.jpg)
ជនសង្ស័យពាក់ព័ន្ធគ្រឿងញៀនត្រូវសមត្ថកិច្ចឃាត់ខ្លួន។ រូបថត នគរបាល
សីហនុៈ ជនសង្ស័យដែលជាជនជាតិចិនចំនួន ៩ នាក់ ក្នុងចំណោមជនសង្ស័យជិត ៤០០ នាក់ ដែលត្រូវបានឃាត់ខ្លួនពីក្លិបកម្សាន្តមួយត្រូវបានបញ្ជូនទៅតុលាការកាលពីថ្ងៃសៅរ៍ បន្ទាប់ពីរកឃើញថា ពួកគេមានជាប់ពាក់ព័ន្ធក្នុងការជួញដូរ និងប្រើប្រាស់គ្រឿងញៀន ខណៈដែលសមត្ថកិច្ចពាក់ព័ន្ធបានសម្រេចបិទក្លិបនោះ។
ស្នងការនគរបាលខេត្តព្រះសីហនុលោក ជួន ណារិន្ទ បានប្រាប់ភ្នំពេញប៉ុស្តិ៍កាលពីម្សិលមិញថា ជនសង្ស័យទាំង ៩ នាក់នោះ ត្រូវបានរកឃើញក្នុងចំណោមជនសង្ស័យជិត ៤០០ នាក់ដែលសមត្ថកិច្ចឃាត់ខ្លួនក្នុងពេលឆ្មក់ចូលក្លិបកម្សាន្តមួយក្នុងខេត្តព្រះសីហនុកាលពីរំលងអធ្រាត្រឈានចូលថ្ងៃទី ៣០ ខែកញ្ញា។
លោក ណារិន្ទ ថ្លែងថា៖ «បន្ទាប់ពីបន្តនីតិវិធីរយៈពេល ៤៨ ម៉ោង ជំនាញបានអនុវត្តវិធានការញែកចេញម្ចាស់ទីតាំងចែកចាយ ការគ្រប់គ្រង ការបម្រើសេវាពាក់ព័ន្ធនឹងការផ្តល់ទីតាំងប្រើប្រាស់គ្រឿងញៀន។ យើងញែកចេញបាន ៩ នាក់ ប្រុស ៧ ស្រី ២ ជាជនជាតិចិន បញ្ជូនទៅតុលាការចាត់ការតាមនីតិវិធី»។
បើតាមលោក ណារិន្ទ អ្នកដែលនៅសល់នឹងត្រូវញែកឲ្យដាច់ដោយមានកិច្ចសហប្រតិបត្តិការជាមួយជំនាញពាក់ព័ន្ធមកពីមន្ទីរប្រឆាំងគ្រឿងញៀន ក្នុងនោះរកឃើញអ្នកមានសារធាតុញៀនមួយចំនួន និងមួយចំនួនទៀតដែលបានចូលទៅលេងកម្សាន្តធម្មតាដោយគ្មានពាក់ព័ន្ធក្នុងការប្រើប្រាស់គ្រឿងញៀនត្រូវបានអនុញ្ញាតឲ្យមានការធានាត្រឡប់ទៅផ្ទះវិញ។
បើតាមលោកស្នងការខេត្តព្រះសីហនុ ដោយមានការដឹកនាំសម្របសម្រួលពីលោកព្រះរាជអាជ្ញា សៀង សុខ និងព្រះរាជអាជ្ញារងលោក ពេញ ពិសិដ្ឋ ព្រមទាំងលោក ជាវ វិជ្ជាក់ អភិបាលរងខេត្តព្រះសីហនុ សមត្ថកិច្ចបានសម្រេចទៅតាមផ្លូវច្បាប់ បិទជាបណ្តោះអាសន្ន ក្លិបកម្សាន្តដែលមានស្លាកយីហោភោជនីយដ្ឋាន ស៊ីនខាយសៀនមិន។
