.jpg)
ភ្នំពេញៈ ជនសង្ស័យឆក់ទូរស័ព្ទដៃម្នាក់អាយុ ១៨ ឆ្នាំបានស្លាប់នៅក្នុងមន្ទីរពេទ្យ ក្រោយពេលលោតពីលើអគារជាន់ទី ៧ ដោយសារគេចខ្លួនពីការតាមចាប់របស់សមត្ថកិច្ច និងប្រជាពលរដ្ឋ។ ករណីនេះ បានកើតឡើងកាលពីរសៀលថ្ងៃទី ៤ ខែកុម្ភៈ ឆ្នាំ ២០១៩ នៅតាមបណ្ដោយផ្លូវលេខ ៤៣២ ស្ថិតក្នុងក្រុមទី ៦ ភូមិ ២ សង្កាត់បឹងត្របែក ខណ្ឌចំការមន រាជធានីភ្នំពេញ។
លោក ហ៊ាង ថារ៉េត អធិការរងខណ្ឌចំការមន ទទួលបន្ទុកផ្នែកព្រហ្មទណ្ឌ បានប្រាប់ភ្នំពេញប៉ុស្តិ៍នៅថ្ងៃម្សិលមិញថា ជនសង្ស័យ ដែលបានលោតទម្លាក់ខ្លួនពីលើអគារជាន់ទី ៧ នោះ មិនត្រូវបានគេស្គាល់អត្តសញ្ញាណពិតប្រាកដទេ តែតាមរយៈបក្ខពួករបស់គេម្នាក់ឈ្មោះ ផល ព្រួញ អាយុ ១៨ ឆ្នាំ ដែលត្រូវបានសមត្ថកិច្ចចាប់ឃាត់កាលពីរសៀលថ្ងៃកើតហេតុនោះ បានបញ្ជាក់ថា ជនសង្ស័យដែលបានស្លាប់នោះឈ្មោះ «អាយួន» អាយុ ១៨ ឆ្នាំ។
លោក ថារ៉េត បានបញ្ជាក់ថា៖ «យើង បានព្យាយាមដឹកជនសង្ស័យដែលរងរបួស ក្រោយលោតទម្លាក់ខ្លួនពីលើអគារជាន់ទី ៧ នោះ ទៅកាន់មន្ទីរពេទ្យដើម្បីជួយសង្គ្រោះជីវិតដែរ តែដោយរបួសធ្ងន់ពេក ជនសង្ស័យក៏បានដាច់ខ្យល់ស្លាប់ក្រោយបញ្ជូនទៅដល់មន្ទីរពេទ្យរុស្ស៊ីបានប្រមាណ ១០ នាទី»។
លោក ថារ៉េត អះអាងថា នៅមុនករណីនេះកើតឡើង គេឃើញក្រុមជនសង្ស័យទាំង ២ នាក់ខាងលើនេះ បានជិះម៉ូតូមួយគ្រឿងធ្វើសកម្មភាពឆក់យកទូរស័ព្ទដៃពីស្ត្រីរងគ្រោះម្នាក់ ដែលកំពុងធ្វើដំណើរតាមម៉ូតូកង់ ៣ នៅចំណុចកើតហេតុខាងលើ ប៉ុន្តែត្រូវជនរងគ្រោះចាប់ដៃជាប់ បណ្ដាលឲ្យម៉ូតូជនសង្ស័យ ដែលបើកបរដោយឈ្មោះ យួន ដួលបោកទៅលើដងផ្លូវ។ បន្ទាប់មកជនសង្ស័យទាំង ២ បាននាំគ្នារត់ឡើងទៅលើអគារកម្ពស់ ៧ ជាន់មួយនៅក្បែរនោះ ដើម្បីគេចខ្លួនតែត្រូវប្រជាពលរដ្ឋ រួមទាំងអាជ្ញាធរមូលដ្ឋាន នៅក្នុងតំបន់នោះ ធ្វើការឡោមព័ទ្ធ និងឡើងតាមក្រោយដើម្បីចាប់ខ្លួនពួកគេ។ នៅពេលអស់ផ្លូវគេចជនសង្ស័យឈ្មោះ ផល ព្រួញ បានសម្រេចចិត្តឲ្យសមត្ថកិច្ចចាប់ឃាត់ខ្លួន ចំណែក ជនសង្ស័យឈ្មោះយួន បានព្យាយាមលោតពីលើអគារដើម្បីគេចខ្លួនពីការតាមចាប់ ប៉ុន្តែមិនបានសម្រេចក៏ត្រូវរងរបួស និងស្លាប់ក្រោយបញ្ជូនទៅកាន់មន្ទីរពេទ្យ។
លោក ថារ៉េត បានបន្តថា ក្រោយកើតហេតុស្ត្រីរងគ្រោះបានជិះម៉ូតូកង់ ៣ ចេញទៅបាត់ដោយពុំបានដាក់ពាក្យបណ្ដឹងនោះទេ។ បច្ចុប្បន្នជនសង្ស័យឈ្មោះ ផល ព្រួញ ត្រូវបានក្រុមមន្ត្រីនគរបាលយុត្តិធម៌ សាកសួរចម្លើយ និងកសាងសំណុំរឿងចោទប្រកាន់ពីបទ «លួចមានស្ថានទម្ងន់ទោស» និងគ្រោងបញ្ជូនខ្លួនទៅកាន់តុលាការរាជធានីភ្នំពេញនៅថ្ងៃពុធនេះ ដើម្បីចាត់វិធានការបន្តតាមផ្លូវច្បាប់។
អ្នកស្រី ចក់ សុភាព នាយិកាប្រតិបត្តិមជ្ឈមណ្ឌលសិទ្ធិមនុស្សកម្ពុជា បាននិយាយថា ការវាយធ្វើទារុណកម្មទៅលើជនសង្ស័យក្រោយការចាប់ខ្លួន ដោយចោទប្រកាន់ពីបទល្មើសផ្សេងៗ និងការជំនុំជម្រះទោសពីហ្វូងមហាជនក្រៅប្រព័ន្ធតុលាការនាពេលកន្លងមក ធ្វើឲ្យជនសង្ស័យ ឬជនរងគ្រោះមួយចំនួនអស់ជំនឿទៅលើប្រព័ន្ធច្បាប់ ហើយហ៊ានធ្វើអត្តឃាតដោយខ្លួនឯង ដើម្បីគេចវេះពីការជំនុំជម្រះទោស និងក្លាយជាជនដៃដល់ដោយខ្លួនឯង ដែលពួកគេយល់ថា គ្មានសមត្ថភាព៕
