The Phnom Penh Post Search

Search form




Logo of Phnom Penh Post newspaper Phnom Penh Post - ជន​ម៉ុងតាញ៉ា ១២ នាក់​ត្រូវ​បាន​បញ្ជូន​ទៅ​វៀតណាម​វិញ

ជន​ម៉ុងតាញ៉ា ១២ នាក់​ត្រូវ​បាន​បញ្ជូន​ទៅ​វៀតណាម​វិញ

Content image - Phnom Penh Post
ក្រុម​ជនជាតិ​ម៉ុងតាញ៉ា​មានគ្នា ១៨​នាក់ រត់​គេច​ខ្លួន​ចូល​មក​ក្នុង​ខេត្ត​រតនគិរី ប្រទេស​កម្ពុជា កន្លង​មក។ រូបថត អាដហុក

ជន​ម៉ុងតាញ៉ា ១២ នាក់​ត្រូវ​បាន​បញ្ជូន​ទៅ​វៀតណាម​វិញ

ភ្នំពេញ៖ ជន​ស្វែង​រក​សិទ្ធិ​ជ្រកកោន ​ម៉ុងតាញ៉ា ១២ នាក់​ត្រូវ​បាន​បញ្ចូន​ត្រឡប់​ទៅ​កាន់​ប្រទេស​វៀតណាម​វិញ ដោយ​ស្ម័គ្រ​ចិត្ត​កាល​ពី​រសៀល​ម្សិលមិញ បន្ទាប់​ពី​បាន​ស្នាក់​នៅ​អស់​ជា​ច្រើន​ខែ​នៅ​ក្នុង​រាជធានី​ភ្នំពេញ ដោយ​សង្ឃឹម​ថា​នឹង​ទទួល​បាន​សិទ្ធិ​ជា​ជន​ភៀស​ខ្លួន។

ជន​ភៀស​ខ្លួន​ក្រុម​នេះ រួម​មាន​ទាំង​ក្មេង​ចំនួន ៣ នាក់​ផង​ដែរ​ត្រូវ​បាន​មន្ត្រី​នៃ​ទីភ្នាក់ងារ ជន​ភៀស​ខ្លួន​របស់​អង្គការ​សហប្រជាជាតិ (UNHCR) អម​ដំណើរ​ជាមួយ បញ្ជូន​ទៅ​កាន់​ច្រក​ព្រំដែន​អន្តរជាតិ អូយ៉ាដាវ ក្នុង​ខេត្ត​រតនគីរី និង​បាន​ប្រគល់​ទៅ​ឲ្យ​អាជ្ញាធរ​ប្រទេស​វៀតណាម​នៅ​មុន​ម៉ោង ៧ ល្ងាច​ថ្ងៃ​ទី ១៦ កក្កដា។

លោកស្រី Vivian Tan អ្នក​នាំ​ពាក្យ UNHCR បាន​និយាយ​ថា ការ​ចង់​ត្រឡប់​ទៅ​វិញ​របស់​ជនភៀស​ខ្លួន​ទាំង​នោះ​ត្រូវ​បាន​សម្រប​សម្រួល «តាម​សំណើរ​របស់​ពួកគេ​និង​ឈរ​លើ​មូលដ្ឋាន​មួយ​ចំនួន​ទៀត…បន្ទាប់​ពី​ពិនិត្យ​ឃើញ​ថា ពួកគេ​ទំនង​ជា​ស្មគ្រ័ចិត្ត​ដោយ​ខ្លួន​ឯង [ចង់​ត្រឡប់​ទៅ​វិញ]។

លោក​ស្រី​បាន​បន្ថែម​ទៀត​ថា «រដ្ឋាភិបាល​វៀតណាម​បាន​យល់​ព្រម​ទទួល​យក​ពួកគេ​វិញ និង​បាន​ផ្តល់​ការ​ធានា​ថា នឹង​មិន​រើសអើង​ប្រឆាំង ឬ​ធ្វើ​ទុក​បុក​ម្នេញ​ពួកគេ​ទៀត​ទេ។ វៀតណាម ​ក៏​ធានា​ដែរ​ថា UNHCR ក៏​អាច​នឹង​ទៅ​សួរ​សុខទុក្ខ​ពួកគេ​បាន​ផង​ដែរ បន្ទាប់​ពី​ពួកគេ​ត្រឡប់​ទៅ​ដល់​ផ្ទះ​វិញ»។