លោក ឆាយ គឹមខឿន អ្នកនាំពាក្យ អគ្គស្នងការនគរបាលជាតិបានប្រាប់ភ្នំពេញប៉ុស្តិ៍កាលពីម្សិលមិញថា ការបង្ក្រាបក្លិបកម្សាន្តលួចបើកខារ៉ាអូខេ និងម៉ាស្សាបម្រើសេវាផ្លូវភេទក្នុងខេត្តព្រះសីហនុ សមត្ថកិច្ចបានឃាត់ខ្លួនមនុស្សសរុបចំនួន ៣៧៥ នាក់ក្នុងនោះមាននារីម៉ាស្សា និងបម្រើផ្លូវភេទព្រមទាំងភ្ញៀវចូលទៅកម្សាន្ត។ អ្នកពាក់ព័ន្ធករណីគ្រឿងញៀនចំនួន ៥២ នាក់ (ចិន ៤២ នាក់ និងវៀតណាម ១០ នាក់) ក្នុងនោះអ្នកជួញដូរ និងសម្រួលឱ្យប្រើប្រាស់គ្រឿងញៀនមានចំនួន ៩ នាក់ ជាជនជាតិចិនត្រូវបានបញ្ជូនទៅតុលាការ។
ចំណែកវត្ថុតាងដែលត្រូវសមត្ថកិច្ចដកហូតមានសារធាតុញៀនចំនួនជាង ១២ គីឡូក្រាម និងឧបករណ៍សម្ភារប្រើប្រាស់មួយចំនួនរួមទាំងដកហូតអាវុធចំនួន ៣ ដើម (អាវុធខ្លី ២ ដើម និងវែង ១ ដើម) និងគ្រាប់កាំភ្លើងចំនួន ១០២ គ្រាប់។
អ្នកប្រើប្រាស់គ្រឿងញៀនជាជនបរទេសសរុបចំនួន ៧៦ នាក់ ត្រូវស្នើសុំបណ្តេញចេញដែលក្នុងនោះមាន ៣៣ នាក់ជាជនជាតិចិន និង ១០ នាក់ជាជនជាតិវៀតណាមក្រៅពីនេះមាននារីម៉ាស្សាបម្រើសេវាផ្លូវភេទចំនួន ៣៣ នាក់ (ជនជាតិចិន ២៤ នាក់ និងវៀតណាម ៩ នាក់)។
លោក គឹមខឿន បញ្ជាក់ថា ក្រៅពីនោះចំពោះអ្នកមិនពាក់ព័ន្ធគ្រឿងញៀនដែលមានបុគ្គលិក កម្មករ និងអ្នកចូលទៅលេងកម្សាន្តត្រូវបានធ្វើការអប់រំណែនាំ និងធ្វើកិច្ចសន្យារួចឱ្យត្រឡប់ទៅផ្ទះវិញ ចំណែកអ្នកប្រើប្រាស់គ្រឿងញៀនជាជនជាតិខ្មែរត្រូវបញ្ជូនទៅមណ្ឌលអប់រំ ព្យាបាល បន្សាប និងស្តារនីតិសម្បទា។
បើតាមអ្នកនាំពាក្យអគ្គស្នងការនគរបាលជាតិមកដល់ថ្ងៃទី ៤ ខែតុលា សមត្ថកិច្ចកំពុងបន្តស្រាវជ្រាវរកប្រភពអាវុធដែលផ្តល់ឱ្យជនល្មើស ស្វែងរកចាប់ខ្លួនយកមកផ្តន្ទាទោសតាមច្បាប់ និងបន្តសហការជាមួយសមត្ថកិច្ចពាក់ព័ន្ធទាំងក្នុង និងក្រៅប្រទេស ដើម្បីរកប្រភពផ្គត់ផ្គង់សារធាតុញៀន និងបក្ខពួកមេខ្លោង។
អ្នកនាំពាក្យសាលាដំបូងខេត្តព្រះសីហនុលោក លឹម ប៊ុនហេង មិនអាចទាក់ទងសុំអត្ថាធិប្បាយជុំវិញបញ្ហានេះបានទេកាលពីម្សិលមិញ៕
