.jpg)
ជនជាប់ចោទត្រូវនគរបាលនាំចេញពីសវនាការសាលាឧទ្ធរណ៍ពីម្សិលមិញ។ រូបថត គឹម សារុំ
ភ្នំពេញៈ ជនជាប់ចោទម្នាក់ក្នុងចំណោម ២ នាក់កាលពីម្សិលមិញបានស្នើសុំចៅក្រមសាលាឧទ្ធរណ៍ឲ្យបន្ធូរបន្ថយទោសពាក់ព័ន្ធរឿងឃាតកម្ម សម្លាប់មិត្តភក្តិម្នាក់ ប្លន់យកម៉ូតូកាលពីឆ្នាំ ២០១៥ នៅភូមិខ្នប់ដំរី ឃុំដំរិល ស្រុកអូររាំងឪ ខេត្តត្បូងឃ្មុំ ។
តាមកំណត់ហេតុរបស់សាលាឧទ្ធរណ៍កាលពីថ្ងៃទី ១ ខែមិថុនា ឆ្នាំ ២០១៥ ជនសង្ស័យឈ្មោះ ស៊ិន ប៊ិន និង អែម ស្រស់ បានប្រើល្បិចល្បួងហៅជនរងគ្រោះឈ្មោះ សួន ហ៊ីង ឲ្យយកម៉ូតូឌុបពួកគេទៅផឹកស្រាបៀរនៅហាងមួយក្នុងស្រុកត្បូងឃ្មុំ។ បន្ទាប់ពីផឹកជនជាប់ចោទ និងបក្ខពួកបានបបួលជនរងគ្រោះទៅច្រៀងខារ៉ាអូខេ នៅអ្នកលឿងជិតទីរួមខេត្តព្រៃវែង និងផឹកអស់ស្រាបៀរ ២ កេសទៀត។
កំណត់ហេតុបន្តថា បន្ទាប់ពីក្រុមជនសង្ស័យ និងជនរងគ្រោះផឹកស្រាដល់ម៉ោងប្រហែល ១១ យប់ ថ្ងៃខែឆ្នាំដដែល និងដោយឃើញជនរងគ្រោះមានសភាពស្រវឹងស្រាខ្លាំងហើយនោះក្រុមជនសង្ស័យបានល្បួងជនរងគ្រោះចេញពីអ្នកលឿងមកផឹកស៊ីនៅកំពង់ចាមម្តងវិញ។
ប៉ុន្តែពេលជិះម៉ូតូទៅដល់ត្រង់ម្តុំស្ពានមាត់ឃ្មង់ក្នុងឃុំជីរោទ៍ទី ២ ស្រុកត្បូងឃ្មុំ ជនរងគ្រោះបានឈប់ម៉ូតូជុះនោម ខណៈនោះស្រាប់តែ អែម ស្រស់ និង ស៊ិន ប៊ិន បានយកព្រនង់ឈើវាយក្បាលជនរងគ្រោះប្រហែល ៥ ទៅ ៦ ព្រនង់បណ្តាលឲ្យប្រកាច់ស្លាប់តែម្តង។ ដោយដឹងថា ជនរងគ្រោះស្លាប់ហើយនោះ អែម ស្រស់ និង ស៊ិន ប៊ិន បាននាំគ្នាអូសជនរងគ្រោះពីចិញ្ចើមផ្លូវចូលក្នុងព្រៃប្រហែល ២៥ ម៉ែត្រហើយពួកគេដោះយកខ្សែកមាសទម្ងន់ ៥ ជី និងចិញ្ចៀនមាស ១ វង់រួចយកម៉ូតូរបស់ជនរងគ្រោះម៉ាកហុងដា ឌ្រីម ធុនសេ ១២៥ ស៊េរីឆ្នាំ ២០១៣ ជិះមកស្រុកអូររាំងឪវិញ។
