.jpg)
បុរស ២ នាក់លួចកាត់ខ្សែភ្លើងត្រូវបានចាប់ខ្លួននៅថ្ងៃ ៣០ មីនា នៅខេត្តព្រះសីហនុ។ រូប ប៉ូលិស
ព្រះសីហនុៈ សមត្ថកិច្ចនគរបាលខេត្តព្រះសីហនុកំពុងបន្តសាកសួរជនសង្ស័យ ២ នាក់ពីម្សិលមិញ ដែលបានលួចកាត់ខ្សែភ្លើងបំភ្លឺផ្លូវសាធារណៈក្នុងគម្រោងនៃការស្ថាបនាផ្លូវ ៣៤ ខ្សែក្នុងខេត្ដនេះអស់ជាច្រើនកន្លែង ស្ថិតនៅភូមិគគីរ ឃុំបិតត្រាំង ស្រុកព្រៃនប់។
លោក កុល ផល្លី ស្នងការរងនៃស្នងការដ្ឋាននគរបាលខេត្ដព្រះសីហនុបានថ្លែងពីម្សិលមិញថា កម្លាំងសមត្ថកិច្ចនៃអធិការដ្ឋាននគរបាលក្រុងព្រះសីហនុសហការជាមួយអធិការដ្ឋាននគរបាលស្រុកព្រៃនប់ និងប៉ុស្តិ៍នគរបាលឃុំបិតត្រាំង បង្ក្រាបករណីលួចខ្សែភ្លើងបំភ្លឺផ្លូវសាធារណៈដែលជាគម្រោងនៃការស្ថាបនាផ្លូវ ៣៤ ខ្សែក្នុងខេត្ត ដោយបានរៀបចំឡើងបែបទំនើបកប់នៅក្នុងដី។ ករណីនេះសមត្ថកិច្ចបានឃាត់ខ្លួនជនសង្ស័យចំនួន ២ នាក់ កាលពីថ្ងៃទី ៣០ ខែមីនា ស្ថិតនៅភូមិគគីរ ឃុំបិតត្រាំង ស្រុកព្រៃនប់ ខេត្តព្រះសីហនុ។
លោកបានឱ្យដឹងថាជនសង្ស័យបានធ្វើសកម្មភាពលួចកាត់ខ្សែភ្លើងបំភ្លឺផ្លូវសាធារណៈដែលទើបដាក់ថ្មីនៅតាមផ្លូវជាតិលេខ ៤ ក្បែរផ្លូវចូលតំបន់ក្បាលឆាយក្នុងសង្កាត់លេខ ១ និងតាមផ្លូវបំបែកទៅវត្តអូរត្រេះស្ថិតក្នុងសង្កាត់លេខ ៤ ក្រុងព្រះសីហនុចាប់តាំងពីថ្ងៃទី ២៧ រហូតថ្ងៃទី ២៩ ខែ មីនា ឆ្នាំ ២០២១។
លោកថ្លែងថា៖ «បច្ចុប្បន្នជនសង្ស័យទាំង ២ នាក់ កំពុងឃាត់ខ្លួននៅអធិការដ្ឋាននគរបាលក្រុងព្រះសីហនុ ដើម្បីចាត់ការបន្តទៅតាមនីតិវិធី។ សមត្ថកិច្ចយើងនៅបន្តសាកសួរពួកគាត់នៅឡើយ»។
យោងតាមរបាយការណ៍របស់មន្ដ្រីនគរបាលខេត្ដ ជនសង្ស័យទាំង ២ នេះ ១ ឈ្មោះ សុច ចាន់ឌី ភេទប្រុស អាយុ ១៨ ឆ្នាំ មុខរបរមិនពិតប្រាកដ។ ២ ឈ្មោះ សុច ចាន់ធួន ភេទប្រុស អាយុ ២១ ឆ្នាំ មុខរបរមិនពិតប្រាកដ។ ជនសង្ស័យទាំង ២ ស្នាក់នៅភូមិគគីរ ឃុំបិតត្រាំង ស្រុកព្រៃនប់ ខេត្តព្រះសីហនុ។
របាយការណ៍ដដែលឱ្យដឹងថា វត្ថុតាងដែលដកហូតបានរួមមាន សម្បកខ្សែភ្លើង និងបន្ទះលួសរុំខ្សែភ្លើងមួយចំនួនធំ ពូថៅដៃចំនួន ២ (តូច ១) រណារអារដែក ១ កាំបិតផ្គាក់ចំនួន ២ ចម្ពាមកៅស៊ូសម្រាប់បាញ់គ្រាប់ដែកចំនួន ១ ម៉ូតូ ១ គ្រឿងម៉ាក Exicter ពណ៌ខ្មៅ គ្មានស្លាកលេខ ស្ពាន់ខ្សែភ្លើងប្រភេទ Thipha Cable 2020 ចំនួន ៣ បាវ។
តាមរយៈចម្លើយសារភាពពីជនសង្ស័យទាំង ២ នាក់ មន្ដ្រីនគរបាលក៏បានបន្តចុះទៅត្រួតពិនិត្យស្រាវជ្រាវនៅទីតាំងទទួលផលចោរកម្មដែលស្ថិតនៅភូមិគគីរ ឃុំបិតត្រាំង ស្រុកព្រៃនប់ដែលមានម្ចាស់ផ្ទះឈ្មោះ ឡុញ សឿ ភេទប្រុស អាយុ ៥២ ឆ្នាំ មុខរបរទិញលក់អេតចាយស្ថិតនៅភូមិគគីរ ឃុំបិតត្រាំង ស្រុកព្រៃនប់នេះដែរ ដើម្បីនាំខ្លួនមកសាកសួរបន្ត។
លោក ឃាង ភារម្យ អ្នកនាំពាក្យរដ្ឋបាលខេត្ដព្រះសីហនុថ្លែងថា កន្លងមកករណីជនល្មើសលួចកាត់ខ្សែភ្លើងសមត្ថកិច្ចបានឃាត់ខ្លួន និងបញ្ជូនជនសង្ស័យទៅកាត់ទោសតាមនីតិវិធីតុលាការមួយចំនួនហើយ។ ប៉ុន្ដែក្នុងពេលថ្មីៗនេះ មានកើតឡើងករណីថ្មី ទើបសមត្ថកិច្ចស្រាវជ្រាវរហូតឈានដល់ឃាត់ខ្លួនជនសង្ស័យបានចំនួន ២ នាក់ខាងលើនេះ។
លោកបន្តថា៖ «ជនសង្ស័យទាំង ២ នាក់នេះកំពុងស្ថិតនៅក្នុងនីតិវិធីនៃការសាកសួររបស់សមត្ថកិច្ចនៅឡើយ។ ចំពោះសកម្មភាពលួចកាត់ខ្សែភ្លើងបំភ្លឺផ្លូវសាធារណៈនេះ កន្លងមកសមត្ថកិច្ចឃាត់ខ្លួនបានជាបន្តបន្ទាប់ ទាំងអ្នកប្រព្រឹត្ដ និងអ្នកទទួលផលចោរកម្ម»៕
