.jpg)
ជនសង្ស័យត្រូវសមត្ថកិច្ចឃាត់ខ្លួន កាលពីថ្ងៃទី ៦ មេសា។ រូបថត ប៉ូលិស
បាត់ដំបង៖ បុរសសង្ស័យពាក់ព័ន្ធឃាតកម្មសម្លាប់ប្រពន្ធខ្លួនឯងដោយសាររឿងប្រចណ្ឌ ត្រូវបានសមត្ថកិច្ចនគរបាលខេត្តបាត់ដំបងបញ្ជូនទៅតុលាការខេត្តពីម្សិលមិញ បន្ទាប់ពីទទួលបានសំណុំរឿងនេះ ពីអធិការដ្ឋាននគរបាលក្រុងបាត់ដំបង ក្នុងករណីឃាតកម្មកើតឡើងនៅក្នុងបន្ទប់ជួលមួយកន្លែង កាលពីថ្ងៃទី ៤ មេសា។
លោក លឹម ពុទ្ធីឡា ស្នងការរងទទួលផែនការងារនគរបាលព្រហ្មទណ្ឌ នៃស្នងការដ្ឋាននគរបាលខេត្តបាត់ដំបង ប្រាប់ ភ្នំពេញ ប៉ុស្តិ៍ ពីម្សិលមិញថា សមត្ថកិច្ចនគរបាលខេត្តបាត់ដំបង បានបញ្ជូនជនសង្ស័យម្នាក់ពាក់ព័ន្ធករណីឃាតកម្មសម្លាប់ប្រពន្ធខ្លួនឯង ទៅអយ្យការអមសាលាដំបូងហើយ នៅព្រឹកថ្ងៃទី ៨ ខែមេសា បន្ទាប់ពីបានទទួលសំណុំរឿងពីអធិការនគរបាលក្រុងកាលពីល្ងាចថ្ងៃទី ៧ ខែមេសា។
លោកថ្លែងថា៖ «ព្រោះបន្ទាប់ពីទទួលសំណុំរឿងពីអធិការនគរបាលក្រុង កម្លាំងជំនាញបានធ្វើការត្រួតពិនិត្យ និងបានបញ្ជូនជនសង្ស័យទៅតុលាការហើយនៅព្រឹកនេះ»។
លោក ឆាង វណ្ណឆៃ អធិការនគរបាលក្រុងបាត់ដំបងថ្លែងថា នគរបាលក្រុងបាត់ដំបងបានឃាត់ខ្លួនជនសង្ស័យម្នាក់នៅថ្ងៃទី ៦ មេសា ដើម្បីធ្វើការសាកសួរ បន្ទាប់ពីពលរដ្ឋរាយការណ៍ថា មានករណីឃាតកម្មបណ្តាលឲ្យមនុស្សស្លាប់ក្នុងបន្ទប់ជួលស្ថិតក្នុងក្រុមទី១ ភូមិរំចេក ៣ សង្កាត់រតនៈ ក្រុងបាត់ដំបងដោយមិនដឹងមូលហេតុ។
លោកបញ្ជាក់ថា នៅល្ងាចថ្ងៃទី ៧ មេសា សមត្ថកិច្ចបានបញ្ជូនសំណុំរឿងទៅស្នងការដ្ឋាននគរបាលខេត្តចាត់ការបន្ត។
តាមការបញ្ជាក់របស់លោក វណ្ណឆៃ សមត្ថកិច្ចបានស្រាវជ្រាវដឹងថាជនសង្ស័យឈ្មោះ ប៉ុល ប៊ុនធឿន ភេទប្រុស អាយុ ៤០ ឆ្នាំ មានទីលំនៅផ្ទះជួលស្ថិតនៅភូមិរំចេក ៣ សង្កាត់រតនៈ ក្រុងបាត់ដំបង ត្រូវជាប្តីរបស់ស្ត្រីរងគ្រោះឈ្មោះ សេង វ៉េត ហៅ ស អាយុ ៣៩ ឆ្នាំ។
លោកថ្លែងថា៖ «នៅចំពោះមុខសមត្ថកិច្ចនគរបាល បុរសជាប្តីឈ្មោះ ប៉ុល ប៊ុនធឿន បានឆ្លើយសារភាពថា គាត់ពិតជាបានសម្លាប់ស្រី្តជាប្រពន្ធរបស់គាត់កាលពីថ្ងៃទី ៤ ខែ មេសា ឆ្នាំ ២០២១ នាវេលារំលងអធ្រាត្រដោយការវាយដំលើផ្ទៃមុខ និងច្របាច់ករហូតដល់ស្លាប់»។
លោក វណ្ណឆៃ ថ្លែងទៀតថា មូលហេតុដែលនាំឲ្យជនសង្ស័យសម្លាប់ប្រពន្ធខ្លួនឯង កើតឡើងដោយសារតែការប្រចណ្ឌ។
មន្ត្រីនគរបាលរូបនេះបញ្ជាក់ថា៖ «មូលហេតុដែលឈានដល់ការសម្លាប់ប្រពន្ធបែបនេះ គឺដោយសារប្រពន្ធគាត់តែងតែជេរប្រមាថគាត់នៅពេលខឹង ហើយតែងតែទូរស័ព្ទទៅរកប្តីមុន (អតីតស្វាមី) របស់គាត់ និងនិយាយសរសើរប្តីមុននៅចំពោះមុខគាត់ជាញឹកញយពេក»។
តាមការរៀបរាប់របស់ជនសង្ស័យ ជនសង្ស័យ និងស្រី្តរងគ្រោះទើបនឹងបានគ្នាជាប្តីប្រពន្ធក្នុងរយ:ពេលតែជាង ១ ឆ្នាំប៉ុណ្ណោះ ហើយស្រ្តីជាប្រពន្ធមានទីលំនៅឯខេត្កកណ្តាល។ អ្នកទាំង ២ បានគ្នាក្នុងពេលធ្វើកម្មកររោងចក្រនៅខេត្តតាកែវជាមួយគ្នា និងទើបមកជួលបន្ទប់ស្នាក់នៅទីនេះក្នុងអំឡុងខែមីនា ឆ្នាំ ២០២១ តែប៉ុណ្ណោះ។ នេះបើតាមការបញ្ជាក់របស់លោក វណ្ណឆៃ។
អ្នកនាំពាក្យអយ្យការអមសាលាដំបូងខេត្តបាត់ដំបង លោក ផាន់ រតនា មិនអាចទាក់ទងសុំអត្ថាធិប្បាយបានទេ ពីម្សិលមិញ៕
