.jpg)
ជនសង្ស័យទាំង ២ ដែលត្រូវបានឃុំខ្លួនករណីប្រើឈ្មោះថ្នាក់ដឹកនាំដើម្បីឆបោក។ រូបថត អាវុធហត្ថ
ភ្នំពេញៈ សាលាដំបូងរាជធានីភ្នំពេញ បានសម្រេចចោទប្រកាន់ និងឃុំខ្លួនជនសង្ស័យ ២ នាក់ ពីបទឆបោក បន្ទាប់ពីពួកគេបានក្លែងបន្លំជាសាច់ញាតិមន្ត្រីជាន់ខ្ពស់នៃព្រឹទ្ធសភាម្នាក់ ដោយបានបោកប្រាស់យកប្រាក់រាប់ម៉ឺនដុល្លារ ពីជនរងគ្រោះប្រមាណ ១០០ នាក់ ជាថ្នូរជួយរត់ការចូលបម្រើការក្នុងក្របខ័ណ្ឌកងទ័ព។
ជនសង្ស័យទាំង ២ នាក់ ត្រូវបានអាវុធហត្ថរាជធានីភ្នំពេញ បញ្ជូនទៅតុលាការ កាលពីថ្ងៃអង្គារ បន្ទាប់ពីត្រូវបានឃាត់ខ្លួនជាបន្តបន្ទាប់ ដោយជនសង្ស័យទី១ មានឈ្មោះថា ប៊ិន ឡាច ហៅ វ៉ែន សារ៉ាត់ ភេទប្រុស អាយុ ៥៧ ឆ្នាំ ត្រូវបានឃាត់ខ្លួន កាលពីថ្ងៃទី ៩ ខែ សីហា នៅចំណុចភោជនីយដ្ឋាន ណាន ជីង សង្កាត់មិត្តភាព ខណ្ឌ ៧មករា។ ចំណែកជនសង្ស័យទី២ មានឈ្មោះ តុប គឹមហុង ហៅ យឹម ឈុនហុង ភេទប្រុស ៤៦ ឆ្នាំ ដោយត្រូវបានឃាត់ខ្លួន កាលពីព្រឹកថ្ងៃទី ១២ ខែ សីហា ត្រង់ចំណុចទល់មុខភោជនីយដ្ឋានព្រឹកថ្មីល្ងាចស្រស់ ផ្លូវ ១១៥ កែង ២៧៤ សង្កាត់បឹងព្រលឹត ខណ្ឌ៧មករា។ នេះបើតាមរបាយការណ៍របស់កងរាជអាវុធហត្ថរាជធានីភ្នំពេញ។
លោក គុជ គឹមឡុង អ្នកនាំពាក្យសាលាដំបូងរាជធានីភ្នំពេញ បានប្រាប់តាមប្រព័ន្ធតេឡេក្រាមពីម្សិលមិញថា៖ «កិច្ចការហ្នឹង តំណាងអយ្យការ យើងបានចោទប្រកាន់ពីបទឆបោកហើយ។ ចៅក្រមស៊ើបសួរបានសម្រេចឃុំខ្លួនហើយ»។
តាមកងរាជអាវុធហត្ថរាជធានីភ្នំពេញ អះអាងថា ជនសង្ស័យ បានសារភាពថា ពួកគេបានប្តូរឈ្មោះ តុប គឹមហុង ទៅជាឈ្មោះ យឹម គឹមហុង ដោយកុហកជនរងគ្រោះថា ជាបងប្អូនជីដូនមួយរបស់លោក យឹម លាង ដែលមានតំណែងជានាយករងខុទ្ទកាល័យប្រធានព្រឹទ្ធសភា លោក សាយ ឈុំ។ ក្នុងនោះក៏បានកុហកជនរងគ្រោះផ្សេងទៀតថា នៅពេលឆាប់ៗខាងមុខនេះ លោក យឹម លាង នឹងទៅកាន់អគ្គនាយកដ្ឋានវិស្វកម្ម ហើយបង្កើតនាយកដ្ឋានថ្មីចំនួន ៦ ត្រូវការជ្រើសរើសបុគ្គលិកចំនួន ៣០០ នាក់ ហើយអាចបញ្ចូលក្របខ័ណ្ឌបាន។
កងរាជអាវុធហត្ថរាជធានីភ្នំពេញ បានបញ្ជាក់ក្នុងរបាយការណ៍របស់ខ្លួនថា៖ «ពួកគេបានធ្វើសកម្មភាពបែបនេះ ឆបោកប្រាក់ពីជនរងគ្រោះ សរុបប្រមាណ ១០០ នាក់ហើយ។ តែពុំមានជនរងគ្រោះណាម្នាក់បានចូលក្របខ័ណ្ឌឡើយ រហូតមានជនរងគ្រោះម្នាក់មានការសង្ស័យ ក៏ប្តឹងមកកងរាជអាវុធហត្ថរាជធានីភ្នំពេញ ឲ្យជួយធ្វើការស្រាវជ្រាវ រហូតឈានដល់ធ្វើការឃាត់ខ្លួនជនសង្ស័យតែម្តង»។
