ភ្នំពេញៈ ជនសង្ស័យក្នុងការវាយប្រហារដោយទឹកអាស៊ីតមកលើប្តីប្រពន្ធក្នុងស្រុកមេមត់ខេត្តកំពង់ចាមកាលពីខែមុន នៅមានសេរីភាពនៅឡើយហើយថែមទាំងចំអកឡកឡឺយដាក់ជនរងគ្រោះដែលជាអតីតប្រពន្ធខ្លួនតាមទូរស័ព្ទលើពិការភាពដែលខ្លួនគេបានបង្កទៀតផង។
អ្នកស្រី សេន ស្រី រតន៍ អាយុ ២៣ ឆ្នាំ បាននិយាយថា៖ «គាត់បានប្រាប់ខ្ញុំថា ខ្ញុំស្រឡាញ់ប្តីពិការ ... និងថា គ្មានអ្នកណាម្នាក់អាចចាប់ខ្លួនគាត់បានទេ»។
អ្នកស្រីអះអាងថា បុរសដែលវាយប្រហារគាត់នោះឈ្មោះ ជា ថេង អាយុ ២៣ ឆ្នាំ ដែលបានលែងលះគ្នា មុនគាត់រៀបការជាមួយប្តីក្រោយ ឡុង ប៊ុនធឿន អាយុ ៣២ ឆ្នាំ កាលពីមួយឆ្នាំមុន។ កាលពីកន្លងមកនគរបាលបានប្រាប់ ភ្នំពេញ ប៉ុស្តិ៍ ថា លោក ថេង ជាអតីតសង្សារមិនមែនជាប្តីរបស់អ្នកស្រី ស្រីរតន៍ ទេ។
តែ ដោយការប្រចណ្ឌថេង បានជះទឹកអាស៊ីតតាមបង្អួចផ្ទះដែលប្តីប្រពន្ធទាំងពីររស់នៅខណៈពួកគេកំពុងដេកក្នុងអង្រឹង។
លោក ប៊ុនធឿន រងរបួសធ្ងន់ធ្ងរក្នុងការវាយប្រហារលើមុខ ដើមទ្រូង និងខ្នងចំណែកឯស្រីរតន៍ រងរបួសតិចតួចត្រង់ខ្នង។
បន្ទាប់ពីបានទៅព្យាបាលនៅប្រទេសវៀតណាម លោក ប៊ុនធឿន និង ស្រីរតន៍ ជាប្រពន្ធអាចទាក់ទងអង្គការជួយជនរងគ្រោះកម្ពុជាដោយទឹកអាស៊ីត ដែលបានរៀបចំជំនួយតាមរយៈមន្ទីរពេទ្យមិនរកប្រាក់កម្រៃដែលជនរងគ្រោះដោយទឹកអាស៊ីតស្វែងរកការព្យាបាលគឺមជ្ឈមណ្ឌលវះកាត់កុមារនៅភ្នំពេញ។
លោក Erin Bourgois អ្នកគ្រប់គ្រងគម្រោងនៅអង្គការជួយជនរងគ្រោះកម្ពុជាដោយសារទឹក អាស៊ីត បានថ្លែងកាលពីម្សិលមិញថា លោក ប៊ុនធឿន រលាកខ្លួន ១៥ ភាគរយ។ ស្នាមរលាកទឹកអាស៊ីតឡើងតឹង ដែលចាំបាច់ត្រូវវះកាត់។ ការធ្វើដូច្នេះ ស្បែកគាត់មិនទាញតឹងទេ។ ការសម្អាតជាប្រចាំក៏ជាការចាំបាច់ដែរ ដើម្បីការពារការឆ្លងមេរោគ។
លោក Bourgois បានថ្លែងថា ៖ «គាត់ត្រូវការការវះកាត់ ហើយត្រូវការការវះកាត់ម្តងទៀតនៅសប្តាហ៍ក្រោយ។ពេលគាត់ទទួលការព្យាបាលរួចយើងមានសង្ឃឹមថា គាត់នឹងមកចូលរួមកិច្ចប្រជុំជនរងគ្រោះដោយសារទឹកអាស៊ីត នៅក្នុងខែមិថុនា»។
លោក ដេន រិទ្ធី នាយប៉ុស្តិ៍នគរបាលឃុំជាំក្រវៀន បានថ្លែងកាលពីម្សិលមិញថា នគរបាលនៅតែតាមដានរកជនសង្ស័យ ហើយលោកជឿជាក់ថា ពួកគេជិតឈានដល់ការចាប់ខ្លួនហើយ។
អ្នកស្រី ស្រីរតន៍ បានថ្លែងថា ជនសង្ស័យបានយាយីរូបគាត់ដោយបានទូរស័ព្ទចំអកឲ្យគាត់ជាច្រើនលើក បន្ទាប់ពីការវាយប្រហារមកលើគាត់។
អ្នកស្រី ស្រីរតន៍ បានបន្ថែមថា៖ «ខ្ញុំបានប្រាប់ឪពុកខ្ញុំ ហើយគាត់បានជូនដំណឹងទៅដល់មន្រ្តីនគរបាលឲ្យស៊ើបអង្កេត និងចាប់ខ្លួនជនល្មើស។ ខ្ញុំសូមអំពាវនាវដល់នគរបាលឲ្យចាប់ខ្លួនជនសង្ស័យក្នុងពេលឆាប់ៗ។ យើងកំពុងរស់នៅក្នុងភាពភ័យខ្លាច និងឈឺចាប់បំផុត។ យើងមិនត្រូវការសំណងពីជនល្មើសទេ តែយើងចង់បានយុតិ្តធម៌ និងចង់ឲ្យគាត់ជាប់ពន្ធនាគារ»។ TK
រាយការណ៍បន្ថែមដោយៈJOE FREEMAN
