The Phnom Penh Post Search

Search form




Logo of Phnom Penh Post newspaper Phnom Penh Post - ជន​អនាថា​មួយ​ចំនួន​នៅ​តែ​បន្ត​ជាប់​ឃុំ​នៅ​ព្រៃស្ពឺ

ជន​អនាថា​មួយ​ចំនួន​នៅ​តែ​បន្ត​ជាប់​ឃុំ​នៅ​ព្រៃស្ពឺ

ជនអនាថា និង​ក្មេង​សុំទាន​នៅ​​មជ្ឈមណ្ឌល​ព្រៃស្ពឺ​កាលពី​ថ្ងៃ​ពុធ​។
ជនអនាថា និង​ក្មេង​សុំទាន​នៅ​​មជ្ឈមណ្ឌល​ព្រៃស្ពឺ​កាលពី​ថ្ងៃ​ពុធ​។ រូបថត សហការី

ជន​អនាថា​មួយ​ចំនួន​នៅ​តែ​បន្ត​ជាប់​ឃុំ​នៅ​ព្រៃស្ពឺ

ភ្នំពេញៈ បន្ទាប់ពី​បើក​ទ្វារ​កាល​រសៀល​ថ្ងៃ​អង្គារ​សម្រាប់​ការ​ចុះ​ទៅ​មើល​របស់​គណបក្ស​សង្គ្រោះ​ជាតិ​ក្មេងៗ​មួយ​ចំនួន​ត្រូវ​បាន​ដោះលែង​ពី​មជ្ឈមណ្ឌល​ឃុំ​ខ្លួន​ព្រៃស្ពឺ​ដែល​មាន​លក្ខណៈ​ដូច​ពន្ធនាគារ​ខណៈ​អ្នក​ផ្សេង​ទៀត​នៅ​តែ​ត្រូវ​​ជាប់​ឃុំ​បើ​ទោះបី​ជា​មាន​ការ​​អង្វរករ​ពី​សាច់ញាតិ​ឲ្យ​មាន​ការ​ដោះលែង​ក៏ដោយ​។

មនុស្ស ៨៩ នាក់ ​រួម​ទាំង​ក្មេងៗ​មួយ​ចំនួន​ដែល​ត្រូវ​បាន​ចាប់​ប្រមូល​ពី​តាម​ផ្លូវ​នានា​ក្នុង​រាជធានី​ភ្នំពេញ​ត្រូវ​បាន​ឃុំ​ខ្លួន​នៅ​មជ្ឈមណ្ឌល​​សង្គមកិច្ច​ព្រៃស្ពឺ​ ឬ​មជ្ឈមណ្ឌល​បណ្តុះបណ្តាល​វិជ្ជាជីវៈ​ពោធិ៍សែនជ័យ​។ ក្រុម​មន្រ្តី​បាន​អះអាង​ថា «​ ៩០ ​ភាគរយ​» ​នៃ​ពួកគេ​គឺ «​មាន​ជំងឺ​ផ្លូវចិត្ត​» ខណៈ​អ្នក​​ផ្សេង​ទៀត​មិន​មាន​ផ្ទះ​ ឬ​គ្រួសារ​។

អង្គការ​មិត្ត​សម្លាញ់​ដែល​ជា​អង្គការ​មួយ​ក្នុង​ចំណោម​អង្គការ​ក្រៅ​រដ្ឋាភិបាល​ចំនួន​ពីរ​ដែល​ជា​ដៃគូ​ក្នុង​ការ​ដោះស្រាយ​បញ្ហា​​ «​បោស​សម្អាត​តាម​ដង​ផ្លូវ​» កាលពី​ថ្ងៃ​ពុធ​បាន​យក​ពលរដ្ឋ​ ៥ ​គ្រួសារ​​ចេញ​ពី​មជ្ឈមណ្ឌល​នេះ​រួម​ទាំង​ក្មេង​ចំនួន​ ៧ ​នាក់​អាយុ​ចន្លោះ​ពី​មួយ​ឆ្នាំ​​ដល់​បី​​ឆ្នាំ​។

លោក James Sutherland ​អ្នក​សម្របសម្រួល​ផ្នែក​ទំនាក់ទំនង​នៅ​អង្គការ Friends International ដែល​ជា​ដៃគូ​អង្គការ​មិត្ត​សម្លាញ់​បាន​ថ្លែង​ថា​កាលពី​យប់​ថ្ងៃ​អង្គារ​មន្ទីរ​សង្គមកិច្ច​រាជធានី​ភ្នំពេញ «​បាន​ទូរស័ព្ទ​​មក​ហើយ​សួរ​ថា​តើ​​យើង​អាច​យក​ពួកគេ​បាន​ឬ​អត់​?»​។

លោក​បន្ត​ថា​៖ «​អង្គការ​មិត្ត​សម្លាញ់​ឥឡូវ​នេះ​បាន​យក​ពួកគេ​ទៅ​ផ្ទះ​វិញ​ជា​បណ្តោះអាសន្ន​ដើម្បី​ឲ្យ​យើង​អាច​វាយតម្លៃ​អំពី​ស្ថានភាព​នោះ​បាន​»។

