច​មើល​បាន​ដែរ»។

កាលពី​ថ្ងៃ​ទី​ ៨ ខែ​សីហា ឆ្នាំ​ ២០១៥ លោក​ ឈូក បណ្ឌិត បាន​ដើរ​ចូល​មក​សារភាព​ដោយ​​ខ្លួនឯង​បន្ទាប់​ពី​លោក​នាយករដ្ឋមន្ត្រី​បាន​ថ្លែង​នៅ​​ថ្ងៃ​​ទី​ ៣ ខែ​សីហា ឆ្នាំ​ ២០១៥​ ក្នុង​ឱកាស​សម្ពោធ​ដាក់​ឲ្យ​ដំណើរការ​ស្ពាន​មិត្តភាព​កម្ពុជា ចិន តាខ្មៅ ថា៖ «នគរបាល​ត្រូវ​តែ​តាម​ចាប់​ខ្លួន​លោក ឈូក បណ្ឌិត។ រឿង​ ឈូក បណ្ឌិត បើ​ប៉ូលិស​មិន​តាម​ចាប់​ខ្លួន​ទេ​គឺ​ប៉ូលិស​ខុស​»៕

អត្ថបទគួរចាប់អារម្មណ៍