The Phnom Penh Post Search

Search form

Logo of Phnom Penh Post newspaper Phnom Penh Post - ជន​កម្ពុជា​ទី៨​បាន​ស្លាប់​ដោយ​ជំងឺ​ផ្តាសាយ​បក្សី




ជន​កម្ពុជា​ទី៨​បាន​ស្លាប់​ដោយ​ជំងឺ​ផ្តាសាយ​បក្សី

ជន​កម្ពុជា​ទី៨​បាន​ស្លាប់​ដោយ​ជំងឺ​ផ្តាសាយ​បក្សី

130227_03
មាន់ត្រូវគេដឹកតាមម៉ូតូយកទៅលក់នៅផ្សារអូរឫស្សីកាលពីថ្ងៃទី១៤ កុម្ភៈ ម៉ៃ វីរៈ

ភ្នំពេញៈ ឥឡូវ​នេះ កម្ពុជា​កំពុង​ជួប​ប្រទះ​ករណី​ជំងឺ​គ្រុន​ផ្តា​សាយបក្សី​  H5N1 ច្រើន​បំផុត ដោយ​រាប់​ទាំង​បុរស​នៅ​ខេត្ត​កំពង់ចាម​ម្នាក់​ អាយុ ៣៥ ឆ្នាំ បាន​ក្លាយ​ជា​ករណី​ទី ៩ ហើយ​ជា​បុរស​ទី ៨ ដែល​បាន​ស្លាប់ ដោយ​សារ​ជំងឺ​គ្រុន​ផ្តា​សាយ​បក្សី​នៅ​ដើម​ឆ្នាំ​នេះ។

លោក ធឿន ឌឿន មក​ពី​ស្រុក​ស្ទឹងត្រង់ បាន​ស្លាប់ នៅ​វេលា​ម៉ោង ១១ យប់ ថ្ងៃ​ចន្ទ ប៉ុន្តែ គេ​ជឿ​ជាក់​ថា លោក​បាន​ឆ្លង​មេរោគ H5N1 ជិត សប្តាហ៍​មុន កាល​ពី​ថ្ងៃ​ទី ៦ ខែ​កុម្ភៈ បន្ទាប់​ពី​គាត់ បាន​បរិភោគ​ទា​ពីរ​ក្បាល ដែល​ឆ្លង​មេរោគ​នេះ។

គាត់​បាន​ទៅ​គ្លីនិក​ក្នុង​ស្រុក ពេល​មាន​ជំងឺ​គ្រុន​ក្តៅ និង​ក្អក កាល​ពី​ថ្ងៃ​ទី១៣ ខែ​កុម្ភៈ ជា​កន្លែង​ដែល​គាត់​ត្រូវ​បាន​ផ្ទេរ​ភ្លាមៗ​ តាម​រថយន្ត​សាមុយ​ទៅ​មន្ទីរ​ពេទ្យ​ខេត្ត ហើយ​ដាក់​ក្នុង​បន្ទប់​ដាច់​ដោយ​ឡែក​។ ​ស្ថាន​ភាព​សុខភាព​របស់​គាត់​កាន់​តែ​ចុះ​ខ្សោយ ដោយ​សារ​ឆ្លង​ជំងឺ​បន្ទាប់​បន្សំ ​ហើយ​កាល​ពី​ថ្ងៃ​សុក្រ សប្តាហ៍​មុន ​គាត់​ត្រូវ​បាន​ផ្ទេរ​មក​មន្ទីរ​ពេទ្យ​កាល់ម៉ែត ជា​កន្លែង​ដែល​គាត់​ស្លាប់​បាត់​បង់​ជីវិត។

លោក គឹម សូភីរុណ ប្រធាន​មន្ទីរ​សុខាភិបាល​ខេត្ត​ កំពង់ចាម បាន​ឲ្យ​ដឹង​ថា លទ្ធផល​ដែល​បាន​បញ្ជូន​ទៅ​កូរ៉េ​បាន​បញ្ជាក់​កាល​ពីថ្ងៃ​សៅរ៍​ថា បុរស​ម្នាក់​នេះ​មាន​ជំងឺ​គ្រុន​ផ្តាសាយ​បក្សី H5N1។ ​លោក បញ្ជាក់​ថា នៅ​ពេល​ដែល​គាត់​ទៅ​ដល់​មន្ទីរ​ពេទ្យ​កាល់ម៉ែត គាត់​ស្ថិត​ក្នុង​ស្ថានភាព​មិន​អាច​សង្គ្រោះ​បាន​ទេ។

