.jpg)
ជនសង្ស័យ ៣ នាក់ ត្រូវបានតុលាការឃុំខ្លួន ពាក់ព័ន្ធការជួញដូរគ្រឿងញៀន នៅភូមិអង្គបក្សី ឃុំជាងទង ស្រុកត្រាំកក់។ រូបថត ប៉ូលិស
តាកែវ៖ បុរស ៣ នាក់ ត្រូវបានតុលាការខេត្តតាកែវសម្រេចចោទប្រកាន់ និងបញ្ជូនទៅឃុំខ្លួនក្នុងពន្ធនាគារខេត្ត នៅថ្ងៃទី ២០ ខែមេសា ក្រោយពីកម្លាំងកងរាជអាវុធហត្ថខេត្តតាកែវ ចាប់ខ្លួនកាលពីថ្ងៃទី ១៧ ខែមេសា ខណៈជនទាំង ៣ នាក់ កំពុងធ្វើសកម្មភាពជួញដូរគ្រឿងញៀននៅភូមិអង្គបក្សី ឃុំជាងទង ស្រុកត្រាំកក់។
មន្ត្រីអះអាងថា បទល្មើសគ្រឿងញៀនមានការថយចុះ អំឡុងពេលបិទខ្ទប់រាជធានី-ខេត្ត ដើម្បីទប់ស្កាត់ការឆ្លងរាលដាលកូវីដ។
លោក ង៉ែត ចាន់ធី មេបញ្ជាការរងកងរាជអាវុធហត្ថខេត្តតាកែវ ទទួលការងារបង្ក្រាបគ្រឿងញៀនបានប្រាប់ ភ្នំពេញ ប៉ុស្តិ៍ នៅថ្ងៃទី ២១ មេសាថា ជនសង្ស័យទាំង ៣ មានឈ្មោះ សេន រតនៈ អាយុ ៣៨ ឆ្នាំ ឈ្មោះ ស្ងួន ចំរើន អាយុ ២៨ ឆ្នាំ និងនាក់ រឿន អាយុ ២៨ ឆ្នាំ។
លោកថ្លែងថា៖ «ជនទាំង ៣ នាក់នេះ ត្រូវបានលោកចៅក្រម ហុង សុងហ៊ាង ចេញដីកាឃុំខ្លួនក្នុងពន្ធនាគារខេត្ត តាមបទចោទមាត្រា ៤០ និងមាត្រា ៤៥ ច្បាប់ស្តីពីការត្រួតពិនិត្យគ្រឿងញៀន»។
លោកប្រាប់ថា នៅវេលាម៉ោងជាង ១ រសៀលថ្ងៃទី ១៧ មេសា គឺកម្លាំងការិយាល័យប្រឆាំងគ្រឿងញៀនរបស់កងរាជអាវុធហត្ថខេត្ត សហការជាមួយកម្លាំងអាវុធហត្ថស្រុកត្រាំកក់ ដែលមានការសម្របសម្រួលផ្លូវច្បាប់ពីលោកព្រះរាជអាជ្ញាសាលាដំបូងខេត្ត លោក ជីវ ចាន់តារា បានចុះបង្ក្រាបករណីជួញដូរគ្រឿងញៀន នៅចំណុចភូមិអង្គបក្សី ឃុំជាងទង ស្រុកត្រាំកក់ ដោយឃាត់ខ្លួនជនទាំង ៣ នាក់ ដូចមានឈ្មោះខាងលើ ខណៈពួកគេកំពុងជួញដូរគ្រឿងញៀន។
ចំពោះវត្ថុតាង ដែលសមត្ថកិច្ចដកហូតបានពីជនសង្ស័យរួមមាន ម្សៅថ្នាំមេតំហ្វេតាមីន ចំនួន ១៧៤ ៧០ ក្រាម ទូរស័ព្ទចំនួន ៥ គ្រឿង ពិលអេឡិចត្រូនិក ចំនួន ២ គ្រឿង ម៉ូតូចំនួន ២ គ្រឿង និងសម្ភារសម្រាប់វេចខ្ចប់គ្រឿងញៀនមួយចំនួនទៀត។
ពាក់ព័ន្ធគ្រឿងញៀននេះដែរ លោក មាស វីរិទ្ធ អគ្គលេខាធិការនៃអាជ្ញាធរជាតិប្រយុទ្ធប្រឆាំងគ្រឿងញៀនប្រាប់ ភ្នំពេញ ប៉ុស្តិ៍ នៅថ្ងៃទី ២១ មេសា ថា នៅអំឡុងពេលនៃការរឹតបន្តឹង និងការអនុវត្តវិធានការបិទខ្ទប់ ដើម្បីទប់ស្កាត់ការរីករាលដាលជំងឺកូវីដ ១៩ គឺសមត្ថកិច្ចបានអនុវត្តព្រមគ្នា ទាំងការបង្ក្រាបបទល្មើសគ្រឿងញៀន ទាំងការអនុវត្តបទបញ្ជាបិទខ្ទប់មិនឲ្យមានការធ្វើដំណើររបស់ប្រជាពលរដ្ឋ។
លោកថា បញ្ហាបទល្មើសគ្រឿងញៀនដែលសមត្ថកិច្ចបង្ក្រាបបានក្នុងអំឡុងពេលនេះ ដោយសារជនដែលធ្លាប់ប្រើប្រាស់គ្រឿងញៀន ពួកគេញៀនហើយអត់មិនបាន ក៏ចេញមករកទិញគ្រឿងញៀន។ ដូច្នេះទើបគេឃើញការបង្ក្រាបបទល្មើសគ្រឿងញៀននៅតែកើតមាន។
លោកបញ្ជាក់ថា៖ «អំឡុងពេលនេះ បញ្ហាបង្ក្រាបបទល្មើសគ្រឿងញៀនមានការថយចុះ។ គ្រឿងញៀនដែលឈ្មួញចេញមកធ្វើសកម្មភាពសុទ្ធតែគ្រឿងញៀនដែលនៅសេសសល់ក្នុងស្រុក»៕
