.jpg)
ជនសង្ស័យ ២ នាក់ ត្រូវបានសមត្ថកិច្ចឃាត់ខ្លួន ក្រោយពីឆក់ទូរស័ព្ទដៃពីជនបរទេសម្នាក់នៅក្នុងតំបន់ចំណតរថយន្តឈ្នួលជិតតំបន់ផ្សារធំថ្មី។ រូបថត នគរបាល
ភ្នំពេញ៖ នគរបាលសង្កាត់ផ្សារថ្មី ២ ខណ្ឌដូនពេញ បានប្រដេញចាប់បានជនសង្ស័យ ២ នាក់ ក្រោយពីឆក់ទូរស័ព្ទដៃពីជនបរទេសម្នាក់នៅក្នុងតំបន់ចំណតរថយន្តឈ្នួលជិតតំបន់ផ្សារធំថ្មី កាលពីថ្ងៃទី ៤ ខែតុលា។
លោក អ៊ា ភារម្យ នាយនគរបាលប៉ុស្តិ៍ផ្សារថ្មីទី ២ បានឲ្យដឹងកាលពីម្សិលមិញថា ជនសង្ស័យទាំង ២ នាក់ឈ្មោះ សុង ពេជ្រ អាយុ ៣១ ឆ្នាំ មានរបជាកម្មករលីសែងឥវ៉ាន់នៅតាមបេនឡាន និងម្នាក់ទៀតឈ្មោះ ស្រ៊ុន ណារ៉ុង អាយុ ២៥ ឆ្នាំ គ្មានមុខរបរ។
លោក ភារម្យ ថ្លែងថា៖ «ចោរឆក់ ២ នាក់នោះ ខ្ញុំធ្វើរបាយការណ៍បញ្ជូនទាំងមនុស្សទៅសាលាខណ្ឌហើយព្រឹក (ថ្ងៃទី ៥ តុលា) ហើយពួកគេត្រូវចាប់កោសក់ផងដែរមុនបញ្ជូនទៅតុកាលារ»។
លោកក៏បានឲ្យដឹងទៀតថា កាលពីវេលាម៉ោងជាង ៩ ព្រឹក ថ្ងៃទី ៤ តុលា មានបុរសវ័យចំណាស់ជនជាតិអាមេរិកម្នាក់កំពុងធ្វើដំណើរដោយថ្មើជើងនៅម្តុំចំណតរថយន្តឈ្នួលបាត់ដំបង, ពោធិសាត់ក្នុងសង្កាត់ផ្សារថ្មីទី ២ ខណ្ឌដូនពេញ។ ខណៈនោះ មានជនសង្ស័យ២នាក់ជិះម៉ូតូមួយគ្រឿង មកក្បែរជនបរទេសរូបនោះ បានឆក់យកទូរស័ព្ទ Iogibe X ពណ៌សពីក្នុងហោប៉ៅ ហើយជិះម៉ូតូគេចខ្លួនតែម្តង។
ប៉ុន្តែដោយសារជនរងគ្រោះព្រមទាំងអ្នកដំណើរស្រែកឆោឡោ និងមានសមត្ថកិច្ចឈរជើងនៅម្តុំនោះឮក៏បានដេញតាមរហូតដល់ស្ថានទូតអាមេរិកាំង ជិតរម្មណីយដ្ឋានវត្តភ្នំទើបចាប់ពួកគេបាន។ ក្រោយចាប់ខ្លួនក្រុមជនសង្ស័យបានឆ្លើយសារភាពប្រាប់សមត្ថកិច្ច ដោយបានអះអាងថា ពួកគេធ្លាប់ធ្វើសកម្មភាពឆក់កាបូបលុយនិងទូរស័ព្ទអ្នកដំណើរបានចំនួន៨លើកមកហើយ។ ចំពោះលុយកាក់ដែលឆក់បានម្តងៗគឺពួកគេយកទៅដើរស៊ីចាយអស់ហើយ។ រីឯទូរស័ព្ទទៀតសោតក៏លក់ចាយអស់ដែរ។
លោក ស៊ឹង សែនករុណា មន្រ្តីស៊ើបអង្កេតជាន់ខ្ពស់នៃសមាគមការពារសិទ្ធិមនុស្សអាដហុកបានឲ្យដឹងថា មានកត្តាដែលចោរឆក់សម្ភារតាមផ្លូវ អាចពាក់ព័ន្ធវិបត្តិអត់ការងារធ្វើ និងការប្រើប្រាស់គ្រឿងញៀនឬសេពគ្រឿងស្រវឹងជាដើមដែលធ្វើឲ្យប៉ះពាល់ដល់សណ្តាប់ធ្នាប់សន្តិសុខសង្គម ដែលបណ្តាលមកពីអំពើឆក់ប្លន់និងអំពើហិង្សានេះ៕
