The Phnom Penh Post Search

Search form




Logo of Phnom Penh Post newspaper Phnom Penh Post - ជន​កម្ពុជា​ដំបូង​បញ្ចប់​វគ្គ​ព្យាបាល​បញ្ហា​និយាយ

ជន​កម្ពុជា​ដំបូង​បញ្ចប់​វគ្គ​ព្យាបាល​បញ្ហា​និយាយ

ជន​កម្ពុជា​ដំបូង​បញ្ចប់​វគ្គ​ព្យាបាល​បញ្ហា​និយាយ

131128_08
អ្នកជំនាញជប៉ុនបណ្តុះបណ្តាលជនកម្ពុជា ៤៨ នាក់ អំពីការព្យាបាលបញ្ហាការនិយាយ ផា លីណា

ភ្នំពេញៈ ជនជាតិ​កម្ពុជា​ចំនួន ៤៨ នាក់​បាន​បញ្ចប់​ការ​សិក្សា​វគ្គ​បណ្តុះ​បណ្តាល​ការ​ព្យាបាល​បញ្ហា​លើ​ការ​និយាយ​លើក ទី១ នៅ​ក្នុង​ប្រទេស​កម្ពុជា​ក្រោម​កិច្ច​សហការ​រៀបចំ​កម្មវិធី​រួម​គ្នា រវាង​មជ្ឈមណ្ឌល​ដើម្បី​សុខភាព​បញ្ញា​កុមារ​និង​មនុស្ស​ពេញ​វ័យ (CARI-TAS-CCAMH) និង​មូលនិធិ​អន្តរជាតិ​សិង្ហបុរី (SIF)។ នេះ​បើ​តាម​តំណាង​កម្មវិធី​នេះ​បាន​អះអាង​កាល​ពី​ថ្ងៃ​អង្គារ។

វេជ្ជបណ្ឌិត Bhoomikumar Jegannathan នាយក CARITAS-CCAMH បាន​ថ្លែង​កាល​ពី​ថ្ងៃ​អង្គារ​ថា សិក្ខាកាម​បញ្ចប់​វគ្គ​សិក្សា​នេះ​នឹង​ត្រូវ​ទទួល​លិខិត​បញ្ជាក់​ការ​សិក្សា​ពី​សមាគម​និយាយ​ស្តី​ភាសា និង​ការ​ស្តាប់ របស់ សិង្ហបុរី (SHAS) និង CARITAS-CCAMH។

Jegannathan ថ្លែង​បន្ត​ថា៖ «នេះ​ជា​ជំហាន​ទៅ​មុខ​ធំ​មួយ​សម្រាប់​ប្រទេស​មួយ​ដែល​ត្រូវ​ការ​ឲ្យ​មាន​មនុស្ស​មាន​ការ​បណ្តុះ​បណ្តាល​ផ្នែក​ស្តារ​នីតិសម្បទា​ស្មារតី​និង​រាងកាយ។ ការ​ព្យាបាល​ដោយ​ការ​និយាយ​គឺ​មិន​មាន​ទេ​ក្នុង​តំបន់​ភាគ​ច្រើន​នៅ ឥណ្ឌូចិន ហើយ​កម្ពុជា​ពិត​ជា​មិន​មាន​ធនធាន​ក្នុង​វិស័យ​នេះ»។

លោក Jegannathan ថ្លែង​បន្ត​ថា សេវា​ស្តារ​នីតិសម្បទា​សម្រាប់​កុមារ​ដែល​មាន​បញ្ហា​ក្នុង​ការ​និយាយ​ស្តី គឺ​ត្រូវ​បាន​ផ្តល់​ឲ្យ​ជា​អាទិភាព​ដោយ​អង្គការ​អន្តរជាតិ​និង​រាជ​រដ្ឋាភិបាល។

ជាង​ពាក់​កណ្តាល​នៃ​ប្រជាជន​កម្ពុជា គឺ​មាន​អាយុ​ទាប​ជាង ១៥ ឆ្នាំ​ហើយ ១៤ ភាគរយ ទទួល​រង​ការ «អសមត្ថភាព​ផ្សេងៗ» ដែល​ក្នុង​នោះ​ជាង ១ ភាគ ៥ ជា​កុមារ។ នេះ​បើ​យោង​តាម​សេចក្តី​ប្រកាស​ព័ត៌មាន​របស់​កម្មវិធី​វគ្គ​សិក្សា​បណ្តុះ​បណ្តាល​នេះ។

Jegannathan បាន​បញ្ជាក់​ថា ដោយ​ត្រូវ​បាន​បណ្តុះ​បណ្តាល​ជា​ចម្បង​ដើម្បី​ធ្វើ​ការងារ​ជាមួយ​កុមារ សិក្ខាកាម​ដែល​បញ្ចប់​ការ​សិក្សា​នៅ​ថ្ងៃ​នេះ តម្រូវ​ឲ្យ​មាន​យ៉ាង​ហោច​នូវ​បទ​ពិសោធ​រយៈ​ពេល ២ ឆ្នាំ​នៃ​ការ​ធ្វើ​ការងារ​ជាមួយ​កុមារ​ពិការ និង​ត្រូវ​មាន​ឆន្ទៈ​ធ្វើ​ការងារ​ជាមួយ​ទីភ្នាក់ងារ​ដូចជា New Humanity, Rabbit School, Smile of Children និង CARITAS-CCAMH។

