.jpg)
ជនសង្ស័យជាជនជាតិខ្មែរនិងវៀតណាមចំនួន ៥នាក់ ត្រូវបានចាប់ខ្លួនជាបន្តបន្ទាប់ ពាក់ព័ន្ធនឹងការជួញដូរគ្រឿងញៀនជាង ១១ គីឡូក្រាម។ រូបថត ប៉ូលិស
ស្វាយរៀងៈ ជនសង្ស័យជាជនជាតិខ្មែរនិងវៀតណាមចំនួន ៥នាក់ កំពុងត្រូវបានតុលាការខេត្តស្វាយរៀងសាកសួរ នៅថ្ងៃទី១០ ឧសភា ពាក់ព័ន្ធនឹងការជួញដូរគ្រឿងញៀនជាង ១១ គីឡូក្រាម។
ជនសង្ស័យទាំង ៥ នាក់នេះ ត្រូវបានចាប់ខ្លួនកាលពីថ្ងៃទី ៥-៦ ឧសភា នៅខេត្តស្វាយរៀង នៅរាជធានីភ្នំពេញ និងនៅខេត្តកណ្តាល។
លោក កែវ សុថា ស្នងការរងទទួលការងារផែនប្រឆាំងគ្រឿងញៀនខេត្ត ស្វាយរៀង ឱ្យដឹងនៅថ្ងៃទី ១០ ឧសភា ថា ជនសង្ស័យទី១-ឈ្មោះ ហ៊ួ តឹក ភេទប្រុស អាយុ ៥៩ឆ្នាំ ទី២- ឡេ យ៊ាំងគួ ភេទប្រុស អាយុ ៤៥ឆ្នាំ ទី៣- ង្វៀង ថាន់លីន អាយុ ៣៨ឆ្នាំ ពួកគេជាជនជាតិវៀតណាម។ ទី៤- ហេង សុវត្ថា ភេទប្រុស អាយុ ៣៩ឆ្នាំ និង នុត ប៊ុនធឿន ភេទប្រុស អាយុ ៥៦ឆ្នាំ។ ពួកគេខ្លះរស់នៅក្នុងរាជធានីភ្នំពេញ ខ្លះរស់នៅ ស្រុកមុខកំពូល ខេត្តកណ្តាល និង រស់នៅខេត្តស្វាយរៀង។
លោកថ្លែងថា៖«យើងបានបញ្ជូនពួកគេដល់តុលាការហើយ ហើយខាងអយ្យការលោកកំពុងធ្វើការសាកសួរ នៅឡើយនៅថ្ងៃទី ១០ ឧសភា»។
លោកបន្តថា៖ «ជានីតិវិធី ពេលអយ្យការសួរចប់បញ្ជូនជននោះបន្តទៅចៅក្រមស៊ើបសួរ ហើយបើចៅក្រមស៊ើបសួរ ចេញដីកាឃុំ គឺតុលាការប្រគល់ឱ្យយកជនទាំងនោះទៅឃុំនៅក្នុងពន្ធនាគារតែម្តង»។
បើតាមលោក សុថា គ្រឿងញៀនដែលសមត្ថកិច្ចរឹបអូសបានពីក្រុមជនសង្ស័យមានចំនួនជាង ១១ គីឡូក្រាម។ ក្នុងនោះថ្នាំញៀនប្រភេទ មេតំហ្វេតាមីន មានជាង ៩គីឡូក្រាម គ្រឿងញៀនប្រភេទ កេតាមីន មានចំនួនជាង ១គីឡូក្រាម។
លោកប្រាប់ថា ប្រតិបត្តិការនេះ សមត្ថកិច្ចរបស់លោកបានសហការជាមួយមន្ទីរប្រឆាំងគ្រឿងញៀន និងមានការសម្របសម្រួលផ្លូវច្បាប់ពីសាលាដំបូងខេត្តស្វាយរៀង និង សាលាដំបូងរាជធានីភ្នំពេញ។
