បន្ទាយមានជ័យៈ ជនសង្ស័យពាក់ព័ន្ធករណីចាប់ជំរិតចំនួន ៤ នាក់ ត្រូវបានសមត្ថកិច្ចបញ្ជូនមករាជធានីភ្នំពេញកាលពីម្សិលមិញ បន្ទាប់ពីនគរបាលព្រហ្មទណ្ឌក្រសួងមហាផ្ទៃ និងនគរបាលខេត្តបន្ទាយមានជ័យសហការគ្នាតាមចាប់ខ្លួនបាននៅសណ្ឋាគារស៊ីធីប៉ោយប៉ែតនៅសង្កាត់-ក្រុងប៉ោយប៉ែតកាលពីថ្ងៃទី ១៧ មិថុនា។
លោក ជា វិបុល អនុប្រធាននាយកដ្ឋានព្រហ្មទណ្ឌនៃអគ្គស្នងការដ្ឋានគរបាលជាតិបាន ប្រាប់កាលពីម្សិលមិញថា ជនសង្ស័យទាំងនោះទី១-ឈ្មោះ ព្រាប វណ្ណា ភេទ ប្រុស អាយុ ២៣ ឆ្នាំ (អ្នកបើករថយន្ត) ទី២-ឈ្មោះ ព្រាប វណ្ណៈ ភេទ ប្រុស អាយុ ២៩ ឆ្នាំ (ជនដៃដល់) ទី៣-ឈ្មោះ វ៉ាន់ ស្រេត ភេទប្រុសអាយុ ២៨ ឆ្នាំ (អ្នកសមគំនិត) និងឈ្មោះ គង់ ស៊ីភឿន អាយុ ៤៧ ឆ្នាំ ជាបក្ខពួក រួមទាំងរថយន្ត ១ គ្រឿង ម៉ាកឡិចស៊ីស RX300 ពាក់ស្លាកលេខភ្នំពេញ 2AL-8004 ដែលជាមធ្យោបាយប្រព្រឹត្តបទល្មើសធ្វើឡើងរាជធានីភ្នំពេញ។
លោកបានបញ្ជាក់ថា៖ «មានករណីចាប់ជំរិតទារប្រាក់មែន ប៉ុន្តែមូលហេតុនៃការចាប់ជំរិតនេះខ្ញុំមិនទាន់ដឹងដែរព្រោះខ្ញុំមិនទាន់បានសាកសួរជនសង្ស័យនៅឡើយ។កម្លាំងខ្ញុំដឹកមកមិនទាន់ដល់ទេ»។
ប៉ុន្តែបើតាមមន្រ្តីនៃការិយាល័យព្រហ្មទណ្ឌកម្រិតធ្ងន់នៃស្នងការដ្ឋាននគរបាលខេត្តបន្ទាយមានជ័យម្នាក់សុំមិនបញ្ចេញឈ្មោះបានប្រាប់កាលពីម្សិលមិញថា ករណីនេះជនសង្ស័យបានចាប់បុរសម្នាក់ពីរាជធានីភ្នំពេញហើយដឹកជនរងគ្រោះតាមរថយន្តឆ្ពោះមកខេត្តបន្ទាយមានជ័យ។ បន្ទាប់ពីទទួលបានព័ត៌មាននេះពីនាយកដ្ឋានព្រហ្មទណ្ឌក្រសួងមហាផ្ទៃ កម្លាំងសមត្ថកិច្ចរបស់ស្នងការដ្ឋានបានចេញប្រតិបត្តិការជាមួយកម្លាំងជំនាញក្រសួងមហាផ្ទៃចុះប្រតិបត្តិការស្រាវជ្រាវរកមុខសញ្ញាប្រព្រឹត្តបទល្មើសឃើញតែម្តង។
មន្រ្តីនគរបាលរូបនោះបន្តថា ក្នុងប្រតិបត្តិការនេះ សមត្ថកិច្ចកំណត់បានមុខសញ្ញាហើយបានចុះបង្ក្រាបនៅចំណុចសណ្ឋាគារស៊ីធីប៉ោយប៉ែតកាលពីវេលាម៉ោង ១១ កន្លះថ្ងៃត្រង់ ថ្ងៃទី ១៧ ខែ មិថុនា ឆ្នាំ ២០១៩ ដោយបានឃាត់ខ្លួនជនសង្ស័យចំនួន ៤ នាក់ រួមទាំងរថយន្តដែលជាមធ្យោបាយធ្វើសកម្មភាពល្មើសផង។
លោកបានឲ្យដឹងទៀតថា បុរសជាជនរងគ្រោះត្រូវបានក្រុមជនសង្ស័យចាប់ចងមុខនឹងកំណាត់ពណ៌ខ្មៅហើយបានយកស្កុតពណ៌សរុំពីលើកំណាត់នោះដើម្បីបិទភ្នែក និងយកខ្សែក្រវាត់រឹតកក្នុងសកម្មភាពធ្វើទារុណកម្មទៀតផង៕