The Phnom Penh Post Search

Search form




Logo of Phnom Penh Post newspaper Phnom Penh Post - ជន​ជាតិ​ថៃ​ឆ្លង​ដែន​ខុស​ច្បាប់​ពីរ​នាក់​ត្រូវ​ឃាត់​ខ្លួន​នៅ​ជិត​ព្រះវិហារ

ជន​ជាតិ​ថៃ​ឆ្លង​ដែន​ខុស​ច្បាប់​ពីរ​នាក់​ត្រូវ​ឃាត់​ខ្លួន​នៅ​ជិត​ព្រះវិហារ

ជន​ជាតិ​ថៃ​ពីរ​នាក់​ដែល​សមត្ថកិច្ច​កម្ពុជា​ឃាត់​ខ្លួន។
ជន​ជាតិ​ថៃ​ពីរ​នាក់​ដែល​សមត្ថកិច្ច​កម្ពុជា​ឃាត់​ខ្លួន។ រូបថត សហការី

ជន​ជាតិ​ថៃ​ឆ្លង​ដែន​ខុស​ច្បាប់​ពីរ​នាក់​ត្រូវ​ឃាត់​ខ្លួន​នៅ​ជិត​ព្រះវិហារ

ភ្នំពេញៈ មន្រ្តី​យោធា​បាន​ឲ្យ​ដឹង​ថា កាល​ពី​ព្រឹក​ថ្ងៃ​អាទិត្យ អាជ្ញាធរ​កម្ពុជា​បាន​ឃាត់​ខ្លួន​ជន​ជាតិ​ថៃ​ចំនួន​ពីរ​នាក់​បន្ទាប់​ពី​ពួក​គេ​បាន​ឆ្លង​ដែន​ចូល​ជ្រៅ​មក​ក្នុង​ទឹក​ដី​កម្ពុជា ដើម្បី​ធ្វើ​ការ​បរ​បាញ់​សត្វ​ព្រៃ។

លោក ព្រាប ធឿត មន្រ្តី​ព័ត៌មាន​នៃ​កង​យោធពល​ខេមរ​ភូមិន្ទ​ប្រចាំ​នៅ ខេត្ត​ព្រះ​វិហារ បាន​ថ្លែង​ឲ្យ​ដឹង​ថា បុរស​ជនជាតិ​ថៃ​ពីរ​នាក់​ត្រូវ​បាន​ឃាត់​ខ្លួន​នៅ​ម៉ោង​ប្រហែល ៨ និង ៥០ នាទី​នៅ​តំបន់ ណងធឹម ខាង​ជើង​ប្រាសាទ​ព្រះវិហារ ខណៈ​ពួក​គេ​ឆ្លង​ដែន​មក​ធ្វើ​ការ​បរបាញ់​សត្វ ដោយ​កង​កម្លាំង​កម្ពុជា រឹប​អូស​បាន​កាំភ្លើង​វែង​ពីរ​ដើម​ផង​ពី​អ្នក​ទាំង​ពីរ។

យោង​តាម​លោក ព្រាប ធឿត បាន​ឲ្យ​ដឹង​ថា បុរស​ជន​ជាតិ​ថៃ​ពីរ​នាក់​នោះ​ម្នាក់​ឈ្មោះ Sin La អាយុ ៥៧​ឆ្នាំ និង​ម្នាក់​ឈ្មោះ Thak Vin អាយុ ៣៩​ឆ្នាំ មក​ពី ខេត្ត​ស៊ីសាកេត ហើយ​មន្រ្តី​យោធា​បាន​ប្រគល់​ពួក​គេ​ទៅ​ឲ្យ​ប៉ុស្តិ៍​នគរបាល​មូលដ្ឋាន​នៅ ជាំក្សាន្ត ដើម្បី​សាក​សួរ​ថា តើ​ត្រូវ​ចាត់​វិធានការ​ផ្លូវ​ច្បាប់​ប្រឆាំង​ពួកគេ​ឬ​យ៉ាង​ណា?។

