ព្រះសីហនុៈ ជនសង្ស័យម្នាក់ដែលជាប់សង្ស័យករណីសម្លាប់អ្នកនេសាទ ២ នាក់ទម្លាក់ក្នុងទឹកសមុទ្រនៅខេត្តព្រះសីហនុត្រូវសមត្ថកិច្ចខេត្តនេះបញ្ជូនទៅ សាលាដំបូងខេត្តព្រះសីហនុនៅថ្ងៃទី ៩ មីនានេះ បន្ទាប់ពីសមត្ថកិច្ចខេត្តព្រៃវែងសហការចាប់ខ្លួនបានទៅស្រុកស៊ីធរកណ្តាលកាលពីថ្ងៃទី ៧ មីនា ហើយបានប្រគល់ឲ្យសមត្ថកិច្ចខេត្តព្រះសីហនុ។
លោក ជួន ណារិន្ទ ស្នងការនគរបាលខេត្តព្រះសីហនុបានឲ្យដឹងកាលពីម្សិលមិញថា ជនសង្ស័យឈ្មោះ ធី វណ្ណៈ ហៅ ធីស៊ីវ អាយុ ២៥ ឆ្នាំត្រូវបញ្ជូនបន្តទៅសាលាដំបូងខេត្តព្រះសីហនុនៅថ្ងៃទី ៩ មីនានេះ បន្ទាប់ពីបញ្ចប់ការសាកសួរក្រោយពេលសមត្ថកិច្ចខេត្តព្រៃវែងចាប់ខ្លួនប្រគល់ឲ្យសមត្ថកិច្ចរបស់លោក។
លោកថ្លែងថា៖ «ជនសង្ស័យរូបនេះយើងបានបញ្ចប់នីតិវិធីសាកសួរហើយ ហើយត្រូវបញ្ជូនបន្តទៅតុលាការ»។
លោកស្នងការបានប្រាប់តាមសម្តីសារភាពរបស់ជនសង្ស័យថា នៅមុនពេលកើតហេតុពួកគេមានគ្នា ៣ នាក់ដែលមានអ្នកបើកបរទូកម្នាក់ និងកម្មករទូក ២ នាក់បាននេសាទត្រីក្នុងទឹកសមុទ្រ និងមានការផឹកស៊ីហើយមានទាំងជក់គ្រឿងញៀននៅលើទូកនេសាទនោះផង។ ក្នុងពេលកំពុងផឹកស៊ីនោះពួកគេបានទំនាស់ពាក្យសម្តីជាមួយគ្នាហើយជនសង្ស័យបានយកញញួរវាយអ្នកបើកបរទូកនោះត្រូវចំនួន ២ ញញួរផុងលលាដ៍ក្បាល ហើយរុញទម្លាក់ក្នុងទឹកសមុទ្រ។ រីឯម្នាក់ទៀតត្រូវជនសង្ស័យយកកាំបិតចាក់សម្លាប់ ហើយទម្លាក់ក្នុងទឹកសមុទ្រដូចគ្នា។ ចំណែកជនសង្ស័យបានបើកទូកមកឡើងគោកហើយរត់គេចទៅលាក់ខ្លួននៅស្រុកកំណើតក្នុងស្រុកស៊ីធរកណ្តាល ខេត្តព្រៃវែង។
លោក ជួន ណារិន្ទ បានបន្តថា ក្រោយពីប្រទះឃើញសពជនរងគ្រោះម្នាក់អណ្តែត ទឹកសមុទ្រនៅម្តុំកោះរ៉ុងកាលពីថ្ងៃទី ៣ មីនា សមត្ថកិច្ចជំនាញបានធ្វើកោសល្យវិច័យសាកសព និងស្រាវជ្រាវតាមជំនាញក៏បានកំណត់មុខសញ្ញាជនសង្ស័យហើយបានទាក់ទងទៅសមត្ថកិច្ចជំនាញនៅខេត្តព្រៃវែងដើម្បីសុំកិច្ចសហការរហូតចាប់ខ្លួនជនសង្ស័យបាន។
លោក អ៊ុក ផាត ប្រធានការិយាល័យព្រហ្មទណ្ឌកម្រិតធ្ងន់នៃស្នងការដ្ឋាននគរបាលខេត្តព្រៃវែងឲ្យដឹងកាលពីរសៀលម្សិលមិញថា ការចាប់ខ្លួនជនសង្ស័យខាងលើគឺសមត្ថកិច្ចលោកបានទទួលការសុំកិច្ចសហការពីសមត្ថកិច្ចខេត្តព្រះសីហនុ។ ករណីនេះកម្លាំងជំនាញរបស់លោកបានប្រើពេលស្រាវជ្រាវអស់ ៣ ទៅ ៤ ថ្ងៃទើបប្រទះឃើញជនសង្ស័យដូចភិនភាគដែលសមត្ថកិច្ចខេត្តព្រះសីហនុចង្អុលប្រាប់ហើយចាប់ខ្លួនបានកាលពីថ្ងៃ ៧ មីនាតែម្តង។
លោកបន្តថា ភ្លាមៗបន្ទាប់ពីចាប់ខ្លួនជនសង្ស័យបានសមត្ថកិច្ចលោកក៏បានរាយការណ៍ទៅនគរបាលខេត្តព្រះសីហនុហើយសមត្ថកិច្ចខេត្តព្រះសីហនុក៏បានធ្វើដំណើរមកទទួលយកជនសង្ស័យនៅថ្ងៃដដែលនោះដោយដឹកយកទៅខេត្តព្រះសីហនុវិញទាំងយប់៕