ក្រុម​ឆ្លើយ​តប​ រហ័ស​មួយ ត្រូវ​បាន​បញ្ជូន​ទៅ​ភូមិ​ភ្លាមៗ បន្ទាប់​ពី​ធ្វើ​រោគ​វិនិច្ឆ័យ​ឃើញ​ថា បុរស​នេះ​ មាន​ជំងឺ​គ្រុន​ផ្តា​សាយ​បក្សី ​ហើយ​សត្វ​មាន់ ទាជាង ៣០០ ក្បាល ត្រូវ​បាន​សម្លាប់​។

ចំនួន​ករណី​ឆ្លង​ជំងឺ​គ្រុន​ផ្តាសាយ​បក្សី​ខ្ពស់​ បំផុត​លើក​មុន​គឺ​ក្នុង​ឆ្នាំ​២០១១ ដែល​មាន​មនុស្ស​ ៨​ នាក់​ស្លាប់​ក្នុង​ចំណោម​ករណី​ទាំង​អស់ ៨​ ប៉ុន្តែ ឆ្នាំ​នេះ លើស​មួយ​ករណី ដោយ​ករណី​ទាំង ៩ កើត​ឡើង ចាប់​តាំង​ពី​ចុង​ខែ​មករា​។

ករណី​ស្លាប់​មុន​នេះ​គឺ​ក្មេង​ប្រុស​អាយុ ២ ឆ្នាំ​ ក្នុង​ខេត្ត​កំពត​ ដែល​ស្លាប់​បាត់​បង់​ជីវិត​កាល​ពី​សប្តាហ៍​មុន។

លោក លី សុវណ្ណ អនុប្រធាន​នាយកដ្ឋាន​ទប់​ស្កាត់​ជំងឺ​ឆ្លងនៃ​ក្រសួង​សុខាភិបាល បាន​ថ្លែង​ថា លោក​ព្រួយ​បារម្ភ​អំពី​ការ​រាល​ដាល​យ៉ាង​ឆាប់​រហ័ស​នូវ​ជំងឺ​នេះ ក្នុង​រយៈ​ពេល​តិច​ជាង ២ ខែ​ ហើយ​ថា អ្នក​ជំងឺ​ចុង​ក្រោយ​គ្មាន​ការ​យក​ចិត្ត​ទុក​ដាក់​ក្នុង​ការ​ជូន​ដំណឹង​ អាជ្ញាធរ​ឲ្យ​បាន​ឆាប់​ទេ។

លោក​បាន​បន្ថែម​ថា៖ «​ខ្ញុំ​សូម​ជូន​ដំណឹង និង​អំពាវ​នាវ​ម្តង​ទៀត​ ដល់​ប្រជាជន​ទាំង​មូល​ ប្រសិន​បើ​អ្នក​ឈឺ ឬ​មាន​សត្វ​បក្សី​ងាប់​  អ្នក​ត្រូវ​រាយការណ៍​ប្រាប់​អាជ្ញាធរ​ក្នុង​ស្រុក ហើយ​កុំ​ប៉ះ​ ឬ​បរិភោគ​សត្វ​បក្សី​ទាំង​នោះ។ ម្យ៉ាង​ទៀត អ្នក​ត្រូវ​ប្រាប់​កូន​ចៅ​ឲ្យ​នៅ​ឆ្ងាយ​ពី​សត្វ​បក្សី»។

លោក សុវណ្ណ បាន​លើក​ឡើង​ថា អាជ្ញាធរ​កំពុង​បង្កើត​ការ​ឆ្លើយ​តប​របស់​ខ្លួន ដោយ​ពងឹ្រង​ការ​តាម​ដាន និង​យុទ្ធនាការ​ទំនាក់​ទំនង​។

