ពោធិ៍សាត់ៈ សាលាដំបូងខេត្តពោធិ៍សាត់ដោះលែងជនសង្ស័យ ២ នាក់ ឲ្យនៅក្រៅឃុំបណ្ដោះអាសន្ន បន្ទាប់ពីមន្ត្រីបរិស្ថានខេត្តនេះបញ្ជូនជនសង្ស័យទាំង ២ ទៅតុលាការនៅថ្ងៃទី ៩ ឧសភា ក្រោយពីសមត្ថកិច្ចឃាត់ខ្លួនពាក់ព័ន្ធនឹងការឈូសឆាយដីព្រៃជួរភ្នំក្រវាញនៅក្នុងខេត្តពោធិ៍សាត់។
លោក ហេង ដូនីន អ្នកនាំពាក្យសាលាដំបូងខេត្តពោធិ៍សាត់ថ្លែងពីម្សិលមិញថា ចៅក្រមស៊ើបសួរនៃសាលាដំបូងខេត្តដោះលែងជនសង្ស័យ ២ នាក់ ឲ្យនៅក្រៅឃុំបណ្ដោះអាសន្ន ដោយសារជនសង្ស័យទាំង ២ នាក់ ជាអ្នកបើកបរត្រាក់ទ័រឲ្យបុគ្គលផ្សេងទៀត។
លោកថា៖ «ខ្ញុំអត់ចាំឈ្មោះពួកគាត់ទាំង ២ នាក់ទេ ប៉ុន្ដែលោកចៅក្រមមិនបានឃុំខ្លួនជនសង្ស័យទាំង ២ នាក់នេះព្រោះពួកគាត់បានសារភាពថា គាត់ជាអ្នកបើកបរត្រាក់ទ័រឲ្យគេទេ ដូច្នេះយើងឲ្យគាត់នៅក្រៅឃុំសិន។ យើងនៅបន្តស្រាវជ្រាវរកអង្គហេតុពាក់ព័ន្ធបន្ថែមទៀត»។
លោក ប៉ាន់ មរកត ប្រធានមន្ទីរបរិស្ថានខេត្តពោធិ៍សាត់ប្រាប់ពីម្សិលមិញថា កាលពីថ្ងៃទី ៩ ឧសភា ជនសង្ស័យ ២ នាក់ ក្នុងចំណោមបក្ខពួក ៦ នាក់ ត្រូវបានមន្ត្រីនៃមន្ទីរ បរិស្ថានខេត្តពោធិ៍សាត់បញ្ជូនខ្លួន និងសំណុំរឿងទៅតុលាការចាត់ចែងតាមនីតិវិធីច្បាប់។
លោកថា ជនសង្ស័យ ៦ នាក់ ត្រូវបានសមត្ថកិច្ចឃាត់ខ្លួនកាលពីថ្ងៃទី ៨ ឧសភា ខណៈពួកគេកំពុងយកគ្រឿងចក្រ ៧ គ្រឿង ទៅលួចឈូសឆាយដីព្រៃនៃជួរភ្នំក្រវាញ ខេត្តពោធិ៍សាត់។ ពួកគេឈូសឆាយដីព្រៃបានជាង ១០ ហិកតាហើយ ប៉ុន្ដែសមត្ថកិច្ចបានចុះទៅបង្ក្រាបទាន់ពេលវេលា។
លោកបញ្ជាក់ថា៖ «ដោយពួកគាត់បានសារភាពថា ៤ នាក់ គឺជាអ្នកដាំបាយស្ល និងខ្លះស៊ីឈ្នួលបើកបរត្រាក់ទ័រឲ្យគេទេ ហើយគាត់ថាមិនបានដឹងរឿងអ្វីទេ ហើយ យើងបានដោះលែងវិញ។ រីឯ ២ នាក់ទៀត យើងបានបញ្ជូនទៅតុលាការព្រោះ ២ នាក់នេះជាមេការ និងជាអ្នកគ្រប់គ្រងគ្រឿងចក្រទាំង ៧ គ្រឿងនេះ ប៉ុន្ដែខ្ញុំអត់ដឹងនីតិវិធីរបស់តុលាការសម្រេចយ៉ាងណាទេ»។ លោកថា សមត្ថកិច្ចនៅតែបន្តស្រាវជ្រាវរកអ្នកនៅពីក្រោយ ជនសង្ស័យទាំង ៦ នាក់នាំខ្លួនមកផ្តន្ទាទោសតាមច្បាប់៕