កណ្តាល៖ ជនសង្ស័យចាក់សម្លាប់ក្មេងស្រីជាសិស្សសាលាម្នាក់ ត្រូវបានសមត្ថកិច្ចនគរបាលខេត្តកណ្តាល ចាប់ខ្លួនបាននៅថ្ងៃអង្គារនេះ ប៉ុន្មានម៉ោងក្រោយពីបានប្រព្រឹត្តនៅភូមិព្រែកហូរកើត សង្កាត់ព្រែកហូរ ក្រុងតាខ្មៅ។
លោក ចៅ វុទ្ធី ប្រធានការិយាល័យព្រហ្មទណ្ឌកម្រិតធ្ងន់ខេត្តកណ្តាលប្រាប់នៅថ្ងៃអង្គារនេះ ថា ជនសង្ស័យឈ្មោះ ទូច សុជាតិ ហៅម៉ាប់ អាយុ ៤១ ឆ្នាំ រីឯក្មេងស្រីរងគ្រោះឈ្មោះផេង បញ្ញា អាយុ ១៨ ឆ្នាំ ជាសិស្សសាលា។ ទាំងក្មេងស្រីរងគ្រោះនិងជនល្មើសស្នាក់នៅបន្ទប់ជួលជាប់គ្នាស្ថិតនៅទីតាំងខាងលើ។
លោកបន្តថា ជនសង្ស័យកំពុងត្រូវបានសមត្ថកិច្ចជំនាញរបស់លោក សាកសួរពាក់ព័ន្ធនឹងអំពើឃាតកម្មនេះហើយក៏កំពុងត្រួតមើលទឹកនោមរបស់ជនសង្ស័យរកសារធាតុញៀន ព្រោះក្រែងជនសង្ស័យរូបនេះប្រើប្រាស់គ្រឿងញៀន។ ជនសង្ស័យបានចាប់ក្មេងស្រីរងគ្រោះរំលោភសេពសន្ថវៈបានសម្រេច កាលពីប៉ុន្មានថ្ងៃ មុនកើតហេតុ ហើយជនល្មើសសម្លាប់ជនរងគ្រោះដើម្បីបំបិទមាត់។
លោកថ្លែងថា៖ «សមត្ថកិច្ចជំនាញខ្ញុំ កំពុងសួរចម្លើយជនសង្ស័យ នៅស្នងការដ្ឋាននគរបាលខេត្តកណ្តាល។ ចំពោះហេតុផលពីចម្លើយជនល្មើសនៅមិនទាន់ប្រមូលអស់នៅឡើយទេ»។
ពាក់ព័ន្ធអំពើឃាតកម្មនេះ លោកឯម ចាន់រ៉ាត់ នាយប៉ុស្តិ៍នគរបាលសង្កាត់ព្រែកហូរប្រាប់ នៅថ្ងៃនេះដែរថា ក្មេងរងគ្រោះជាកូនបងហើយមានប្អូនប្រុសតូចៗ ២ នាក់ទៀត ដែលមានឪពុកជាកម្មករសំណង់ រីឯម្តាយលក់បន្លែ។ ចំណែកជនសង្ស័យមានបងប្អូន ៣ នាក់ ប៉ុន្តែពួកគេគ្មានម្តាយឪពុកទេ និងជួលបន្ទប់ស្នាក់នៅក្បែរបន្ទប់ក្មេងស្រីរងគ្រោះដែរ។
លោកបន្តតាមសម្តីក្មេងប្រុសឈ្មោះផេងរិន ណារុង អាយុ ១០ ឆ្នាំ ជាប្អូនរបស់ជនរងគ្រោះថា មុនពេលកើតហេតុប្រហែលជាម៉ោងជាង៦កន្លះព្រឹកថ្ងៃទី ៥ ខែ មករា ឆ្នាំ ឪពុកម្តាយគេបានចេញពីផ្តះអស់នៅសល់តែខ្លួន (ក្មេងប្រុស) និងបងស្រីនៅក្នុងបន្ទប់ជួលតែ ២ នាក់។ ពេលនោះជនរងគ្រោះបានប្រើរូបគេឲ្យទៅទិញបាយក្តាំងហូប ហើយជនសង្ស័យឲ្យលុយមកគេចំនួន ៥០០ រៀល ដើម្បីទិញបារីឲ្យជនសង្ស័យជក់។
លោកបន្តថា ក្រោយពីទិញបារីរួចមកក្មេងប្រុសបានត្រឡប់មកបន្ទប់វិញ ក៏ឃើញជនសង្ស័យកំពុងឈរនៅមុខបន្ទប់ជួលរបស់ខ្លួន ហើយប្អូនប្រុស របស់ជនរងគ្រោះបានហុចបារីឲ្យជនសង្ស័យ។ គ្រានោះ ប្អូនរបស់ជនរងគ្រោះ បានឃើញបងស្រីរបស់ខ្លួនដេកនៅលើពូកក្នុងបន្ទប់ជួលរបស់គេដោយមានឈាមជោគខ្លួនហើយបានប្រាប់ឲ្យជនសង្ស័យយកបងស្រីខ្លួនទៅពេទ្យ។
បើតាមលោកឯម ចាន់រ៉ាត់ថា នៅពេលនោះគេបានឃើញជនសង្ស័យបីជនរងគ្រោះដើរទៅរកពេទ្យភូមិនៅក្បែរនោះដែរ តែដោយគ្រូពេទ្យឃើញសភាពរបួសធ្ងន់ធ្ងរពេកទើបដេញជនសង្ស័យឲ្យទៅមន្ទីរពេទ្យបង្អែកក្រុងតាខ្មៅ។ ប៉ុន្តែជនរងគ្រោះបានដាច់ខ្យល់ស្លាប់ពេលបញ្ជូនដល់មន្ទីរពេទ្យជ័យជំនះ។
លោកថ្លែងថា៖ «ដំបូងអ្នកភូមិឃើញជនសង្ស័យបីជនរងគ្រោះដែរ តែគេមិនចាប់អារម្មណ៍ថាជាជនល្មើស។ ក្រោយមកទើបសមត្ថកិច្ចហៅជនសង្ស័យមកសាកសួរទើបដឹងថាជននោះជាអ្នកសម្លាប់ក្មេងស្រីរងគ្រោះ»។
លោកបញ្ជាក់ថា តាមចម្លើយរបស់ជនសង្ស័យបានសារភាពថា រូបគេបានចាប់ក្មេងស្រីរងគ្រោះរំលោភសេពសន្ថវៈតាំងពី ២ ទៅ ៣ ថ្ងៃ មុនថ្ងៃចាក់សម្លាប់ជនរងគ្រោះទៅទៀត។ តែដោយជនសង្ស័យខ្លាចក្មេងរងគ្រោះយករឿងនេះទៅនិយាយប្រាប់ឪពុកម្តាយនាង ទើបនៅព្រឹកថ្ងៃទី ៥ មករា ជនសង្ស័យក៏រៀបចំគម្រោងសម្លាប់ជនរងគ្រោះតែម្តងទៅ។
បើតាមការធ្វើកោសល្យវិច័យពីសមត្ថកិច្ចជំនាញឃើញថា ក្មេងស្រីរងគ្រោះត្រូវបានជនល្មើសចាក់ត្រូវចុងដង្ហើម ១ កន្លែង នៅត្រង់ក្បាលពោះពី ១ ទៅ ២ កន្លែងទៀតដោយកាំបិតចុងស្រួច៕