ភ្នំពេញ: អាជ្ញាធរខណ្ឌដូនពេញ នៅថ្ងៃទី ១៦ ខែ មិថុនា បានចាប់បញ្ជូនជនអនាថា និងជនញៀនគ្រឿងញៀនចំនួន ៣៣ នាក់ ដែលចាប់ប្រមូលពីតាមដងផ្លូវនានាយកទៅមន្ទីរសង្គមកិច្ច អតីត យុទ្ធជននិងយុវនីតិសម្បទារាជធានីភ្នំពេញ ដើម្បីព្យាបាល និងធ្វើការអប់រំ បណ្ដុះបណ្ដាលជំនាញ។
លោក យស យុទ្ធី អភិបាលរងខណ្ឌដូនពេញ បានប្រាប់ភ្នំពេញប៉ុស្ដិ៍ កាលពីម្សិលមិញថា ជនអនាថា និងជនញៀនគ្រឿងញៀនចំនួន ៣៣ នាក់ ក្នុងនោះស្ដ្រី ៧ នាក់ និងកុមារ ២ នាក់ ត្រូវបានលោកដឹកនាំកម្លាំងចម្រុះខណ្ឌដូនពេញ បានចាប់ប្រមូលនៅក្នុងមូលដ្ឋាន ដើម្បីរៀបចំសណ្ដាប់ធ្នាប់សាធារណៈ ព្រោះកន្លងមក ពួកគេតែងតែដើរសុំទានតាមហាងនិងទីប្រជុំជននានាក្នុងក្រុងភ្នំពេញ។
លោកបន្តថា ពួកគាត់មួយចំនួនបានធ្វើឲ្យខូចសណ្ដាប់ធ្នាប់នៅតាមទីសាធារណៈក្នុងក្រុងដោយមានអ្នកខ្លះបានដេកលើបង់ ឬលើសួនច្បារចាប់ពីព្រឹករហូតដល់យប់ អ្នកខ្លះដើរសុំទានតាមហាង ភោជនីយដ្ឋាន តាមវត្តអារាម និងទីប្រជុំជននានា។ ក្នុងនោះ ក៏មានអ្នកសេពគ្រឿងញៀន ដើរបង្កបញ្ហានៅតាមទីសាធារណៈ និងដើរបន្ទោបង់ពាសវាលពាសកាលផងដែរ។
លោកបញ្ជាក់ថា៖ «កន្លងមក យើងបានដើរប្រមូលគាត់ជាច្រើនលើកមកហើយ ប៉ុន្ដែមិនដឹងយ៉ាងម៉េចទេ គាត់ចេះតែត្រឡប់មកវិញ។ យើងប្រមូលគាត់នេះ គឺចង់បង្រៀនគាត់ ពីបំណិនជីវិត គឺរៀនជំនាញ ជាងជួសជុល អប់រំ ណែនាំជាច្រើនវិធីទៀត បើសិនអ្នកនៅមានស្មារតីល្អ យើងក៏រកការងារឲ្យគាត់ធ្វើដែរ»។
លោក យុទ្ធី បន្ថែមថា ខណៈដែលពួកគាត់កំពុងស្នាក់នៅមន្ទីរសង្គមកិច្ច រាជធានីភ្នំពេញនោះ ក្រុមមន្ត្រីជំនាញ នឹងធ្វើការព្យាបាល បន្សាបគ្រឿងញៀន និងពិនិត្យសុខភាពជូនពួកគាត់ជាប្រចាំ។
លោកបន្តថា៖ «មិនត្រឹមតែពួកគាត់ដែលខ្ញុំប្រមូលបានហ្នឹងទេ សូម្បីតែជនរងគ្រោះដទៃទៀត ដែលគាត់មានបញ្ហាញៀនថ្នាំនេះ គឺអាចបញ្ជូនគាត់ទៅព្យាបាលនៅមន្ទីរពេទ្យ ក្រោមការគ្រប់គ្រងរបស់មន្ទីរសង្គមកិច្ចយើងហ្នឹងក៏បានដែរ»។
ប៉ុន្តែ លោកស្រី មុំ ចាន់ដានី ប្រធានមន្ទីរសង្គមកិច្ច អតីតយុទ្ធជននិងយុវនីតិសម្បទារាជធានីភ្នំពេញ បានថ្លែងពីម្សិលមិញថាលោកស្រីមិនទាន់បានទទួលជនអនាថា និងជនញៀនគ្រឿងញៀនចំនួន ៣៣ នាក់ នៅឡើយទេ ដោយរង់ចាំសាកសួរមន្ត្រីដែលទទួលបន្ទុកផ្នែកការងារនេះសិន។ «ខ្ញុំអត់ដឹងផងមិនដឹងថា អាជ្ញាធរគាត់បញ្ជូនមកពេលណា?»។
លោក ស៊ឹង សែនករុណា អ្នកនាំពាក្យសមាគមការពារសិទ្ធិមនុស្សអាដហុក បានថ្លែងថា ប្រជាពលរដ្ឋមានសិទ្ធិរស់រៀនមានជីវិតប្រកបដោយមានតម្លៃ និងសេចក្ដីថ្លៃថ្នូរ ហើយក្នុងនាមរដ្ឋាភិបាល ត្រូវតែធានាការគោរព ការពារ និងការយកចិត្តទុកដាក់ជាមួយពួកគាត់។
លោកបន្តថា លោកគាំទ្រឲ្យមានការរៀបចំសណ្ដាប់ធ្នាប់សាធារណៈបែបនេះ ប៉ុន្ដែនៅពេលយកពួកគាត់ទៅទុកនៅកន្លែងណាក៏ដោយ ត្រូវតែយកចិត្តទុកដាក់ខ្ពស់ ក្នុងការថែរក្សាពួកគាត់ឲ្យបានត្រឹមត្រូវ។ បើពួកគាត់មានជំងឺ ត្រូវមានសេវាព្យាបាលឲ្យគាត់ បង្រៀនជំនាញ អប់រំ ណែនាំ និងជួយរកការងារឲ្យធ្វើ ដើម្បីធានាថា ពេលពួកគាត់ចេញមកវិញ អាចគ្រប់គ្រងជីវិតខ្លួនគាត់បានល្អនិងក្លាយជាមនុស្សល្អក្នុងសង្គម។
លោកបានបញ្ជាក់ថា៖ «បើយើងចាប់គាត់ យកទៅដាក់មណ្ឌល គឺមណ្ឌលនោះ ត្រូវតែផ្ដល់ភាពកក់ក្ដៅដល់គាត់ បើសិនជាក្មេងមិនដែលបានរៀនសូត្រ ត្រូវឲ្យគាត់រៀន អ្នកញៀនថ្នាំ ត្រូវព្យាបាលបន្សាបគ្រឿងញៀនពីខ្លួនរបស់គាត់ បើអ្នកមានជំងឺប្រចាំកាយ ត្រូវមានសេវាព្យាបាលពួកគាត់។ អ៊ីចឹង គឺត្រូវធានាសុខុមាលភាពពួកគាត់ទាំងអស់ហ្នឹង គឺមិនមែនចាប់មនុស្សយកទៅដាក់ចោល បង្ខាំង ចង់អ្នកណាធ្វើអ្វីក៏ធ្វើទៅនោះទេ គឺមិនមែនអ៊ីចឹង គឺត្រូវថែគាត់ឲ្យបានត្រឹមត្រូវ»៕