លោកថា ដំបូងចាប់ជនសង្ស័យឈ្មោះ ហ៊ួ តឹក នៅចំណុចគោលដៅត្រួតពិនិត្យការអនុវត្តច្បាប់ចរាចរណ៍ ស្ថិតក្នុងភូមិធ្លក ឃុំក្រោលគោ ស្រុកស្វាយជ្រំ ខេត្ត ស្វាយរៀង។ ពេលចាប់នោះមានរថយន្ត ១គ្រឿងម៉ាក CRV រួមនឹងថ្នាំញៀន ១០កញ្ចប់ធំ។ បន្ទាប់មកចាប់បានជន ២ នាក់ទៀតនៅស្រុក កំពង់រោទ៍ ខេត្តស្វាយរៀង។
លោកបន្តទៀតថា ក្រោយពីសមត្ថកិច្ចចាប់ជនសង្ស័យ ៣ នាក់ខាងលើ ហើយក៏បន្តមករាជធានីភ្នំពេញ ដោយឃាត់ខ្លួនបានម្នាក់ និងនៅស្រុក មុខកំពូល ឃាត់បានម្នាក់។ ពួកគេជាមុខសញ្ញាដឹកគ្រឿងញៀនឆ្លងដែនទៅប្រទេសវៀតណាម។
លោកបញ្ជាក់ថា៖ «ចំពោះមេខ្លោង សមត្ថកិច្ចខ្ញុំកំពុងសុំដីកាពីតុលាការ ដើម្បីស្វែងរកចាប់ខ្លួន ព្រោះយើងកំណត់អត្តសញ្ញាណបានអស់ហើយ»។
ដោយឡែក នៅឯខេត្តបាត់ដំបងនៅរសៀលថ្ងៃនេះ សមត្ថកិច្ចអាវុធហត្ថខេត្តបានកសាងសំណុំរឿងបញ្ជូនបុរសម្នាក់ទៅសាលាដំបូងខេត្ត ពាក់ព័ន្ធនឹងការរក្សាទុកកាំភ្លើងខុសច្បាប់។
លោក ថាច វ៉ាន់ ប្រធានការិយាល័យប្រឆាំងបទល្មើសខេត្តបាត់ដំបង ប្រាប់នៅថ្ងៃទី១០ ឧសភា ថា ជនសង្ស័យឈ្មោះសាំ សុខបញ្ញាវ័ន្ត អាយុ ២៥ឆ្នាំ ជាជាងដែករស់នៅភូមិចំការឫស្សី សង្កាត់ព្រែកព្រះស្ដេច ក្រុង បាត់ដំបង ខេត្តបាត់ដំបង។
លោកថ្លែងថា៖«រឿងនេះ ខ្ញុំបានចាត់បញ្ជូនជនម្នាក់នោះទៅតុលាការដើម្បីឱ្យច្បាប់អនុវត្តបន្តហើយ»។
ចំពោះវត្ថុតាងរួមមានកាំភ្លើង M ១៦ ចំនួន១ដើម លេខ ៤៧២៣៧៨ បង់ M១៦ចំនួន ១០បង់ បង់អាកា ៤៧ចំនួន ៤បង់ បង់ម៉ាត់តាយ៉ែតចំនួន ២ បង់។
គ្រាប់កាំភ្លើង M១៦ ចំនួន ២៤២គ្រាប់ គ្រាប់កាំភ្លើង AK ៤៧ ចំនួន ៦៤គ្រាប់ គ្រាប់ខ្ចិប AK៤៧ ចំនួន ៧គ្រាប់- មីនចំនួន ៤គ្រាប់ ទូសសៀចំនួន១ ស្បែកជើងកវែងយោធាចំនួន ២ ឯកសណ្ឋានប៉ារ៉ាចំនួន ១ កំភ្លេនិងអាវភ្លៀងយោធាចំនួន ១៕