តាមការអះអាង ការរត់ការចូលក្របខ័ណ្ឌកងទ័ព គឺត្រូវចំណាយប្រាក់ទៅតាមឋានន្តរស័ក្តិ ក្នុងនោះថ្នាក់វរសេនីយ៍ តម្លៃ ៥ ៥០០ ដុល្លារ ទៅ ៦ ០០០ ដុល្លារ។ ថ្នាក់អនុសេនីយ៍ឯក តម្លៃ ៤ ៥០០ ដុល្លារ ទៅ ៥ ០០០ ដុល្លារ។ ថ្នាក់អនុសេនីយ៍ទោ តម្លៃ ៣ ៥០០ ដុល្លារ ទៅ ៤ ០០០ ដុល្លារ។ ថ្នាក់អនុសេនីយ៍ត្រី តម្លៃ ២ ០០០ ដុល្លារ ទៅ ២ ៥០០ ដុល្លារ និងថ្នាក់ពលទាហាន តម្លៃ ៧០០ ដុល្លារ ទៅ ១ ០០០ ដុល្លារ។
លោក យឹម លាង ដែលជនសង្ស័យបានប្រើឈ្មោះលោកដើម្បីបោកប្រាស់ប្រជាពលរដ្ឋនេះ មិនអាចសុំការអត្ថាធិប្បាយបានទេពីម្សិលមិញ។ ប៉ុន្តែលោក ម៉ម ប៊ុននាង អ្នកនាំពាក្យព្រឹទ្ធសភា ប្រាប់ភ្នំពេញប៉ុស្តិ៍ពីម្សិលមិញថា រឿងនេះមិនពាក់ព័ន្ធនឹងស្ថាប័នព្រឹទ្ធសភានោះទេ ព្រោះវាគឺជារឿងបុគ្គល។ ជនសង្ស័យទាំងនោះ បានប្រើឈ្មោះថ្នាក់ដឹកនាំ ដើម្បីប្រព្រឹត្តទង្វើបែបនេះ សមត្ថកិច្ចត្រូវតែមានវិធានការឲ្យបានតឹងរ៉ឹង និងធ្ងន់ធ្ងរបំផុតដល់ពួកគេ ដោយមិនត្រូវឲ្យរួចខ្លួននោះឡើយ។
លោកបញ្ជាក់ថា៖ «បុគ្គលហ្នឹងបានចោទគាត់ (លោក យឹម លាង) ហើយខាងសមត្ថកិច្ចនឹងស្រាវជ្រាវរកឲ្យឃើញ ហើយអត់មានទេ គឺបុគ្គលហ្នឹង ដើរយកកេរ្តិ៍ឈ្មោះ ឬនាមថ្នាក់ដឹកនាំមួយគំនរ។ តាមពិតឯកឧត្តម (យឹម លាង) គាត់មិនដែលធ្វើរឿងអ៊ីចឹងទេ ខ្ញុំសុខចិត្តធានាអះអាងថា គាត់ត្រឹមត្រូវណាស់ គាត់អត់ធ្វើអ្វីមួយឲ្យប៉ះពាល់ដល់ស្ថាប័នព្រឹទ្ធសភាទេ។ លោកអត់ដឹងទេ បើសិនជាដឹងក៏លោកទៅផ្តល់ចម្លើយទៅខាងសមត្ថកិច្ចហើយ។ ខ្ញុំសូមការពារឯកឧត្តម យឹម លាង មិនប្រព្រឹត្តអ៊ីចឹងទេ»។
លោក ព្រាប កុល នាយកប្រតិបត្តិអង្គការតម្លាភាពកម្ពុជា បាននិយាយថា ការបោកប្រាស់ប្រភេទនេះ ជាបទល្មើសជាក់ស្តែង តែមនុស្សនៅតែធ្លាក់ក្នុងការបោកប្រាស់នេះ។ ពីព្រោះ វាគឺជាទម្លាប់ទូទៅ ទៅហើយ ខណៈមន្ត្រីមួយចំនួនក៏ប្រើប្រាស់ទម្លាប់នេះ នៅពេលពួកគេទទួលសំណូកជាថ្នូរនឹងការផ្តល់តួនាទីក្នុងក្របខ័ណ្ឌណាមួយឲ្យនរណាម្នាក់។
លោកបញ្ជាក់ថា៖ «ដូច្នេះគេមិនអាចបែងចែកពីភាពខុសគ្នាចំពោះវាបានទេ រវាងការបោកប្រាស់ ឬជាទម្លាប់ធម្មតា។ វាគឺជារឿងដែលល្អ នៅពេលមានគេរាយការណ៍នូវអ្វីដែលពួកគេឃើញ ឬឮអំពីសកម្មភាពបែបនេះរួចហើយអាជ្ញាធរត្រូវចាប់ខ្លួនអ្នកប្រព្រឹត្តសកម្មភាពបែបនេះ»៕
