.jpg)
ជនសង្ស័យពីបទសម្លាប់មនុស្សត្រូវសមត្ថកិច្ចចាប់ខ្លួន។ រូបថត នគរបាល
កំពង់ចាមៈ បុរសជាជនសង្ស័យម្នាក់ដែលគេចខ្លួនពីខេត្តកំពង់ចាមទៅខេត្តកំពត ហើយត្រូវសមត្ថកិច្ចចាប់ខ្លួន និងប្រគល់ឲ្យសមត្ថកិច្ចខេត្តកំពង់ចាមវិញពាក់ព័ន្ធការសម្លាប់ស្ត្រីម្នាក់នៅភូមិសំព័រ ឃុំតាអុង ស្រុកចំការលើកាលពីថ្ងៃ ១៥ ខែកុម្ភៈ នោះ ត្រូវសមត្ថកិច្ចបញ្ជូនខ្លួនទៅសាលាដំបូងខេត្តនៅថ្ងៃទី ១៩ កុម្ភៈ។
លោក ម៉ៅ ច័ន្ទមធុរិទ្ធ ស្នងការនគរបាលខេត្តកំពតបានប្រាប់ភ្នំពេញប៉ុស្តិ៍ពីម្សិលមិញថា ជនសង្ស័យឈ្មោះ ជួប វិបុល អាយុ ៣៥ ឆ្នាំ មានស្រុកកំណើតនៅភូមិសំព័រ ឃុំតាអុង ស្រុកចំការលើ ខេត្តកំពង់ចាម។ សមត្ថកិច្ចរបស់លោកសហការចាប់ជនសង្ស័យបញ្ជូនទៅស្នងការដ្ឋាននគរបាលខេត្តកំពង់ចាមវិញហើយ។
លោកថា៖ «ជនសង្ស័យខ្ញុំចាប់បាននៅថ្ងៃទី ១៦ កុម្ភៈ ហើយប្រគល់ឲ្យសមត្ថកិច្ចខេត្តកំពង់ចាមនៅថ្ងៃនោះភ្លាមៗព្រោះខាងសមត្ថកិច្ចខេត្តមកទទួលយក»។
ដោយឡែកលោក ចាន់ ហោ អនុប្រធានការិយាល័យព្រហ្មទណ្ឌកម្រិតធ្ងន់នៃស្នងការដ្ឋាននគរបាលខេត្តកំពង់ចាមប្រាប់ពីម្សិលមិញថា សមត្ថកិច្ចបានទទួលជនសង្ស័យពីនគរបាលខេត្តកំពតហើយ។ លោកកំពុងបន្តនីតិវិធីសាកសួរបន្ថែមមុនបញ្ជូនទៅសាលាដំបូងខេត្តកំពង់ចាម។
លោកថា៖ «ខ្ញុំកំពុងសាកសួរគាត់ ហើយល្ងាចថ្ងៃស្អែក [ថ្ងៃនេះ] បានបញ្ជូនគាត់ទៅតុលាការខេត្ត ដើម្បីចាត់ការតាមច្បាប់»។
លោក ចាន់ ហោ ក៏បានរំឭកថាហេតុការណ៍សម្លាប់ស្ត្រីរងគ្រោះឈ្មោះ ហេង នី អាយុ ៥៩ ឆ្នាំនេះ បានកើតឡើងនៅចន្លោះពីម៉ោង ៧ កន្លះទៅម៉ោង ៩ កន្លះយប់ ថ្ងៃទី ១៥ ខែកុម្ភៈ នៅក្នុងបន្ទប់ទឹកក្រោមផ្ទះរបស់ជនរងគ្រោះ។ លោកបញ្ជាក់ថាជនសង្ស័យត្រូវបញ្ជូនទៅតុលាការនៅថ្ងៃនេះ។
ក្រោយពីធ្វើសកម្មភាពសម្លាប់ជនរងគ្រោះមក ជនសង្ស័យបានគេចខ្លួនពីកន្លែងកើតហេតុ។ ក្រោយកើតហេតុសមត្ថកិច្ចបានចុះដល់ទីតាំង និងបានកំណត់មុខសញ្ញាជនសង្ស័យច្បាស់ហើយនោះ សមត្ថកិច្ចបានដឹងថាជនសង្ស័យបានរត់ទៅលាក់ខ្លួននៅភូមិត្រពាំងសង្កែ ឃុំត្រពាំងសង្កែ ស្រុកទឹកឈូ ខេត្តកំពត ហើយក៏សុំកិច្ចសហការពីស្នងការដ្ឋាននគរបាលខេត្តកំពតដើម្បីស្រាវជ្រាវរហូតចាប់ជនសង្ស័យបានតែម្តង។
លោកឲ្យដឹងថា បើតាមសមត្ថកិច្ចខេត្តកំពតប្រាប់ថាពេលចាប់ខ្លួនបានដំបូងជនសង្ស័យមិនបានសារភាពប្រាប់សមត្ថកិច្ចទេ ទោះបីជនសង្ស័យមានស្លាកស្នាមក្រចក មុតសុះសាច់ពេញខ្លួន ដែលសមត្ថកិច្ចជំនាញដាក់ការសង្ស័យថាពិតជាស្នាមក្រចករបស់ជនរងគ្រោះក៏ដោយ។ ស្ត្រីរងគ្រោះដែលត្រូវបានជនសង្ស័យសម្លាប់នោះបានបាត់ខ្សែកមាស ១ ខ្សែទម្ងន់ ១ តម្លឹង និងខ្សែដៃមាស ១ ខ្សែទម្ងន់ ១ តម្លឹង ២ ជី ផង។
លោក ឡុក ជាង នាយនគរបាលប៉ុស្តិ៍តាអុងប្រាប់ពីម្សិលមិញថា ស្ត្រីរងគ្រោះជាស្ត្រីមេម៉ាយមានកូន ៦ នាក់ ក្នុងនោះមានស្រី ២ នាក់ និងកូនប្រុសបងមានអាយុ ៤០ ឆ្នាំហើយ។ ជនសង្ស័យក៏មានផ្ទះនៅជិតស្ត្រីរងគ្រោះដែរ។ មុនពេលកើតហេតុ ស្ត្រីរងគ្រោះបានចុះពីលើផ្ទះទៅបន្ទប់ទឹកខាងក្រោមផ្ទះ ពេលនោះជនសង្ស័យចាប់ស្ត្រីរងគ្រោះរុញផ្ទប់ទៅនឹងជញ្ជាំងថ្មហើយយកខ្សែកាបូបរឹតករហូតដាច់ដង្ហើមស្លាប់ និងដោះយកទ្រព្យសម្បត្តិគេចខ្លួនបាត់៕
