កណ្តាលៈ ក្រោយពីរត់គេច និងសំងំលាក់ខ្លួនអស់រយៈពេល ៥ ថ្ងៃ បុរសសង្ស័យក្នុងអំពើឃាតកម្មសម្លាប់ស្ត្រីជាភរិយានៅស្រុកពញាឮ ខេត្តកណ្ដាល កាលពីសប្ដាហ៍មុនត្រូវបានកម្លាំងនគរបាលចាប់ខ្លួនបានកាលពីយប់ថ្ងៃចន្ទ នៅតំបន់ព្រៃលិចទឹកបឹងទន្លេសាប ខេត្តកំពង់ឆ្នាំង។
លោក អ៊ាវ ចំរើន ស្នងការនគរបាលខេត្តកណ្ដាលប្រាប់ភ្នំពេញ-ប៉ុស្តិ៍នៅថ្ងៃអង្គារថា ជនសង្ស័យឈ្មោះ ឃុត សុផល អាយុ ៤៦ ឆ្នាំ ជាបុគ្គលិកសន្តិសុខនៅរោងចក្រមួយក្នុងខេត្តកណ្ដាលរស់នៅភូមិត្រពាំងពុទ្រា ឃុំទំនប់ធំ ស្រុក ពញាឮ ខេត្តកណ្តាល។ កាលពីវេលាម៉ោង ២ រំលងអធ្រាត្រចូលថ្ងៃទី ២១ ខែវិច្ឆិកា ជននេះបានប្រើអំពើហិង្សាលើស្ត្រីជាភរិយាឈ្មោះ យ៉ាត ស្រីពៅ អាយុ ៤៥ ឆ្នាំ ឱ្យរងរបួសធ្ងន់ ហើយបានស្លាប់នៅលើវាលស្រែក្បែរមាត់ទឹក។
លោកថ្លែងថា៖ «ក្រោយពីវាយសម្លាប់ស្ត្រីជាប្រពន្ធ ជនសង្ស័យបានរត់គេចខ្លួនទៅពួនសំងំនៅក្នុងតំបន់ព្រៃលិចទឹកនៃស្រុកបរិបូណ៌ ខេត្តកំពង់ឆ្នាំងជាទីដែលកម្លាំងសមត្ថកិច្ចយើងបានរកឃើញ និងចាប់ខ្លួនបានកាលពីយប់ថ្ងៃចន្ទ។ នៅពេលនេះជនសង្ស័យកំពុងស្ថិតក្រោមការសាកសួរចម្លើយដោយមន្ត្រីនគរបាលជំនាញយើង»។
បើតាមលោក ចំរើន ជនសង្ស័យ នឹងត្រូវប្រឈមចំពោះការចោទប្រកាន់ពីបទ «មនុស្សឃាតគិតទុកជាមុន» ហើយក្រុមមន្ត្រីនគរបាលនឹងបញ្ជូនសំណុំរឿងនេះទៅកាន់តុលាការខេត្តកណ្ដាលនៅព្រឹកថ្ងៃពុធនេះ ដើម្បីមានចំណាត់ការតាមនីតិវិធី។
តាមរបាយការណ៍ស៊ើបសួររបស់សមត្ថកិច្ចនគរបាលស្រុកពញាឮ ដែលភ្នំពេញប៉ុស្តិ៍ទទួលបាននៅថ្ងៃអង្គារ ជនសង្ស័យបានប្រើអំពើហិង្សាទៅលើប្រពន្ធម្ដងរួចមកហើយ ក្រោយពីមានជម្លោះពាក្យសម្ដីក្នុងវង់ផឹកស៊ីជាមួយអ្នកភូមិកាលពីល្ងាចថ្ងៃទី ២០ ខែវិច្ឆិកា។ បន្ទាប់មកជនសង្ស័យបាននាំស្ត្រីជាប្រពន្ធទៅស្រែ ដើម្បីរកចាប់ក្ដាម និងត្រីដោយបានទិញស្រាថ្នាំ ១ លីត្រទៅជាមួយផង។
របាយការណ៍បានបន្តថា ក្នុងដំណើរទៅស្រែនាល្ងាចថ្ងៃនោះ បុរសម្នាក់ឈ្មោះ ឌុច ពេជ្រ អាយុ ៥៦ ឆ្នាំ ដែលជាអ្នកជិតខាងប្ដីប្រពន្ធទាំង ២ នេះបានឃើញជនសង្ស័យជាប្ដីវាយបោចសក់ និងជេរប្រទេចស្ត្រីជាប្រពន្ធ។ ឃើញដូច្នោះបុរសនោះបានព្យាយាមចូលឃាត់ជនសង្ស័យ កុំឱ្យប្រើអំពើហិង្សាលើប្រពន្ធ ប៉ុន្តែជនសង្ស័យស្រែកគំហកមកបុរសនោះថា «បងឯងកុំមកចេះដឹង រឿងប្ដីប្រពន្ធខ្ញុំទេ»។ ឮដូច្នោះបុរសឈ្មោះ ឌុច ពេជ្រ ក៏បានដើរចេញ៕