.jpg)
ស្វាយរៀងៈ នគរបាលព្រហ្មទណ្ឌកម្រិតធ្ងន់នៃស្នងការដ្ឋាននគរបាលខេត្តស្វាយរៀងបានកសាងសំណុំរឿងបញ្ជូនបុរសជាជនសង្ស័យម្នាក់ទៅសាលាដំបូងខេត្តនៅថ្ងៃអង្គារនេះបន្ទាប់ពីសមត្ថកិច្ចចាប់ខ្លួនករណីកាប់ប្អូនប្រុសបង្កើតស្លាប់ នៅភូមិព្រៃរកា ឃុំដូនស ស្រុកស្វាយជ្រំ ខេត្តស្វាយរៀង កាលពីថ្ងៃទី ២៧ ខែមករា។
លោក គឹម ឡៃ នាយការិយាល័យព្រហ្មទណ្ឌកម្រិតធ្ងន់ខេត្តបានប្រាប់ថា ជនសង្ស័យមានឈ្មោះលី សារ៉ាត អាយុ ៣១ ឆ្នាំ។ រីឯបុរសរងគ្រោះ ឈ្មោះ លី សារឿង អាយុ ២៧ ឆ្នាំ ពួកគេរស់នៅភូមិ-ឃុំកើតហេតុខាងលើ។ លោកបន្តថា សមត្ថកិច្ចបានបញ្ចប់ការសាកសួរជនសង្ស័យរួចហើយ ហើយត្រូវបញ្ជូនបន្តទៅសាលាដំបូងខេត្តនៅថ្ងៃអង្គារនេះ។
លោកថា៖ «ចំពោះជនសង្ស័យខ្ញុំនឹងបញ្ជូនគាត់ទៅតុលាការនៅថ្ងៃស្អែក (ថ្ងៃទី ២៩ មករា) នេះហើយ ដើម្បីចាត់ការតាមនីតិវិធីច្បាប់បន្តទៀត»។
ជុំវិញអំពើឃាតកម្មនេះដែរ លោក ពិន អាន អធិការនគរបាលស្រុកស្វាយជ្រុំប្រាប់ភ្នំពេញប៉ុស្តិ៍ដោយផ្អែកតាមសម្តីសាច់ញាតិជនរងគ្រោះថា រវាងជនសង្ស័យ និងជនរងគ្រោះជាបងប្អូនបង្កើតនឹងគ្នា ប៉ុន្តែជនរងគ្រោះបានធ្វើចំណាកស្រុកទៅរកការងារធ្វើនៅរាជធានីភ្នំពេញដោយមិនសូវទៅស្រុកកំណើតទេ។ ប៉ុន្តែនៅថ្ងៃកើតហេតុទី ២៧ មករាជនរងគ្រោះបានមកលេងស្រុកកំណើតហើយមានបំណងចេញទៅរាជធានីភ្នំពេញវិញនៅល្ងាចថ្ងៃដដែល ប៉ុន្តែចៃដន្យក៏មានរឿងបែបនេះកើតឡើងទៅ។
លោកបន្តថា មូលហេតុដំបូងដោយសារជនរងគ្រោះបានសុំលុយម្តាយ ២ ម៉ឺនរៀល ហើយត្រូវជនសង្ស័យស្ដីឲ្យថា មកពេលណាក៏ឃើញតែសុំលុយម្តាយ មិនឃើញឲ្យលុយគាត់ទេ។ ពេលនោះពួកគេក៏ឈ្លោះគ្នាហើយក៏ត្រូវជនសង្ស័យស្ទុះទៅទាញកាំបិតកកុកកាប់ជនរងគ្រោះត្រូវកញ្ចឹងកដួលស្លាប់នៅកន្លែងកើតហេតុតែម្តង។
លោកបានបញ្ជាក់ថា៖ «រឿងវាឈ្លោះគ្នានេះគ្មានរឿងអីធំដុំទេដោយសារតែលុយ ២ ម៉ឺនរៀលប៉ុណ្ណោះ ហើយករណីនេះមិនមែនជាការប្រើអំពើហិង្សាទេគឺជារឿងឃាតកម្មសុទ្ធសាធ»។
លោកបានបន្តថា ក្រោយបង្កហេតុ ជនសង្ស័យបានព្យាយាមរត់គេចខ្លួនតែត្រូវសមត្ថកិច្ចរបស់លោកចាប់បានមកវិញ ហើយបានបញ្ជូនទាំងមនុស្ស និងកំណត់ហេតុរួមទាំងវត្ថុតាងបន្តទៅស្នងការដ្នាននគរបាលខេត្តស្វាយរៀងនៅព្រឹកថ្ងៃទី ២៨ ខែមករា៕
