The Phnom Penh Post Search

Search form




Logo of Phnom Penh Post newspaper Phnom Penh Post - ជន​អន្តោ​ប្រវេសន៍​ខុស​ច្បាប់ ៥០ នាក់​ទៀត​ត្រូវ​អាជ្ញាធរ​ឃាត់​ខ្លួន

ជន​អន្តោ​ប្រវេសន៍​ខុស​ច្បាប់ ៥០ នាក់​ទៀត​ត្រូវ​អាជ្ញាធរ​ឃាត់​ខ្លួន

ជន​អន្តោ​ប្រវេសន៍​ខុស​ច្បាប់ ៥០ នាក់​ទៀត​ត្រូវ​អាជ្ញាធរ​ឃាត់​ខ្លួន

ភ្នំពេញៈ ជន​អន្តោ​ប្រវេសន៍​វៀតណាម ខុស​ច្បាប់ ៥០ នាក់​ទៀត​ត្រូវ​បាន​អាជ្ញាធរ​ឃាត់​ខ្លួន នៅ​ដើម ខែ​មីនា នេះ ក្នុង​បេសកកម្ម​ជំរឿន​អន្តោ​ប្រវេសន៍​ក្នុង​រាជធានី​ភ្នំពេញ​និង ខេត្ត​កំពង់ស្ពឺ ដែល​ពួកគេ​នឹង​ត្រូវ​រង​ការ​ចោទ​ប្រកាន់​ពីបទ​ស្នាក់​នៅ​ខុស​ច្បាប់​ដែល​នឹង​ត្រូវ​បញ្ជូន​ត្រឡប់​ទៅ​ប្រទេស​កំណើត​វិញ។

ប្រធាន​នាយកដ្ឋាន​ស៊ើប​អង្កេត​និង​អនុវត្ត​នីតិវិធី​នៃ​អគ្គ​នាយកដ្ឋាន​អន្តោ​ប្រវេសន៍​ក្រសួង​មហាផ្ទៃ លោក អ៊ុក ហៃសីលា បាន​ឲ្យ​ដឹង​ថា ជនជាតិ​វៀតណាម ទាំង ៥០ នាក់​នេះ ត្រូវ​សមត្ថកិច្ច​ឃាត់​ខ្លួន​កាលពី​រសៀល​ថ្ងៃ​ចន្ទ ហើយ​ក្នុង​នោះ ៣១ នាក់ ឃាត់​បាន​នៅ​ម្តុំ​បឹង​កេងកង រាជធានី​ភ្នំពេញ និង ១៩ នាក់ នៅ ខេត្ត​កំពង់ស្ពឺ ក្នុង​នោះ​មាន​ស្រី​សរុប ២៦ នាក់។ ជនជាតិ​វៀតណាម ទាំង​នេះ ភាគ​ច្រើន​មាន​មុខ​របរ​ជា​ជាង​ឈើ និង​អ្នក​លក់​កាហ្វេ ដែល​បាន​ប្រើ​ប្រាស់​លិខិត​ឆ្លងដែន​ខុស​ទិស​ដៅ ខ្លះ​លួច​ឆ្លងដែន​ស្នាក់​នៅ និង​ធ្វើការ​ខុស​ច្បាប់។

លោក អ៊ុក ហៃ សីលា បញ្ជាក់​ថា៖ «ពួក​គេ​មិន​បាន​ប្រព្រឹត្ត​បទ​ល្មើស​អ្វី​ផ្សេង ក្រៅពី​អន្តោ​ប្រវេសន៍​ខុស​ច្បាប់​នោះ​ទេ ប៉ុន្តែ​មាន​មួយ​ចំនួន មាន​លិខិត​ឆ្លង​ដែន​ដែរ តែ​លិខិត​នោះ​មិន​មាន​វាយ​ត្រា​ឆ្លងដែន​ចូល​នោះ​ទេ។ សមត្ថកិច្ច​នឹង​ធ្វើ​ការ​សាកសួរ ហើយ​រៀបចំ​បញ្ជូន​ត្រឡប់​ទៅ​វិញ​ស្រប​តាម​នីតិវិធី»។

បើ​តាម​លោក ហៃសីលា ជន​អន្តោ​ប្រវេសន៍​ខុស​ច្បាប់ ដែល​សមត្ថកិច្ច​ឃាត់​ខ្លួន​បាន​អំឡុង ខែ​មករា មាន ១០៦ នាក់​និង ខែ​កុម្ភៈ ១៧ នាក់ ហើយ​ក្នុង​នោះ ៨០ ភាគរយ ជា​ជនជាតិ​វៀតណាម។

នៅ​ក្រៅ​កិច្ច​ប្រជុំ​ស្តីពី​ការ​ពង្រឹង​ការ​អនុវត្ត​ការងារ​អន្តោ​ប្រវេសន៍​កាល​ពី​ថ្ងៃ ទី២១ ខែ​មករា លោក សុខ ផល ប្រធាន​អគ្គ​នាយកដ្ឋាន​អន្តោ​ប្រវេសន៍ បាន​ឲ្យ​ដឹង​ថា លទ្ធផល​នៃ​ជំរឿន​ចុង​ក្រោយ​បាន​រក​ឃើញ​ជន​បរទេស​ជិត ៨ ម៉ឺន​នាក់​នៅ​កម្ពុជា ខណៈ​ដែល​ជន​អន្តោ​ប្រវេសន៍​ខុស​ច្បាប់ ១២៩៩ នាក់ ក្នុង​នោះ ៩០ ភាគរយ​ជា​ជនជាតិ​វៀតណាម​ត្រូវ​បាន​បណ្តេញ​ចេញ ក្នុង ឆ្នាំ​២០១៤៕

អត្ថបទគួរចាប់អារម្មណ៍