បន្ទាប់ពីមានគេប្រទះឃើញសាកសពជនរងគ្រោះសមត្ថកិច្ចបានស្រាវជ្រាវរយៈពេល ១៥ ថ្ងៃ ទើបចាប់បានឈ្មោះ ស៊ិន ប៊ិន និងក្រោយមកសមត្ថកិច្ចបានទៅតាមចាប់ អែម ស្រស់ ដល់ផ្ទះ ប៉ុន្តែជននេះបានរត់គេចខ្លួនបាត់ នៅសល់តែម៉ូតូរបស់ជនរងគ្រោះ។
សំណុំរឿងនេះត្រូវបានសាលាដំបូងខេត្តកំពង់ចាមកាលពីថ្ងៃទី ២៩ វិច្ឆិកាឆ្នាំ ២០១៥ ផ្តន្ទាទោស ស៊ិន ប៊ិន និង អែម ស្រស់ ឲ្យជាប់ពន្ធនាគារម្នាក់ៗ ២០ ឆ្នាំ ក្រោមការចោទប្រកាន់ពីបទលួចមានស្ថានទម្ងន់ទោសដោយសារមរណភាពជនរងគ្រោះ និងបង្គាប់ឲ្យសមត្ថកិច្ចតាមចាប់ខ្លួនជន អែម ស្រស់។
ស៊ិន ប៊ិន បានឆ្លើយប្រាប់ចៅក្រមនៅក្នុងបន្ទប់សវនាការពីម្សិលមិញថា រូបគេពិតជាបានបបួលជនរងគ្រោះទៅផឹកស៊ីមែនតែរូបគេមិនបានសម្លាប់ជនរងគ្រោះទេ គឺ អែម ស្រស់ ជាអ្នកសម្លាប់។ ជនជាប់ចោទថា៖ «ខ្ញុំឃើញឈ្មោះ អែម ស្រស់ វាយជនរងគ្រោះហើយខ្ញុំបានឃាត់ដែរតែអែម ស្រស់ ឆ្លើយថា កុំចេះ។ ខ្ញុំស្នើសុំដល់តុលាការជួយបន្ថយទោសដល់ខ្ញុំផង»។
ទោះយ៉ាងណាលោកស្រី ទីវ គឹមកល្យាណ តំណាងមហាអយ្យការបានសួរទៅជនជាប់ចោទថា លោកបានឃើញសកម្មភាពឈ្មោះ អែម ស្រស់ វាយសម្លាប់ជនរងគ្រោះ ហេតុអ្វីបានជាលោកមិនឃាត់ ដើម្បីបង្អាក់សកម្មភាពនោះ? ករណីនេះបើលោកមិនមែនជាបក្ខពួក អែម ស្រស់ ទេនោះ ប្រហែល អែម ស្រស់ សម្លាប់លោកចោលដែរហើយ។ លោកស្រីថា៖ «ធម្មតាគេមិនទុកសាក្សីដែលបានឃើញហេតុការណ៍ទេ បើទុកគេខ្លាចសាក្សីនោះប្រាប់នគរបាល»។
លោក មេធាវីការពារសិទ្ធិឲ្យជនជាប់ចោទបានសន្និដ្ឋានថា កូនក្តីរបស់លោកបានសារភាពអស់ហើយ ដូច្នេះសូមតុលាការបន្ធូរបន្ថយទោសដល់គាត់ផង។
ប៉ុន្តែលោកស្រី ទីវ គឹមកល្យាណ សន្និដ្ឋានថា បើពិនិត្យលើអង្គហេតុបង្ហាញថា ជន ស៊ិន ប៊ិន ពិតជាបានចូលរួមសម្លាប់ជនរងគ្រោះមែន។ ដូច្នេះលោកស្រីសូមរក្សាសាលក្រមរបស់សាលាដំបូងខេត្តកំពង់ចាមនៅដដែល។
ក្រោយជំនុំជម្រះលោក ស៊ិន វិសាល ប្រធានក្រុមប្រឹក្សាជំនុំជម្រះថ្លែងថា សាលដីកានេះប្រកាសថ្ងៃទី ៨ មិថុនា៕
