កំពង់ស្ពឺៈ ជនម្នាក់ដែលសង្ស័យបែកថ្នាំដែលយកកាំបិតចិតត្នោតទៅអារកសម្លាប់ក្មេងប្រុសម្នាក់អាយុ ១០ ឆ្នាំស្លាប់កាលពីយប់ថ្ងៃទី ៨ ខែមីនា នៅភូមិត្រពាំងជ្រៃ ឃុំព្រៃវិហារ ស្រុកគងពិសីនឹងត្រូវសមត្ថកិច្ចបញ្ជូនទៅសាលាដំបូងខេត្តកំពង់ស្ពឺនៅថ្ងៃទី ១១ ខែមីនានេះ។
លោក សម សាក់ ស្នងការរងទទួលផែនព្រហ្មទណ្ឌនៃស្នងការរដ្ឋាននគរបាលខេត្តកំពង់ស្ពឺបានឲ្យដឹងពីម្សិលមិញថា សមត្ថកិច្ចនឹងបញ្ជូនជនសង្ស័យឈ្មោះ ខេម ផាន់ណា អាយុ ២១ ឆ្នាំទៅសាលាដំបូងខេត្តកំពង់ស្ពឺនៅថ្ងៃទី ១១ មីនា។ «ជនម្នាក់នេះនគរបាលស្រុកគងពិសីបញ្ជូនមកដល់ការិយាល័យខ្ញុំហើយ ហើយខ្ញុំកំពុងសាកសួរជនសង្ស័យបន្ថែម ដើម្បីធ្វើរបាយការណ៍ផ្ញើជូនតុលាការ»។
លោក ឃឹម សុផាន់រ៉ា អធិការនគរបាលស្រុកគងពិសីបានឲ្យដឹងថា ក្មេងរងគ្រោះឈ្មោះ សាន លីហៀង អាយុ ១០ ឆ្នាំដែលទាំងក្មេងរងគ្រោះទាំងជនសង្ស័យរស់នៅក្នុងភូមិ-ឃុំកើតហេតុជាមួយគ្នា។ បើតាមសាក្សីដែលជាជីតា និងយាយរបស់ក្មេងរងគ្រោះប្រាប់ឲ្យដឹងថា ផ្ទះរបស់ពួកគាត់ជាផ្ទះទាបតូចប្រក់ស័ង្កសីហើយពួកគាត់ មានកូនស្រីម្នាក់ជាម្តាយក្មេងរងគ្រោះ និងរស់នៅជាមួយគ្នាដែលមានមុខរបរជាកសិករ។
រវាងក្រុមគ្រួសារក្មេងរងគ្រោះ និងជនសង្ស័យគឺពួកគេគ្មានគំនុំអ្វីជាមួយគ្នាទេ ហើយចម្ងាយពីផ្ទះជនសង្ស័យមកផ្ទះក្មេងរងគ្រោះមានចម្ងាយ ១០០ ម៉ែត្រ។ លោកបន្តថា មុនពេលកើតហេតុក្រោយពីជុំគ្នាហូបបាយល្ងាចរួច ម្តាយ ឪពុករបស់ក្មេងរងគ្រោះបានចូលសម្រាន្តនៅក្នុងផ្ទះដោយសារតែជីតារបស់ក្មេងរងគ្រោះមានជំងឺឈឺធ្ងន់។ ដោយសារអាកាសធាតុប៉ុន្មានថ្ងៃនេះមានសភាពស្អុះស្អាប់ ទើបពួកគាត់ (តា យាយ) នាំគ្នាសម្រាកនៅលើគ្រែមុខផ្ទះ រួមទាំងក្មេងរងគ្រោះផង។ លុះដល់ម៉ោង ១០ កន្លះយប់ថ្ងៃទី ៨ មីនាស្រាប់តែឃើញជនសង្ស័យដើរកាន់កាំបិតមកស្រែកគំរាមយាយតាថា ប្រយ័ត្នគេ (ជនសង្ស័យ) សម្លាប់ចោលហើយជនសង្ស័យក៏មិនបានដើរទៅណាឆ្ងាយដែរ។ បន្ទាប់ពីជនសង្ស័យស្រែកគំរាមមក ស្រាប់តែជនសង្ស័យស្ទុះទៅចាប់ក្មេងរងគ្រោះដែលកំពុងដេកលក់អារកតែម្តង រីឯយាយរបស់ក្មេងរងគ្រោះ ដោយឃើញសភាពបែបនេះបានព្យាយាមរត់គេចខ្លួន ព្រោះភ័យខ្លាចជនសង្ស័យសម្លាប់។
ចំពោះតារបស់ក្មេងរងគ្រោះវិញដោយសារតែឈឺក្រោកមិនរួចពីកន្ទេល បានត្រឹមតែស្រែកឲ្យគេជួយនៅពេលឃើញជនសង្ស័យកំពុងអារកសម្លាប់ចៅជាមួយឈាមហូរជោកកន្ទេល។
នៅពេលនោះឪពុក ម្តាយក្មេងរងគ្រោះ និងអ្នកភូមិនៅក្បែរផ្ទះកើតហេតុបានផ្អើលឆោហើយបាននាំគ្នាដឹកក្មេងរងគ្រោះទៅមន្ទីរពេទ្យបង្អែកស្រុកគងពិសី តែដោយស្ថានភាពរបួសធ្ងន់ពេកក្មេងរងគ្រោះក៏ដាច់ខ្យល់ស្លាប់។ ចំពោះជនសង្ស័យបានព្យាយាមរត់គេចខ្លួនតែត្រូវពលរដ្ឋនាំគ្នាចាប់ហើយរាយការណ៍ទៅនគរបាល ប៉ុស្តិ៍ព្រៃវិហារ។
លោកអធិការ ឃឹម សុផាន់រ៉ា បញ្ជាក់ថា៖ «ក្រោយចាប់ខ្លួនបើតាមមើលសភាពជនសង្ស័យប្រហែលញៀនថ្នាំញៀន ហើយអាចបែកថ្នាំផង ព្រោះសមត្ថកិច្ចពិនិត្យទឹកនោមឃើញមានផ្ទុកសារធាតុញៀន»។
ពាក់ព័ន្ធនឹងការធ្វើកោសល្យវិច័យវិញត្រូវបានលោក ភោក សម្បត្តិ នាយការិយាល័យបច្ចេកទេសវិជ្ជាសាស្ត្រនៃស្នងការដ្ឋាននគរបាលខេត្តកំពង់ស្ពឺឲ្យដឹងពីម្សិលមិញថា តាមការត្រួតពិនិត្យលើក្មេងរងគ្រោះពីសមត្ថកិច្ចជំនាញផ្នែកកោសល្យវិច័យរកឃើញថា នៅលើ ក របស់ក្មេងរងគ្រោះមួយចំហៀងមានស្នាមអាររយះរហូតដល់ដាច់បំពង់ខ្យល់ទើបបណ្តាលឲ្យស្លាប់។ «តាមពិតទៅក្មេងរងគ្រោះដាច់ខ្យល់ស្លាប់តាំងពីនៅកន្លែងកើតហេតុប៉ុន្តែដោយសារក្រុមគ្រួសារមិនអស់ចិត្តទើបដឹកក្មេងទៅពេទ្យព្រោះគិតថានឹងមានជីវិត»៕