The Phnom Penh Post Search

Search form




Logo of Phnom Penh Post newspaper Phnom Penh Post - ជន​អនាថា​លួច​​លាប​ធ្យូង​និង​ពណ៌​លើ​រូប​សំណាក​ព្រះ​នាង​ ឥន្រ្ទទេវី

ជន​អនាថា​លួច​​លាប​ធ្យូង​និង​ពណ៌​លើ​រូប​សំណាក​ព្រះ​នាង​ ឥន្រ្ទទេវី

Content image - Phnom Penh Post
រូប​សំណាក​ព្រះ​នាង​ ឥន្រ្ទទេវី ត្រូវជនអនាថា លួច​លាប​ព្រះ​ភ័ក្ត្រ​កាល​ពី​ល្ងាច​ថ្ងៃ​សៅរ៍​សប្តាហ៍​មុន។ រូបថត សហការី

ជន​អនាថា​លួច​​លាប​ធ្យូង​និង​ពណ៌​លើ​រូប​សំណាក​ព្រះ​នាង​ ឥន្រ្ទទេវី

បាត់ដំបង៖ រូប​សំណាក​ព្រះ​នាង​ ឥន្រ្ទទេវី ​ដែល​ស្ថិត​នៅ​ក្នុង​សួន​ច្បារ​សម្តេច​ក្រឡា​ហោម ស ខេង ​ក្នុង​ក្រុង​បាត់ដំបង​ ខេត្ត​បាត់​ដំបង ​ត្រូវ​បាន​ជន​អនាថា និង​ជន​វិកល​ចរិក​បាន​យក​ធ្យូង និង​ពណ៌​មក​ផាត់​លើ​ភ្នែក ចិញ្ចើម និង​បបូរមាត់​ កាល​ពី​ល្ងាច​ថ្ងៃ​សៅរ៌​ចុង​សប្តាហ៌​នេះ ប៉ុន្តែ​ត្រូវ​បាន​សមត្ថកិច្ច​នាំគ្នា​លាង​សំអាត​វិញ​កាល​ពី​ថ្ងៃ​អាទិត្យ​ម្សិល​មិញ​នេះ។

លោក​ យឹម វិចិត្រ អធិការ​ក្រុង​ បាត់ដំបង បាន​ប្រាប់​កាសែត​ ភ្នំពេញ ​ប៉ុស្តិ៍​កាល​ពី​ថ្ងៃ​ម្សិលមិញ​ថា នេះ​មិន​មែន​ជា​លើក​ទី​ ១ ​ទេ ដែល​មាន​សកម្មភាព​ដូច​នេះ​កើត​ឡើងដែល​បង្ក​ឡើង​ដោយ​ក្រុម​ជន​អនាថា និង​ជន​វិកល​ចរិក​ ដែល​​កន្លង​មក​ធ្លាប់​មាន​ការ​យក​ទង់​ជាតិ​មក​គ្រប​ពី​លើ​ព្រះ​កេស​របស់​រូប​សំណាក និង​បាន​នាំ​គ្នា​ជុះ​អាចម៌ ជុះ​នោម​នៅ​កន្លែង​រូប​សំណាក​នោះ​ទៀត​ផង។

លោក​បាន​ថ្លែង​ថា៖ «ពីមុន​ៗ​ ក្រុម​ជន​អនាថា​ទាំង​នោះ​បាន​ធ្វើ​ដូច​នេះ​ ខណៈ​ពេល​ដែល​សមត្ថកិច្ច​យើង​មិន​បាន​យាម​កាម​នៅ​ទីនោះ។ ពួក​យើង​មិន​បាន​អនុញ្ញាត​ឲ្យ​ពួក​គេ​ទៅ​ដេក​នៅ​កន្លែង​នោះ​ទេ ដើម្បី​រៀប​ចំ​សណ្តាប់​ធ្នាប់​សួន​សាធារណៈ​ ប៉ុន្តែ​ពួក​គេ​នៅ​តែ​ទៅ​ដេក ​និង​បង្ក​ផល​ប៉ះពាល់​សណ្តាប់​ធ្នាប់​នៅ​កន្លែង​នោះ។ ការ​ដែល​ពួក​គេ​យក​វត្ថុ​ពណ៌​ទៅ​លាប​លើ​មុខ​របស់​រូប​សំណាក​នេះ​ ដោយ​សារ​តែ​ពួក​គេ​ខឹង​នឹង​សមត្ថកិច្ច​យើង​ដែល​បាន​ដេញ​ពួក​គេ​មិន​ឲ្យ​នៅ​ទីនោះ​»។

