.jpg)
ជនជាប់ចោទ ដែលត្រូវចាប់ខ្លួន នៅក្លិបលុច្សសារី ១៧ នាក់ត្រូវតុលាការចោទប្រកាន់។ សហការី
ភ្នំពេញៈ សាលាដំបូងរាជធានី បានសម្រេចចោទប្រកាន់ ជនសង្ស័យ ១៧ នាក់ ដែលត្រូវបានឃាត់ខ្លួននៅក្នុងក្លិប លុច្សសារីពាក់ព័ន្ធនឹងបទល្មើសគ្រឿងញៀន ខណៈជនសង្ស័យដែលជាម្ចាស់ក្លិប មិនទាន់ត្រូវបានអាជ្ញាធរបង្ហាញអត្តសញ្ញាណនៅឡើយ។
កាលពីយប់រំលងអ្រធាត្រឈានចូលថ្ងៃទី ៨ ខែ មិថុនា កម្លាំងនគរបាលរាជធានីភ្នំពេញ បានបើកប្រតិបត្តិការចុះឆែកឆេរក្លិបកម្សាន្ត «លុច្សសារី» ស្ថិតនៅតាមបណ្ដោយផ្លូវលេខ ២១៤ កែងផ្លូវ ៦៣ សង្កាត់បឹងរាំងខណ្ឌដូនពេញ ដោយបានរកឃើញថ្នាំញៀនប្រមាណ ១៦២,៧ ក្រាម និងរកឃើញអ្នកញៀនគ្រឿងញៀន មានទាំងជនជាតិខ្មែរ និងបរទេសជិត ១០០ នាក់ ក្នុងចំណោមអ្នកដែលត្រូវបានឃាត់ខ្លួននៅក្នុងក្លិបចំនួន ៤០៨ នាក់។
ក្រោយការស៊ើបអង្កេតសមត្ថកិច្ច បានសម្រេចបញ្ជូនជនសង្ស័យចំនួន ១៧ នាក់ ដែលមានជនជាតិវៀតណាមចំនួន ៥ នាក់ អាយុចន្លោះពី ២៣ ដល់ ៤១ ឆ្នាំ ទៅតុលាការ។
លោក លី សុផាណា អ្នកនាំពាក្យអយ្យការអមសាលាដំបូងរាជធានីភ្នំពេញ បានឲ្យដឹងកាលពីម្សិលមិញថា ក្រោយពីបានទទួល និងពិនិត្យសំណុំរឿង ព្រមទាំងសួរចម្លើយលើជនសង្ស័យចំនួន ១៧ នាក់ ចប់សព្វគ្រប់ តំណាងអយ្យការបានសម្រេចបើកការស៊ើបសួរដោយចោទប្រកាន់ពួកគេចំនួន ៣ ករណី ពាក់ព័ន្ធនឹងបទល្មើសគ្រឿងញៀន។
លោកបញ្ជាក់ថា៖ «តំណាងអយ្យការបានសម្រេចបើកការស៊ើបសួរដោយចោទប្រកាន់ពីបទជួញដូរសារធាតុញៀនដោយខុសច្បាប់ សម្រួល និងចាត់ចែងឲ្យប្រើប្រាស់សារធាតុញៀនដោយខុសច្បាប់ រក្សាទុកសារធាតុញៀនដោយខុសច្បាប់ និងបទ សមគំនិតតាមមាត្រា ៤០ មាត្រា ៤២ និងមាត្រា ៤៤ នៃច្បាប់ស្តីពីការ គ្រប់គ្រងគ្រឿងញៀន និងមាត្រា ២៩ នៃក្រមព្រហ្មទណ្ឌ ហើយបញ្ជូនជនល្មើស និងសំណុំរឿងទៅចៅក្រមស៊ើបសួរ ដើម្បីចាត់ការបន្តតាមនីតិវិធី»។
ប៉ុន្តែទោះយ៉ាងណារហូតមកដល់ពេលនេះ អាជ្ញាធរនៅមិនទាន់បង្ហាញអត្តសញ្ញាណ ឬក៏ឃាត់ខ្លួនម្ចាស់ក្លិបលុច្សសារី ដែលទទួលបានអាជ្ញាប័ណ្ណ ធ្វើអាជីវកម្មលើក្លិបនេះនៅឡើយទេ។