អ្នក​នាង លី សុភា ដែល​ជា​បុគ្គលិក​អង្គការ Pour un Sourire d'Enfant (PSE) និង​ដែល​ទទួល​វិញ្ញាបនបត្រ​បញ្ចប់​ការ​សិក្សា​នៅ​ថ្ងៃ​នេះ​បាន​កត់​សម្គាល់​ថា វគ្គ​បណ្តុះ​បណ្តាល​នេះ​បាន​បំពេញ​បន្ថែម​បទ​ពិសោធ​ការងារ​រយៈ​ពេល ៨ឆ្នាំ របស់​អ្នក​នាង​ដែល​ធ្វើ​ការងារ​ជាមួយ​កុមារ។

អ្នក​នាង សុភា បាន​ថ្លែង​កាល​ពី​ថ្ងៃ​អង្គារ​ថា៖ «ខ្ញុំ​គិត​ថា វា​លំបាក ប៉ុន្តែ​ខ្ញុំ​ចូល​ចិត្ត​ការងារ​នេះ។ ខ្ញុំ​ត្រូវ​តែ​គិត​អំពី​កន្លែង​ដែល​ខ្ញុំ​គួរ​អង្គុយ​អ្វី​ខ្ញុំ​គួរ​ធ្វើ​ដើម្បី​កុំ​ឲ្យ​ពួក​គេ​ព្រួស​បាយ​ចេញ​ពី​មាត់ និង​របៀប​ពន្យល់​ឲ្យ​ពួក​គេ​ចេះ​ធ្វើ​អ្វីៗ​ផ្សេងៗ​គ្នា»។ អ្នក​នាង​បន្ត​ថា ខណៈ​ការងារ​នេះ​តម្រូវ​ឲ្យ​មាន​ការ​អំណត់​អត់​ធន់​ខ្លាំង អ្នក​នាង​មាន​តួនាទី​សំខាន់​ក្នុង​ការ​ជួយ​ក្មេងៗ​ឲ្យ​រីក​ចម្រើន។

ប្រទេស​កម្ពុជា​មាន​អ្នក​ព្យាបាល​បញ្ហា​ការ​និយាយ​តិច​តួច ហើយ​ប្រជាជន​ប្រមាណ ៥៣៦ ពាន់​នាក់​បាន​រងគ្រោះ​ដោយ​សារ​បញ្ហា នៃ​ភាព​ខុស​ប្រក្រតី​នៃ​ការ​ទំពា​និង​ការ​ប្រាស្រ័យ​ទាក់​ទង។ នេះ​បើ​តាម​ការ​សិក្សា​ស្រាវជ្រាវ​មួយ​ចេញ​ផ្សាយ​កាល​ពី​ខែ កញ្ញា ដោយ​អង្គការ​កសាង​សមត្ថភាព​ប្រជាជន​ពិការ​នៅ​ក្នុង​ការ​បង្កើត​សហគមន៍ (CABDICO)។

ប្រសិន​កម្មវិធី​បណ្តុះ​បណ្តាល​ការ​ព្យាបាល​ការ​និយាយ​នេះ​ត្រូវ​បាន​ផ្តល់​ថវិកា​ដោយ​សកល​វិទ្យាល័យ​ជាតិ នោះ​ប្រជាជន​ប្រមាណ​ជាង ៦០ ម៉ឺន​នាក់​ដែល​កំពុង​មាន​បញ្ហា​នៃ​ភាព​ខុស​ប្រក្រតី​ក្នុង​ការ​និយាយ​និង​ទទួល​បាន​អត្ថ​ប្រយោជន៍​នេះ។

Laurie Clarke ដែល​ជា​អ្នក​ព្យាបាល​ផ្នែក​បញ្ហា​និយាយ​និង​ភាសា​នៅ Indigo ដែល​ជា​គ្លីនិក​អភិវឌ្ឍន៍​កុមារ​ឯកជន ក្នុង​រាជធានី​ភ្នំពេញ​បាន​បញ្ជាក់​អំពី​តម្រូវការ​ឲ្យ​មាន​អ្នក​ជំនាញ​ច្រើន​ជាង​មុន ទទួល​ការ​បណ្តុះ​បណ្តាល​ជំនាញ​ក្នុង​ប្រទេស​កម្ពុជា។

Clarke បាន​ថ្លែង​ដែរ​ថា៖ «វា​មាន​តម្រូវ​ការ​ដ៏​ធំ​សម្រាប់​ប្រភេទ​ការងារ​បែប​នេះ​ទូទាំង ប្រទេស និង​ការ​យល់​ដឹង​អំពី​ហេតុ​អ្វី​ជួប​បញ្ហា​នេះ»។ លោក​កត់​សម្គាល់​ថា កុមារ​ដែល​មាន​បញ្ហា​លើ​ការ​និយាយ​និង​ពិការ​ផ្នែក​ភាសា​នៅ​កម្ពុជា​ជា​ញឹក​ញាប់​ប្រឈម​នឹង​ឱកាស​ការងារ​តិច​ជាង​គេ​និង​ជីវិត​រស់​នៅ​លំបាក៕ PS

អត្ថបទគួរចាប់អារម្មណ៍