ក្រចេះ: នគរបាលប្រឆាំងការជួញដូរមនុស្ស និងការពារអនីតិជនខេត្តក្រចេះបានបញ្ជូនជនសង្ស័យម្នាក់ទៅសាលាដំបូងខេត្តក្រចេះកាលពីរសៀលម្សិលមិញពាក់ព័ន្ធរំលោភកូនស្រីបង្កើតរបស់ខ្លួនប្រព្រឹត្តនៅឃុំកោះខ្ញែរ ស្រុកសំបូរ ខេត្តក្រចេះកាលពីថ្ងៃទី ១២ តុលា។
លោកស្រី នៅ រតនា ស្នងការរងទទួលផែនប្រឆាំងការជួញដូរមនុស្សខេត្តក្រចេះឱ្យដឹងពីម្សិលមិញថាជនសង្ស័យឈ្មោះ ណៃ ចិន្តា អាយុ ៥៧ ឆ្នាំ ចំណែកនារីរងគ្រោះជាកូនអាយុ ២០ ឆ្នាំ។
លោក ប៊ុន ឈឿន អធិការនគរបាលស្រុកសំបូរថ្លែងថាបើតាមចម្លើយរបស់នារីរងគ្រោះប្រាប់សមត្ថកិច្ចថា ឪពុករបស់នាងបានចាប់បង្ខំនាងរំលោភសេពសន្ថវៈក្នុងអំឡុងខែកក្កដា ឆ្នាំ ២០១៥ បានម្តងដែលកាលនោះនាងនៅមានអាយុទើបតែ ១៥ ឆ្នាំនៅឡើយ ខណៈនាងនៅផ្ទះតែម្នាក់ឯង។
បន្ទាប់ពីឪពុកចាប់នាងរំលោភបានសម្រេចហើយគាត់គំរាមមិនឱ្យនាងយករឿងនេះទៅនិយាយប្រាប់ម្តាយ ឬក៏អ្នកណាផ្សេងទេហើយបើនាងហ៊ានតែយករឿងនេះទៅប្រាប់ឱ្យម្តាយដឹងគឺឪពុករបស់នាងសម្លាប់ចោល។ ដោយខ្លាចស្លាប់ នាងមិនហ៊ាននិយាយប្រាប់នរណាទេ ហើយចេះតែលាក់ទុករឿងនេះមករហូតមក។
ជនរងគ្រោះថា លុះដល់ថ្ងៃទី ៨ ខែ តុលា ឆ្នាំ ២០២០ នេះខណៈបងប្រុស និងម្តាយរបស់នាងមិននៅផ្ទះស្រាប់តែជនសង្ស័យជាឪពុកបានចាប់នាងរំលោភម្តងទៀតតែចៃដន្យ ពេលឪពុកកំពុងធ្វើសកម្មភាពមកលើនាងក៏មានក្មួយប្រុសតូចរបស់នាងម្នាក់ (កូនរបស់បងស្រី) ដែលរស់នៅជាមួយចូលទៅទាន់ ហើយក៏យករឿងនេះប្រាប់ម្តាយនាងតែម្តង។
ជនសង្ស័យមិនព្រមឆ្លើយសារភាពពិតមែនតែផ្អែកលើការធ្វើកោសល្យវិច័យ និងការរៀបរាប់ប្រាប់ពីជនរងគ្រោះអាចសន្មតបានថា រឿងហេតុកើតមានពិតមែន។ ផ្អែកតាមការប្រមែប្រមូលជុំវិញអង្គហេតុហ្នឹងបានបង្ហាញថា មានបន្ទុកទៅលើជនសង្ស័យជាពិសេសចម្លើយជនរងគ្រោះតែម្តង៕