.jpg)
ជនសង្ស័យ (ពាក់ម៉ាស) ករណីរឿងស្ត្រីស៊ីឈ្នួលពពោះជំនួសត្រូវបានដឹកមកកាន់សាលាដំបូងរាជធានីភ្នំពេញកាលពីម្សិលមិញ។ ផា លីណា
ភ្នំពេញៈ ជន ៥ នាក់ក្នុងនោះមានជនជាតិចិនម្នាក់ដែលសង្ស័យជាមេខ្លោងរកស៊ីជួលស្ត្រីខ្មែរឲ្យពពោះជំនួសត្រូវបានបញ្ជូនទៅសាលាដំបូងរាជធានីភ្នំពេញ ដើម្បីធ្វើការសាកសួរបន្ថែមកាលពីម្សិលមិញ ខណៈស្ត្រីដែលស៊ីឈ្នួលពពោះជំនួសចំនួន ៣៣ នាក់ត្រូវបានបញ្ជូនយកទៅថែទាំនៅអង្គការក្រៅរដ្ឋាភិបាលមួយ។
កាលពីថ្ងៃទី ២១ ខែមិថុនាសមត្ថកិច្ចបានចុះបង្ក្រាបផ្ទះមួយនៅក្នុងខណ្ឌឫស្សីកែវ រាជធានីភ្នំពេញដោយបានធ្វើការឃាត់ខ្លួនមនុស្សចំនួន ៣៨ នាក់ក្នុងនោះមានស្ត្រីចំនួន ៣៣ នាក់ដែលសុទ្ធតែមានផ្ទៃពោះ ដោយសារតែស៊ីឈ្នួលពពោះជំនួស និង ៥ នាក់ទៀតត្រូវបានសង្ស័យថាគឺជាមេខ្លោងដែលជាអ្នករកស៊ីជួលស្ត្រីទាំងនោះឲ្យពពោះជំនួស។
លោក កែវ ធា ប្រធានការិយាល័យនគរបាលប្រឆាំងការជួញដូរមនុស្សរាជធានីភ្នំពេញបានឲ្យដឹងថា ជនសង្ស័យទាំង ៥ នាក់ត្រូវបានសាកសួរដោយព្រះរាជអាជ្ញានៃសាលាដំបូងរាជធានីកាលពីម្សិលមិញ។
លោក ធា ថ្លែងថា៖ «យើងបានបញ្ជូនមនុស្ស ៥ នាក់ទៅសាលាដំបូងរាជធានីភ្នំពេញ។ ខ្ញុំបានឮការរាយការណ៍ អំពីការមិនទាន់ចោទប្រកាន់មនុស្សទាំងនោះ»។ លោកបន្ថែមថា ស្ត្រីចំនួន ៣៣ នាក់ដែលត្រូវបានរកឃើញថាកំពុងមានផ្ទៃពោះដោយសារតែការស៊ីឈ្នួលពពោះជំនួសត្រូវតែទទួលខុសត្រូវចំពោះកូននៅក្នុងផ្ទៃរបស់ពួកគេនៅពេលដែលកូននោះកើត។
លោកនិយាយថា៖ «កូនកើតពីពោះរបស់ស្ត្រីទាំងនោះ ដូច្នេះពួកគេត្រូវតែមើលថែរក្សា។ កូនទាំងនោះជាកូនរបស់ពួកគេ។ ខ្ញុំបានបញ្ជូនពួកគេទៅមន្ទីរសង្គមកិច្ចរួចហើយ»។
ជនសង្ស័យត្រូវបញ្ជូនទៅសាលាដំបូងរាជធានីម្សិលមិញ។ ផា លីណា
លោក ធា បន្ថែមថាស្ត្រីទាំងនោះអាចនឹងត្រូវផ្តន្ទាទោសទៅតាមច្បាប់ ប្រសិនបើពួកគេត្រូវបានរកឃើញថាបានយកប្រាក់ និងបោះបង់កូនរបស់ពួកគេទៅឲ្យអ្នកដទៃ។ «ពួកគេត្រូវបានជួលសម្រាប់ការជួលស្បូន។ រដ្ឋាភិបាលបានចេញសេចក្តីណែនាំរួចហើយមិនឲ្យធ្វើដូច្នេះម្តងទៀតពួកគេចង់បានប្រាក់។ ហេតុដូច្នេះតាមច្បាប់កូនដែលកើតពីស្បូនណាមួយ កូននោះជារបស់អ្នកនោះ។ ដូច្នេះកូននោះគឺជាកូនរបស់ពួកគេហើយប្រសិនបើនៅពេលកូននោះកើត ហើយស្ត្រីទាំងនោះយកកូននោះទៅឲ្យអ្នកដទៃ ហើយយកប្រាក់ដើម្បីបោះបង់កូន ដូច្នេះពួកគេអាចត្រូវផ្តន្ទាទោសទៅតាមច្បាប់។ ពួកគេបំពានអ្វីដែលអាជ្ញាធរហាមប្រាម។ ឥឡូវនេះករណីនេះកំពុងកើតឡើង ដូច្នេះពួកគេត្រូវតែទទួលខុសត្រូវ»។
លោកស្រី មុំ ចាន់ដានី ប្រធានមន្ទីរសង្គមកិច្ចរាជធានីភ្នំពេញបានឲ្យដឹងថា ស្ត្រីទាំងនោះកំពុងស្ថិតនៅក្រោមការថែទាំរបស់អង្គការក្រៅរដ្ឋាភិបាលមួយ។ «ស្ត្រីទាំងនោះឥឡូវនេះមានសុវត្ថិភាព...អង្គការមើលថែពួកគេ»។
លោក លី សុផាន់ណា អ្នកនាំពាក្យសាលាដំបូងរាជធានីមិនអាចទាក់ទងសុំអធិប្បាយបានទេកាលពីយប់មិញ៕ PS
