បន្ទាយមានជ័យ៖ ជនសង្ស័យម្នាក់ដែលជាមេខ្យល់នាំមនុស្សឆ្លងដែនចូលប្រទេសថៃ ត្រូវបានកម្លាំងសមត្ថកិច្ចចាប់បញ្ជូនទៅសាលាដំបូងខេត្តបន្ទាយមានជ័យ ដើម្បីចាត់ការតាមនីតិវិធីនៅថ្ងៃទី ២១ ខែមេសានេះ។
លោកស្រី ឌី សុជាតិ ស្នងការរងទទួលការងារយេនឌ័រ និងប្រឆាំងការជួញដូរមនុស្ស និងការពារអនីតិជន ខេត្តបន្ទាយមានជ័យឲ្យដឹងថា ជនសង្ស័យជាមេខ្យល់ម្នាក់នោះត្រូវបានកម្លាំងនគរបាលស្រុកថ្មពួក ចាប់បញ្ជូនមកស្នងការដ្ឋាននគរបាលខេត្តបន្ទាយមានជ័យ កាលពីថ្ងៃទី ២០ ខែមេសា។
លោកស្រីថ្លែងថា៖ «យើងបានបញ្ជូនគាត់ទៅកាន់តុលាការហើយនៅព្រឹកនេះ។ អ៊ីចឹងពេលនេះជនសង្ស័យកំពុងនៅតុលាការ។ គេសម្រេចចោទប្រកាន់ ស៊ើបសួរ និងឃុំខ្លួនយ៉ាងណានោះ លើស្ថាប័នអយ្យការ»។
លោក ឈឿន គឹមឈុន អធិការនគរបាលស្រុកថ្មពួកឲ្យដឹងថា ជនសង្ស័យឈ្មោះ នឹម វណ្ណា ភេទប្រុស អាយុ ៦៨ ឆ្នាំ នៅភូមិបន្ទាយមានរិទ្ធ ឃុំគោករមៀត ស្រុកថ្មពួក ខេត្តបន្ទាយមានជ័យ។
បើតាមលោកអធិការ ជនសង្ស័យរូបនេះត្រូវបាននគរបាលវរសេនាតូចការពារព្រំដែនគោកលេខ ៨០៧ ឃាត់ខ្លួនជាមួយពលករខ្មែរប្រុស-ស្រី ចំនួន ២ នាក់ មានឈ្មោះ តោ សូរិយ៉ា ភេទស្រី អាយុ ៣៩ ឆ្នាំ នៅភូមិស្រះឈូក ឃុំស្រះជីក ស្រុកភ្នំស្រុក និងឈ្មោះ មាត បឹម ភេទប្រុស អាយុ ២០ ឆ្នាំ រស់នៅទីកន្លែងជាមួយគ្នា។ ពួកគេបម្រុងឆ្លងដែនទៅប្រទេសថៃ នៅចំណុចច្រកស្តុកស្តោរ ក្នុងភូមិសាស្ត្រឃុំគោករមៀត ស្រុកថ្មពួក។
លោកបញ្ជាក់ថា ដោយមានបទបញ្ជាពីលោកឧត្តមសេនីយ៍ទោ សិទ្ធិ ឡោះ ស្នងការនគរបាលខេត្ត និងមានការសម្របសម្រួលពីលោក មាស ច័ន្ទពិសិដ្ឋ ព្រះរាជអាជ្ញាអមសាលាដំបូងខេត្ត ជនសង្ស័យត្រូវបានកម្លាំងនគរបាលឃាត់ខ្លួននៅវេលាម៉ោង ១១ និង ២០ នាទីព្រឹក នៅថ្ងៃទី ២០ មេសា។
លោកអធិការបញ្ជាក់ថា៖ «ចំណែកពលករប្រុស-ស្រីទាំង ២ នាក់ ត្រូវបានបញ្ជូនទៅធ្វើចត្តាឡីស័ក»៕