The Phnom Penh Post Search

Search form




Logo of Phnom Penh Post newspaper Phnom Penh Post - ជន​ជាតិ​អ៊ុយហ្គ័រ ៣ នាក់​ត្រូវ​ចាប់​ខ្លួន​បន្ទាប់​ពី​ចេញ​ពី​កម្ពុជា

ជន​ជាតិ​អ៊ុយហ្គ័រ ៣ នាក់​ត្រូវ​ចាប់​ខ្លួន​បន្ទាប់​ពី​ចេញ​ពី​កម្ពុជា

ជន​ជាតិ​អ៊ុយហ្គ័រ ៣ នាក់​ត្រូវ​ចាប់​ខ្លួន​បន្ទាប់​ពី​ចេញ​ពី​កម្ពុជា

ភ្នំពេញៈ មនុស្ស ៥​នាក់ ក្នុង​នោះ ៣​នាក់ ត្រូវ​បាន​សន្មត​ថា ជា​ជនជាតិ​អ៊ុយហ្គ័រ ត្រូវ​បាន​ចាប់​ខ្លួន​កាល​ពី​ថ្ងៃ​សុក្រ បន្ទាប់​ពី​នគរបាល​ថៃ​ដែល​ចូល​និវត្តន៍​ម្នាក់ បាន​នាំ​ពួក​គេ​ឆ្លង​កាត់​ព្រំ​ដែន​កម្ពុជា​ដោយ​ខុស​ច្បាប់។ នេះ​បើ​តាម​ប្រព័ន្ធ​ផ្សព្វ​ផ្សាយ​ថៃ​រាយការណ៍​កាល​ពី​ថ្ងៃ​ចន្ទ។

មន្រ្តី​ចូល​និវត្តន៍​ម្នាក់​នោះ ត្រូវ​បាន​បញ្ឈប់​បន្ទាប់​ពី​មន្រ្តី​ដើរ​ល្បាត​ឃើញ​រថយន្ត​របស់​គាត់​បើក​បរ​ចេញ​ពី​ព្រំ​ដែន​ក្នុង ខេត្ត​ស្រះកែវ។ ប៉ូលិស​ថៃ​បាន​អះអាង​ថា បាន​ទទួល​ដំណឹង​ថា ជន​បរទេស ៥ នាក់ ដែល​បាន​លាក់​ខ្លួន​នៅ ប៉ោយប៉ែត នឹង​ត្រូវ​ឆ្លង​ដែន។ អ្នក​ដំណើរ​ជន​ជាតិ​បង់ក្លាដេស ពីរ​នាក់ មាន​លិខិត​ឆ្លង​ដែន ប៉ុន្តែ​គ្មាន​ទិដ្ឋាការ​ហើយ​មនុស្ស ៣ នាក់​ដែល​គេ​សង្ស័យ​ថា ជា​ជនជាតិ​អ៊ុយហ្គ័រ ដែល​គ្មាន​ឯកសារ​ត្រូវ​បាន​សាក​សួរ និង​ឃាត់​ខ្លួន។

តំណាង​ស្ថានទូត​ថៃ​នៅ​ភ្នំពេញ និង​មន្រ្តី​រដ្ឋាភិបាល​កម្ពុជា បាន​ថ្លែង​ថា ពួក​គេ​គ្មាន​ព័ត៌មាន​ស្តីពី​ជន​បរទេស​ដែល​ត្រូវ​បាន​ចាប់​ខ្លួន​ទេ។ បើ​ទោះ​បី​ជា​មាន​ភ័ស្តុតាង​បញ្ជាក់​ពី​បណ្តាញ​ជួញ​ដូរ​មនុស្ស​ដែល​បញ្ជូន​ជនជាតិ​អ៊ុយហ្គ័រ ពី​ចិន ឆ្លង​កាត់​តាម​វៀតណាម កម្ពុជា ថៃ ម៉ាឡេស៊ី និង​បន្ទាប់​មក​ទៅ ប្រទេស​ទួកគី ឬ​ទិស​ដៅ​ដទៃ​ទៀត​ក៏​ដោយ ក៏​ប៉ុន្តែ មន្រ្តី​កម្ពុជា​បាន​បដិសេធ​ការ​ចោទ​ប្រកាន់​ដែល​ថា កម្ពុជា គឺជា​ចំណុច​ឆ្លង​កាត់​សម្រាប់​អ្នក​ស្វែង​រក​សិទិ្ធ​ជ្រក​កោន។

លោក សូ ចាន់ណារី មេ​បញ្ជាការ​អង្គភាព​នគរបាល​ព្រំដែន​លេខ ៩១១ នៅ ខេត្ត​បន្ទាយ​មាន​ជ័យ បាន​ថ្លែង​ថា៖ «មិន​អាច​ទេ យើង​គ្មាន​ជន​បរទេស [អ៊ុយហ្គ័រ] លាក់​ខ្លួន​ក្នុង​ទឹក​ដី​យើង​ទេ។ តាម​ព្រំដែន​យើង​បាន​ត្រួត​ពិនិត្យ​យ៉ាង​ម៉ត់​ចត់»។

ប៉ុន្តែ​ជនជាតិ​អ៊ុយហ្គ័រ រាប់​រយ​នាក់​ត្រូវ​បាន​រាយការណ៍​ថា បាន​ឆ្លង​កាត់​ព្រំដែន​ក្នុង​ឆ្នាំ​នេះ ខណៈ​ដែល​ពួកគេ​រត់​គេច​ចេញ​ពី​អំពើ​ហិង្សា និង​ការ​ធ្វើ​ទុក្ខ​បុកម្មេញ​កាន់​តែ​ខ្លាំង​ឡើង​នៅ​ខេត្ត Xinjian ប្រទេស​ចិន។ កាល​ពី ខែ​មីនា ជន​ជាតិ​អ៊ុយហ្គ័រ ១៥ នាក់​ត្រូវ​បាន​ចាប់​ខ្លួន​នៅ ខេត្ត​ស្រះកែវ ប៉ុន្មាន​ម៉ោង​បន្ទាប់​ពី​ពួក​គេ​ត្រូវ​បាន​និរទេស​ទៅ​ថៃ​ដែល​សម្រួល​ដោយ​អាជ្ញាធរ​កម្ពុជា។ នេះ​បើ​យោង​តាម​អង្គការ​ឃ្លាំ​មើល​សិទិ្ធ​មនុស្ស។

លោក ផៃ ស៊ីផាន អ្នក​នាំ​ពាក្យ​ទីស្តីការ​គណៈ​រដ្ឋ​មន្ត្រី បាន​ថ្លែង​ថា អ្នក​ដែល​ព្យាយាម​ឆ្លង​កាត់​កម្ពុជា​ដោយ​គ្មាន​ឯកសារ​ត្រឹម​ត្រូវ ត្រូវ​បញ្ជូន​ទៅ​ប្រទេស​គេ​វិញ...មាន​តែ UNHCR ទេ អាច​ជួយ​ជន​ភៀស​ខ្លួន ហើយ​ក្នុង​ប្រទេស​យើង យើង​គ្មាន​អង្គការ​នេះ​ទេ»៕

អត្ថបទគួរចាប់អារម្មណ៍