លោក Sonny Krishnan នៃ​អង្គការ​សុខភាព​ពិភពលោក បាន​ថ្លែង​ថា យើង​កំពុង​ឃ្លាំ​មើល​ស្ថានការណ៍​យ៉ាង​យក​ចិត្ត​ទុក​ដាក់​។ លោក​បាន​មាន​ប្រសាសន៍​ថា​៖​«​នៅ​ពេល​នេះ ពុំ​មាន​ការ​ឆ្លង​មេរោគ H5N1 ពី​មនុស្ស​ទៅ​មនុស្ស​ទេ ហើយ​ជំងឺ​នៅ​តែ​ឆ្លង​មាន​កម្រិត​ពី​សត្វ​មាន់​ទា​ទៅ​មនុស្ស។ ប៉ុន្តែ​ យើង​កំពុង​តាម​ដាន​យ៉ាង​ដិត​ដល់​នៅ​ថ្នាក់​ភូមិ និង​សហគមន៍​»។

លោក​បាន​បន្ថែម​ទៀត​ថា មន្រ្តី​បាន​អនុញ្ញាត​ឲ្យ​បង្កើត​ការ​ផ្សព្វផ្សាយ​អប់រំ​តាម​វិទ្យុ និង​ទូរទស្សន៍ រហូត​ដល់​ចូល​ឆ្នាំ​ថ្មី​ប្រពៃណី​ខ្មែរ។ លោក​បាន​ឲ្យ​ដឹង​ទៀត​ថា​៖​«​ក្នុង​ការ​ស៊ើប​អង្កេត​របស់​យើង មាន​ចលនា​សត្វ​មាន់​ទា​កាន់​តែ​ខ្លាំង​ឡើង ក្នុង​អំឡុង​ពេល​ចូល​ឆ្នាំ​ថ្មី​តាម​ចន្ទគតិ  ហើយ​យើង​រំពឹង​ថា​នឹង​មាន​ចលនា​សត្វ​មាន់​ទា​កាន់​តែ​ខ្លាំង​មួយ​ ទៀត ក្នុង​អំឡុង​ចូល​ឆ្នាំ​ថ្មី ប្រពៃណី​ខ្មែរ»។​

ទន្ទឹម​នឹង​នេះ ​អាជ្ញាធរ​ចត្តាឡីស័ក​(ត្រួត​ពិនិត្យ​តាម​ព្រំដែន)​របស់​ចិន បាន​ពង្រឹង​វិធានការ​ពិនិត្យ​ជំងឺ​គ្រុន​ផ្តា​សាយ​លើ​មនុស្ស និង​ទំនិញ​ដែល​នាំ​ចូល​ទៅ​ប្រទេស​ចិន ពី​ប្រទេស​កម្ពុជា។

សេចក្តី ជូន​ដំណឹង​មួយ នៅ​លើ​គេហទំព័រ​របស់​រដ្ឋបាល​ទូទៅ​ពិនិត្យ​គុណភាព ត្រួត​ពិនិត្យ និង​ចត្តាឡីស័ក​របស់​ចិន​ បាន​ឲ្យ​ដឹង​ថា ប្រជាជន​វិល​ត្រឡប់​ពី​កម្ពុជា ដែល​មាន​រោគ​សញ្ញា​មេរោគ H5N1 ​គួរ​ជូន​ដំណឹង​មន្រ្តី​អន្តោប្រវេសន៍ ភ្លាមៗ នឹង​មាន​ការ​ត្រួត​ពិនិត្យ​សីតុណ្ហភាព​​លើ​អ្នក​ដំណើរ ហើយ​ទំនិញ វ៉ាលិស និង​កញ្ចប់​ពី​កម្ពុជា នឹង​ត្រូវ​សម្លាប់​មេរោគ​សិន មុន​ពេល​ត្រូវ​អនុញ្ញាត​ឲ្យ​ចូល​ក្នុង​ប្រទេស​ចិន។ ​សេចក្តី​ជូន​ដំណឹង​បាន​បន្ត​ថា៖ «​វិធានការ​ទាំង​នេះ គឺ​ដើម្បី​បង្ការ​ការ​រីករាលដាល​នៃ​ជំងឺ​គ្រុន​ផ្តាសាយ​បក្សី​ចូល​មក​ចិន និង​ការ​ពារ​ជន​ជាតិ​ចិន​ដែល​ចូល និង​ចាក​ចេញ​ពី​កម្ពុជា»។

វិធានការ​នេះ អាច​នឹង​ចូល​ជា​ធរមាន​សម្រាប់​រយៈ​ពេល ៣ ខែ៕ TK

អត្ថបទគួរចាប់អារម្មណ៍