លោក​បន្ត​ថា ​រយៈពេល​នៃ​ការ​ស្នាក់នៅ​សម្រាប់​​គ្រួសារ​ទាំងនោះ​នឹង «​អាស្រ័យ​លើ​កាលៈទេសៈ​ផ្ទាល់​ខ្លួន​របស់​ពួកគេ​»។ បើ​ទោះបី​ជា​មជ្ឈមណ្ឌល​ព្រៃស្ពឺ​នៅ​​តែ​ត្រូវ​បាន​គេ​បន្ត​ប្រើ​ជា​កន្លែង​​ចាក់​ចោល​មនុស្ស​ដែល​ត្រូវ​បាន​ប្រមូល​ពី​តាម​ដងផ្លូវ​ក៏ដោយ ក៏​លោក Sutherland បាន​ថ្លែង​ថា​អង្គការ​​នឹង​ខិតខំ​ប្រឹងប្រែង​ក្នុង​ការ​ធ្វើ​ការងារ​ជា​ដៃគូ​ជាមួយ​សាលា​រាជធានី​ភ្នំពេញ​»។

លោក​បាន​និយាយ​ថា​៖ «​យើង​បាន​ចុះ​អនុស្សរណៈ​នៃ​ការ​យោគយល់​មួយ​ហើយ​យើង​មាន​ការ​ប្តេជ្ញាចិត្ត​ខ្លាំង​ណាស់​ក្នុង​ការ​ធ្វើ​ការងារ​នោះ និង​ស្វែងរក​ដំណោះស្រាយ​រយៈពេល​វែង​»​។

អង្គការ​ផ្សេង​ទៀត​គឺ​អង្គការ Pour un Sourire d'Enfant បាន​ថ្លែង​ថា​ខ្លួន​មិន​ទាន់​ត្រូវ​បាន​ស្នើសុំ​ឲ្យ​​យក​នរណា​​ម្នាក់​ពី​​មជ្ឈមណ្ឌល​ព្រៃស្ពឺ​នៅ​ឡើយ​ទេ​។ ខណៈ​អ្នក​ជាប់​ឃុំ​មួយ​ចំនួន​​ត្រូវ​បាន​ដោះលែង​ពី​មជ្ឈមណ្ឌល​​នេះ​កាលពី​ថ្ងៃ​ពុធ​អ្នក​ផ្សេង​ទៀត​នៅ​តែ​នៅ​ជាប់​ឃុំ​បើ​ទោះបី​ជា​មាន​ការ​អំពាវនាវ​​ពី​សាច់ញាតិ​ឲ្យ​ដោះលែង​ពួកគេ​ដ៏ដោយ​។

អ្នកស្រី លី ស្រីណុច អាយុ​ ៤៣ ​ឆ្នាំ​​បាន​ថ្លែង​ថា​ប្អូនស្រី​របស់​​អ្នកស្រី​ឈ្មោះ លី ស្រីពេជ្រ អាយុ​ ៣០ ​ឆ្នាំ នៅតែ​ត្រូវ​បាន​ឃុំ​ខ្លួន​នៅ​ឡើយ​នៅ​មជ្ឈមណ្ឌល​ព្រៃស្ពឺ​កាល​រសៀល​ថ្ងៃ​ពុធ​។

អ្នកស្រី​​ថ្លែង​ថា​៖ «​នាង​​មិន​មាន​បញ្ហា​សតិ​អារម្មណ៍​ទេ​នាង​គ្រាន់តែ​គ្មាន​ផ្ទះ​សម្បែង​​ប៉ុណ្ណោះ​»។ អ្នកស្រី​បន្ថែម​ថា​ស្រីពេជ្រ​ត្រូវ​បាន​ឃុំ​ខ្លួន​អស់​រយៈពេល​ពីរ​បី​សប្តាហ៍​រួច​មក​ហើយ​។

អ្នកស្រី​បន្ត​ថា​៖ «​​មជ្ឈមណ្ឌល​នេះ​បាន​សន្យា​ថា​នឹង​ដោះលែង​នាង​​នៅពេល​ខ្ញុំ​បាន​ជួប​ជាមួយ​លោកស្រី កែ សុវណ្ណរតន៍​តំណាង​រាស្រ្ត​គណបក្ស​សង្គ្រោះ​ជាតិ ប៉ុន្តែ​នាង​នៅ​ជាប់​ឃុំ​នៅ​ទី​នោះ​នៅ​ឡើយ​ឥឡូវ​នេះ​»។

លោក សន សុផល ប្រធាន​មន្ទីរ​សង្គមកិច្ច​រាជធានី​បាន​ថ្លែង​ថា​លោក​មាន​ការ​សង្ស័យ​​ចំពោះ​ការ​អះអាង​មួយ​ចំនួន​​របស់​​មនុស្ស​ដែល​​ជាប់​ពាក់ព័ន្ធ​នឹង​អ្នក​ដែល​ត្រូវ​បាន​ឃុំ​ខ្លួន​ហើយ​បាន​បន្ត​ឃុំ​ខ្លួន​ពួកគេ​ដើម្បី​ការពារ​ពួកគេ​។

លោក​បន្ត​ថា​៖ «​យើង​ភ័យ​ខ្លាច​ពួកគេ​យក​​អ្នក​ដែល​ជាប់​ឃុំ​ខ្លួន​ទាំងនោះ​ទៅ​ធ្វើ​អ្វី​អាក្រក់​»។

លោកស្រី កែ សុវណ្ណរតន៍ រំពឹង​ថា​មនុស្ស​នៅ​មជ្ឈមណ្ឌល​ព្រៃស្ពឺ​នឹង​ត្រូវ​ដោះលែង​នៅពេល​ជម្រើស​នៃ​ការ​គាំពារ​មួយ​ទៀត​ត្រូវ​បាន​រៀបចំ​ឡើង​។

លោកស្រី​ថ្លែង​ថា​៖ «​ពួកគេ​បាន​សន្យា​ជាមួយ​យើង​ថា​ពួកគេ​នឹង​ដោះលែង​មនុស្ស​ទាំងនោះ​»៕ PS

អត្ថបទគួរចាប់អារម្មណ៍