លោក ស៊ឹង សែនករុណា អ្នកនាំពាក្យសមាគមការពារសិទ្ធិមនុស្សអាដហុក ទទូចឲ្យមានការវែកមុខម្ចាស់ក្លិបលុច្សសារីនេះ និងឈានទៅរកការឃាត់ខ្លួន យកមកផ្តន្ទាទោសតាមច្បាប់ ខណៈលោកមើលឃើញថា បើអាជ្ញាធរពិតជាមានឆន្ទៈក្នុងការបង្ក្រាបបទល្មើសគ្រឿងញៀន ដែលកើតមាននៅក្នុងក្លិបមែននោះ គឺជនសង្ស័យនឹងត្រូវបានឃាត់ខ្លួន ក្នុងពេលឆាប់ៗ។
លោកបញ្ជាក់ថា៖ «បើសិនជាសមត្ថកិច្ចបញ្ជាក់អំពីសមាសភាពជនហ្នឹងឲ្យបានច្បាស់លាស់ ខ្ញុំជឿជាក់ថា ជនហ្នឹងមិនអាចរួចផុតពីការចាត់វិធានការដូចដែលការបង្រ្កាបក្លិបមុនៗបាននោះទេ»។
ភ្នំពេញប៉ុស្តិ៍ មិនអាចសុំការអត្ថាធិប្បាយពីលោក ស ថេត ស្នងការរាជធានីភ្នំពេញ ជុំវិញចំណាត់ការបន្ត និងការស៊ើបអង្កេតដើម្បីឈានទៅដល់ការចាប់ខ្លួនម្ចាស់ក្លិបនេះបានទេ ដោយសារទូរស័ព្ទលោកមិនមានអ្នកទទួលកាលពីម្សិលមិញ។ ប៉ុន្តែលោកធ្លាប់ថ្លែងថា៖ «មេខ្លោង (ម្ចាស់ក្លិប) ពេលណាចាប់ខ្លួន អាស្រ័យលឿនឬក៏ឆាប់តែប៉ុណ្ណឹងទេ ប៉ុន្តែរឿងហ្នឹងគឺធ្វើហើយ»។
ក្នុងរយៈពេល ៦ ខែ ដើមឆ្នាំ ២០១៩ នេះ សមត្ថកិច្ចបានចុះប្រតិបត្តិការបង្ក្រាបក្លិបកម្សាន្តធំៗ ក្នុងរាជធានីភ្នំពេញចំនួន ៣ រួចមកហើយបូករួមនឹងក្លិបកម្សាន្ត លុច្សសារី ខណៈដែលកាលពីចុងខែកុម្ភៈកន្លងទៅ កម្លាំងនគរបាលបានសម្រុកចូលក្លិបកម្សាន្តរ៉ុក ដោយបានឃាត់មនុស្សជាង ៣០០ នាក់ ហើយរឹបអូសបានថ្នាំ ញៀនជាង ៥០ គីឡូក្រាម និងឈានដល់ឃាត់ខ្លួនម្ចាស់ក្លិបកម្សាន្តរ៉ុក គឺលោកឧកញ៉ា គិត ធាង ទៀតផង។
ចំណែកមួយករណីទៀត គឺកាលពីពាក់កណ្តាលខែមេសា សមត្ថកិច្ចបានចុះបង្ក្រាបក្លិបកម្សាន្ត «ម៉ៃអាមី» ដោយបានឃាត់ខ្លួនមនុស្សប្រុសស្រីជាង ៥០ នាក់ និងបានរឹបអូសគ្រឿងញៀនជាង ១០ គីឡូក្រាម ជាមួយម្ចាស់ក្លិប «ម៉ៃអាមី» ឈ្មោះ ស្រេន វីរៈ និងបុគ្គលិកចំនួន ៦ នាក់ទៀត ត្រូវបានចាប់បញ្ជូនទៅកាន់តុលាការ ដោយចោទប្រកាន់ពាក់ព័ន្ធនឹងបទល្មើសគ្រឿងញៀន៕