លោក​ យឹម វិចិត្រ ​បន្ត​បន្ថែម​ទៀត​ថា កម្លាំង​សមត្ថកិច្ច​របស់​លោក​តែង​តែ​ប្រចាំ​ការ​នៅ​ទីនោះ​រហូត ប៉ុន្តែ​វា​ឆ្លៀត​ពេល​ដែល​សមត្ថកិច្ច​មិន​នៅ​ ភាគ​ច្រើន​ជន​អនាថា​ទាំង​នោះ​ចេញ​មក​ច្រើន​នៅ​ពេល​យប់ ដែល​ពេល​ថ្ងៃ​មិន​សូវ​ជា​មាន​ច្រើន​ប៉ុន្មាន​នោះទេ។

លោក​បាន​ថ្លែង​ទៀត​ថា៖​ «មាន​ច្រើន​លើក​ច្រើន​ដង​ហើយ​ដែល​មាន​ករណី​យក​វត្ថុ​មក​គូ​លើ​រូប​សំណាក​នេះ។ យើង​ឃើញ​ យើង​ដេញ​ចេញ រួច​ត្រលប់​មក​វិញ​ទៀត​។ មាន​ឆ្មាំ​សម្រាប់​ថែ​សួន​របស់​យើង​ ប៉ុន្តែ​អ្នក​ថែ​ទាំ​កន្លែង​នោះ​មិន​បាន​នៅ​មើល​រហូត​ ២៤ ​ម៉ោង​ ជាពិសេស​ពេល​យប់ ដែល​ជា​ហេតុ​នាំ​ជន​ទាំង​នោះ​មាន​ឳកាស​ធ្វើ​ដូច​នេះ»។

លោក​ថា​ អជ្ញាធរក្រុង​បាន​ប្រមូល​ក្រុម​អនាថា​នោះ​ជា​ច្រើន​ដង​មក​ហើយ​ ហើយ​បាន​បញ្ជូន​ទៅ​កាន់​មណ្ឌល​កែប្រែ​ ប៉ុន្តែ​ពួក​គេ​បាន​លួច​រត់​ចេញ​មក​វិញ​ដដែល។

នៅ​ថ្ងៃ​ត្រង់​ថ្ងៃ​អាទិត្យ​ម្សិល​មិញ​នេះ​ដែរ សមត្ថកិច្ច​ក្រុង​បាន​ចុះ​ទៅ​ធ្វើ​ការ​ដុះ​លាង​សំអាត​ស្នាម​គូ​លើ​ព្រះ​ភ័ក្រ​របស់​រូប​សំណាក​ព្រះ​នាង​ឥន្រ្ទ​ទេវី​ផង​ដែរ។

លោក​ ជេត វណ្ណី ស្នង​ការ​រង​ខេត្ត​បាត់​ដំបង​បាន​មាន​ប្រសាសន៌​កាល​ពី​ថ្ងៃ ម្សិល​មិញ​ដែរ​ថា លោក​មិន​ទាន់​បាន​ឃើញ​រូប​សំណាក​ដែល​ត្រូវ​បាន​គេ​គូ​នោះទេ ប៉ុន្តែ​លោក​ថា​ នេះ​ជា​ការ​ឆក​ល្វែង​មួយ​ពី​សមត្ថកិច្ច​ដែល​បណ្តោយ​ឲ្យ​ជន​អនាថា​ទាំង​នោះ​ធ្វើ​សកម្មភាព​ដូច​នេះ ហើយ​សមត្ថកិច្ច​ និង​អាជ្ញាធរ​ខេត្តនឹង​ពង្រឹង​បន្ថែម​កម្លាំង​ការពារ​មិន​ឲ្យ​មាន​ករណី​ដូច​នេះ​កើត​មាន​ឡើង​ទៀត៕

អត្ថបទគួរចាប់អារម្មណ៍