.jpg)
មណ្ឌលគិរីៈ បុរសជាជនសង្ស័យម្នាក់ឈ្មោះ ចេល ចូច អាយុ ៣៤ឆ្នាំត្រូវបានស្នងការរងផ្នែកព្រហ្មទណ្ឌខេត្តមណ្ឌលគិរីកំពុងបន្តនីតិវិធីនៃការសាកសួរ កាលពីម្សិលមិញ ពាក់ព័ន្ធជាមួយអំពើឃាតកម្មលើក្មេងប្រុសអាយុ១១ឆ្នាំម្នាក់ ដែលត្រូវបានគេរកឃើញនៅក្នុងវាលស្រែ ក្នុងភូមិស្រែហ៊ុយ ឃុំស្រែហ៊ុយ ស្រុកកោះញែក កាលពីខែតុលា។
លោក សូ សុវណ្ណ ស្នងការរងផ្នែកព្រហ្មទណ្ឌខេត្តមណ្ឌលគិរី បានអះអាងកាលពីម្សិលមិញថា ជនសង្ស័យត្រូវជាឪពុករបស់ក្មេងប្រុសរងគ្រោះ ដែលត្រូវបានគេរកឃើញស្លាប់ដោយមានស្នាមចិញ្ច្រាំស្ទើរតែពេញខ្លួន។
លោក សុវណ្ណ បានថ្លែងថាតាមប្រវតិ្តគ្រួសារ គ្រួសារនេះធ្លាប់ត្រូវបានគេចោទប្រកាន់ថាធ្វើអំពើអាបធ្មប់។
លោក សុវណ្ណ បានថ្លែងថា៖«យើងសង្ស័យថា វាជាអំពើអាបធ្មប់បណ្តាលមកពីរឿងនេះ នេះគឺជាការសន្និដ្ឋានរបស់យើងទេ។ យើងអញ្ជើញគាត់មកដើម្បីបានព័ត៌មាន គាត់ដឹងរឿងប៉ុន្តែគាត់ព្យាយាមលាក់ជាមួយយើង ហើយយើងមិនទាន់ចោទប្រកាន់គាត់ថាជាឃាតករទេ»។
លោក អះអាងដោយមន្ទិលទៅលើជនសង្ស័យ នៅក្នុងរឿងករណីឃាតកម្មនេះ ដោយគាត់ហាក់បីដូចជាមានការលាក់លៀម។ គាត់អត់បានប្រាប់មន្ត្រីជំនាញថា គាត់បានជួបអ្នកណាពេលដែលគាត់ដើរមកវិញទេ តែអ្នកជិតខាងបាននិយាយប្រាប់មន្ត្រីជំនាញ។
លោក សុវណ្ណ ថ្លែងថា៖«យើងឲ្យគាត់និយាយប៉ុន្តែគាត់ហាក់មិនទាន់និយាយពាក់ព័ន្ធជាមួយភ័ស្តុតាង យើងមិនហ៊ានអះអាងថាករណីនេះវាអាចជារឿងគំនុំទេ ពីព្រោះគាត់ជាកុមារត្រឹមតែអាយុ១១ឆ្នាំ។ អ៊ីចឹងមិនអាចមានបញ្ហាជាគំនុំជាមួយអ្នកណាទាំងអស់ទេ»។
លោក ខ្លូត សុភា អធិការនគរបាលស្រុកកោះញែក បានថ្លែងថា នគរបាលបានឃាត់ខ្លួនជនសង្ស័យកាលពីថ្ងៃចន្ទដើម្បីសាកសួររកវត្ថុតាង ហើយក៏បានបញ្ចូនជនសង្ស័យទៅស្នងការដ្ឋាននគរបាលខេត្ត ព្រោះនៅមានអាថ៌កំបាំងដែលត្រូវសួរបន្តទៀត។
លោក សុភា បានថ្លែងថា៖«កូនដែលត្រូវបានសម្លាប់ ឪពុកម្តាយគាត់អត់បានរាយការណ៍ជូនអ្នកណាទេ។ ឪពុកម្តាយមិនបានរាយការណ៍ជូនយើងទេ។ អ្នកជិតខាងជាអ្នករាយការណ៍ជូនយើង»។
បញ្ហារឿងចេះធ្វើអំពើអាបធ្មប់ ជាជំនឿដែលមានក្នុងសង្គមខ្មែរជាហូរហែ ខណៈលោក អធិការនគរបាលស្រុកកោះញែកបានអះអាងថា ក្នុងរយៈពេល១០ឆ្នាំ នគរបាលបង្ក្រាបបាន៣ករណីហើយ៕
