បាត់ដំបងៈ បុរសជាជនសង្ស័យ ៦ នាក់ត្រូវកងរាជអាវុធហត្ថខេត្តបាត់ដំបងបញ្ជូនទៅសាលាដំបូងខេត្តនៅព្រឹកថ្ងៃទី ១២ ធ្នូនេះ បន្ទាប់ពីឃាត់ខ្លួនកាលពីថ្ងៃទី ១០ ធ្នូ នៅភូមិអូររំចេកក្រោមឃុំអូរសំរិល ស្រុកសំឡូត តាមពាក្យបណ្តឹងរបស់ម្ចាស់ដីម្នាក់ពាក់ព័ន្ធនឹងការលួចកាប់ឈើធ្នង់ ១ ដើម និងប្រើប្រាស់អាវុធខុសច្បាប់ ។
លោក ឡាច វ៉ាន់ ប្រធានការិយាល័យបទល្មើសព្រហ្មទណ្ឌកងរាជអាវុធខេត្តប្រាប់ពីម្សិលមិញថាជនសង្ស័យខាងលើរួមមាន ១- ឈ្មោះ យី ម៉ង់ អាយុ ២៣ ឆ្នាំ រស់នៅភូមិអូរសំរិលលើ ឃុំអូរសំរិល ស្រុកសំឡូត,២- ឈ្មោះ ប៉ែត សំអ៊ុន អាយុ ៣២ ឆ្នាំ រស់នៅភូមិសាំងតាគង់ ឃុំនិទាន ស្រុកបសេដ្ឋ ខេត្តកំពង់ស្ពឺ,៣- ឈ្មោះ ឆៃ ណាក់អាយុ ២៥ ឆ្នាំ រស់នៅភូមិកន្ទួត ឃុំសំឡូត ស្រុកសំឡូត ៤- ឈ្មោះ នាក់ មឿន អាយុ ៣៧ ឆ្នាំ រស់នៅភូមិបឹងរុន ឃុំសំឡូត ស្រុកសំឡូត,៥- ឈ្មោះ សៀង សុខា អាយុ ២៤ ឆ្នាំ រស់នៅដូចគ្នា, ៦- ឈ្មោះ គឿត សាវី អាយុ ១៨ ឆ្នាំ ។ ពួកគេទាំងនោះសុទ្ធតែមិនមានមុខរបរពិតប្រាកដ ។
លោកប្រាប់ថាជនទាំង ៦ នាក់នេះសមត្ថកិច្ចរបស់លោកបានសាកសួរ និងបានធ្វើកំណត់ហេតុចប់សព្វគ្រប់ហើយ ហើយត្រូវបញ្ជូនពួកគេទៅសាលាដំបូងខេត្តបាត់ដំបងបន្តទៀតនៅថ្ងៃ ១២ ធ្នូនេះដើម្បីចាត់ការតាមច្បាប់។
លោកបានបញ្ជាក់ថា៖ «នៅក្នុងកំណត់ហេតុរបស់ខ្ញុំជាការចោទប្រកាន់បឋមពីបទលួចមានស្ថានទម្ងន់ទោស និងប្រើប្រាស់អាវុធខុសច្បាប់ ព្រោះជនសង្ស័យទាំង ៦ នាក់នេះបានលួចចូលទៅកាប់ដើមធ្នង់របស់អ្នកចម្ការម្នាក់ហើយបាញ់គំរាមគាត់ផង»។
លោក វ៉ាន់ បានរំឭកប្រាប់ថាកាលពីព្រឹកព្រលឹមថ្ងៃទី ១០ ធ្នូ ក្រុមជនសង្ស័យបានលួចចូលទៅចម្ការអ្នកភូមិម្នាក់ ។ ពេលនោះម្ចាស់ចម្ការបានឮស្នូរសំឡេងម៉ាស៊ីនអារឈើ ហើយគាត់ក៏ដើរទៅមើល ប៉ុន្តែត្រូវក្រុមជនសង្ស័យបាញ់គំរាម ១ គ្រាប់ ។
លោកបន្តថាក្រោយមកម្ចាស់ចម្ការបានរត់ទៅប្តឹងកងរាជអាវុធហត្ថស្រុកសំឡូតទើបឈានដល់ចាប់ខ្លួនពួកគេបានទាំង ៦ នាក់តែម្តង។ ចំពោះវត្ថុតាងដែលសមត្ថកិច្ចដកហូតបានមានរណារយន្ត ១ គ្រឿង រថយន្តកែច្នៃ ១ គ្រឿង រួមអាវុធអាកាស្វាយបត់ ១ ដើម មាន ៥ គ្រាប់បាញ់អស់ ១ គ្រាប់ នៅសល់ ៤ គ្រាប់ ។
លោកបានបន្ថែមថាកន្លងមកក្រុមជនសង្ស័យខាងលើតែងតែដើរលួចដើមឈើមានតម្លៃដើម្បីលក់ ប៉ុន្តែពេលនេះក៏ត្រូវសមត្ថកិច្ចចាប់ខ្លួនបានតែម្តង៕