កាល​ពី​ខែ​តុលា ក្រុម​ជនជាតិ​ភាគ​តិច​ម៉ុងតាញ៉ា​ប្រហែល ១០០ នាក់​មក​ពី​តំបន់​ភ្នំ​ភាគ​កណ្តាល​នៃ​ប្រទេស​វៀតណាម បាន​រត់​គេច​ខ្លួន​ចូល​ប្រទេស​កម្ពុជា​ដោយសារ​មាន​ការ​ធ្វើ​ទុក្ខ​បុកម្នេញ​ខាង​សាសនា និង​នយោបាយ​មក​លើ​ពួកគេ។ ប៉ុន្តែ មក​ដល់​ពេល​នេះ មាន​ម៉ុងតាញ៉ា​តែ ១៣ នាក់​ប៉ុណ្ណោះ ដែល​ត្រូវ​បាន​ទទួល​យក ខណៈ ដែល​មួយ​ចំនួន​ទៀត​ត្រូវ​បាន​រាយ​ការណ៍​កំពុង​ពិនិត្យ​មើល និង​មួយ​ក្រុម​ធំ​ទៀត កំពុង​រស់​នៅ​ក្នុង​ភាព មិន​ប្រាកដ​ប្រជា​នៅ​ទីក្រុង​ភ្នំពេញ រង់ចាំ​ការ​ទទួល​សិទ្ធិ​ជ្រក​ក្រន​ជា​ជន​ភៀសខ្លួន។

លោក ឆាយ ធី មន្ត្រី​សម្រប​សម្រួល​អង្គការ​សិទ្ធិ​មនុស្ស​អាដហុក ប្រចាំ​ខេត្ត​រតនគីរី បាន​ឲ្យ​ដឹង​ដែរ​ថា ជន​ម៉ុងតាញ៉ា ១២ នាក់​ត្រូវ​បាន​បញ្ជូន​ទៅ​វិញ​ហើយ ក្នុង​ចំណោម ៣១ នាក់​ដែល​ចូល​មក​កម្ពុជា​ដើម្បី​ស្វែង​រក​សិទ្ធិ​ជ្រក​កោន​កាល​ពី​ខែ​មិនា។

លោក ធី បាន​និយាយ​ថា «ពួកគេ​ប្រាថ្នា​ចង់​បាន​ស្ថានភាព​សេដ្ឋកិច្ច​មួយ​ដ៏​ប្រសើរ​នៅ​ក្នុង​ប្រទេស​ដទៃ​ទៀត ប៉ុន្តែ បន្ទាប់​ពី​រង់ចាំ​រយៈពេល​ជា​ច្រើន​ខែ​មក ពួកគេ​ក៏​សម្រេច​ចិត្ត​ត្រឡប់​ទៅ​ប្រទេស​វៀតណាម​វិញ»។

លោក ជា ប៊ុនធឿន ស្នងការ​រង​នគរបាល​ខេត្ត​រតនគីរី​ទទួល​បន្ទុក​ជន​អន្តោ​ប្រវេសន៍ ក៏​បាន​បញ្ជាក់​ដែរ​ថា ម៉ុងតាញ៉ា ១២ នាក់​នោះ គឺ​ជា​ក្រុម​ទីពីរ ដែល​បាន​សម្រេច​ចិត្ត​ត្រឡប់​ទៅ​វៀតណាម​វិញ»។

មន្ត្រី​ក្រសួង​មហាផ្ទៃ និង​ស្ថានទូត​វៀតណាម​ប្រចាំ​កម្ពុជា​មិន​អាច​ធ្វើ​ការ​ទាក់​ទង​បាន​ទេ​កាល​ពី​ម្សិលមិញ។

សូមបញ្ជាក់ថា កាល​ពី​ខែ​មុន អង្គការ​ឃ្លាំមើល​សិទ្ធិ​មនុស្ស​បាន​ចេញ​របាយការណ៍​ពី​ការ​ចាប់​ខ្លួន​ដោយ​បំពាន វាយដំ និង​ធ្វើ​ទារុណកម្ម ដែល​ជា​ការ​ប្រព្រឹត្ត​បទ​ឧក្រិដ្ឋ​កម្ម​ពី​សំណាក់​អាជ្ញាធរ​វៀតណាម ដែល​ហេតុ​ធ្វើ​ឲ្យ​ជន​ភៀស​ខ្លួន ម៉ុងតាញ៉ា​ទាំង​នោះ បង្ខំ​រត់​គេច​ខ្លួន​មក​កាន់​ប្រទេស​កម្ពុជា៕

អត្ថបទគួរចាប់អារម្មណ៍