លោក​ឧត្តម​សេនីយ៍ ផាត់ សុផេន ប្រធាន​ការិយាល័យ​ទំនាក់​ទំនង​ព្រំដែន​កម្ពុជា-ថៃ ប្រចាំ​នៅ ខេត្ត​ព្រះវិហារ បាន​ថ្លែង​បញ្ជាក់​ពី​ការ​ចាប់​ខ្លួន​បុរស​ថៃ​ទាំង​ពីរ​នាក់​ថា នគរបាល​មូលដ្ឋាន​នៅ ស្រុក​ជាំក្សាន្ត កំពុង​ចាត់​ការ​លើ​បញ្ហា​នេះ។

លោក​ឧត្តម​សេនីយ៍ ស៊ី គីរី ស្នងការ​នគរបាល ខេត្ត​ព្រះ​វិហារ បាន​ថ្លែង​ថា នគរបាល​មូលដ្ឋាន​បាន​សាក​សួរ​ពួកគេ​អំពី​ការ​ឆ្លង​ដែន​ខុស​ច្បាប់ ហើយ​ពួកគេ​បាន​សារភាព​ថា មក​បរ​បាញ់​សត្វ​ដោយ​មិន​ដឹង​ពី​តំបន់​ឆ្លង​កាត់​ព្រំដែន​ទេ។

លោក ស៊ី គីរី បាន​ប្រាប់​ថា អាជ្ញាធរ​កម្ពុជា​នឹង​មិន​ចាត់​វិធានការ​ផ្លូវ​ច្បាប់​ប្រឆាំង​នឹង​ពួកគេ​ទេ ព្រោះ​ពួកគេ​គឺជា​ជន​ស៊ីវិល ហើយ​មិន​ដឹង​ពី​តំបន់​ព្រំដែន​ទេ ដូច្នេះ ពួក​គេ​បាន​ទាក់ទង​អាជ្ញាធរ​ថៃ​ឲ្យ​យក​ពួក​គេ​ទៅ​ស្រុក​វិញ។

លោក គីរី ថ្លែង​ថា៖ «អាជ្ញាធរ​នឹង​ដោះ​លែង​ពួកគេ​នៅ​ពេល​អាជ្ញាធរ​ថៃ​មក​យក​ពួកគេ។ យើង​មិន​ចាត់​វិធាន​ការ​ផ្លូវ​ច្បាប់​លើ​ពួកគេ ដោយ​សារ​យើង​ជា​មិត្ត​ជិត​ខាង​គ្នា»។

លោក ឡោ ចាន់ អ្នក​សម្រប​សម្រួល​សមាគម អាដហុក នៅ ខេត្ត​ព្រះ​វិហារ បាន​ថ្លែង​ថា ខាង​អាជ្ញាធរ​កម្ពុជា​មិន​ដែល​បាញ់​លើ​ពលរដ្ឋ​ថៃ​ដែល​ឆ្លង​កាត់​ព្រំដែន​ខុស​ច្បាប់ ផ្ទុយ​ពី​អាជ្ញាធរ​ថៃ​ដែល​តែង​តែ​បាញ់​មក​លើ​ជន​កម្ពុជា​ពេល​ឆ្លង​កាត់​ព្រំដែន​ទៅ​កាប់​ឈើ ឬ​បរ​បាញ់។

លោក​បាន​បន្ថែម​ថា៖ «ខ្ញុំ​អង្កេត​ឃើញ​ថា អាជ្ញាធរ​កម្ពុជា​មិន​ដែល​ចាត់​វិធានការ​មក​លើ​ពលរដ្ឋ​ថៃ ដែល​ចូល​មក​កម្ពុជា​ខុស​ច្បាប់​ទេ។ ផ្ទុយ​ទៅ​វិញ​កងទ័ព​ថៃ មិន​ដែល​អត់​ឱន​ឲ្យ​ពលរដ្ឋ​ខ្មែរ​ឡើយ»៕

អត្ថបទគួរចាប់អារម្មណ៍