.jpg)
សាកសពបុរសម្នាក់ ដែលត្រូវបានជនពីរនាក់វាយសម្លាប់ នៅសង្កាត់បឹងទំពុន។ រូបថត នគរបាល
ភ្នំពេញៈ សមត្ថកិច្ចបានចាប់ឃាត់ខ្លួន ជនសង្ស័យ ២ នាក់ពាក់ព័ន្ធករណីព្រួតគ្នាវាយសម្លាប់បុរសម្នាក់ នៅសង្កាត់បឹងទំពុន ១ ក្នុងខណ្ឌមានជ័យ រាជធានីភ្នំពេញ ប៉ុន្មានម៉ោង ក្រោយពីជនទាំង ២ នាក់នេះធ្វើសកម្មភាព កាលពីវេលាម៉ោងជាង ១ រំលងអធ្រាត្រឈានថ្ងៃទី ២៥ ឧសភា។
លោកវរសេនីយ៍ឯក សាន សុខសីហា អ្នកនាំពាក្យស្នងការដ្ឋាននគរបាលរាជធានីភ្នំពេញឱ្យដឹងនៅរសៀលថ្ងៃទី ២៥ ឧសភាថា ជនសង្ស័យឈ្មោះ កែវ យិនភី ភេទប្រុស អាយុ ២៧ ឆ្នាំ ជាអ្នករត់ម៉ូតូកង់បីស្នាក់នៅភូមិត្នោតជ្រំ ៣ សង្កាត់បឹងទំពុន ២ និងឈ្មោះ រ៉េត បញ្ញា ភេទប្រុស អាយុ ២៤ ឆ្នាំ រស់នៅក្នុងខណ្ឌទួលគោក រាជធានីភ្នំពេញ។
រីឯបុរសរងគ្រោះឈ្មោះ ម៉ុក អង្គារស្មី អាយុ ៣៥ ឆ្នាំមានលំនៅក្នុងភូមិបុរីកម្មករ សង្កាត់ជើងឯក ខណ្ឌដង្កោ រាជធានី-ភ្នំពេញ។
លោក សុខសីហា បានបញ្ជាក់ថា៖ «សមត្ថកិច្ចយើងស្រាវជ្រាវឃាត់ខ្លួនជនសង្ស័យ ២ នាក់នោះបានហើយ ហើយករណីវាយសម្លាប់បុរសរងគ្រោះនោះ គឺជនសង្ស័យឆ្លើយថា ជារឿងគំនុំ»។
ពាក់ព័ន្ធករណីនេះដែរ បើតាមលោក ជាវ វិបុល អនុប្រធាននាយកដ្ឋានព្រហ្មទណ្ឌនៃអគ្គស្នងការដ្ឋាននគរបាលជាតិបានប្រាប់នៅរសៀលថ្ងៃទី ២៥ ឧសភាថា ការឃាត់ខ្លួនជនសង្ស័យទាំង ២ នាក់គឺកម្លាំងជំនាញព្រហ្មទណ្ឌរបស់លោកសហការជាមួយសមត្ថកិច្ចនៃស្នងការដ្ឋាននគរបាលរាជធានី-ភ្នំពេញ។
លោកបន្តថា បន្ទាប់ពីករណីនេះសមត្ថកិច្ចជំនាញបានស្រាវជ្រាវតាមកាមេរ៉ាសុវត្ថិភាព ដែលបំពាក់នៅជុំវិញកន្លែងកើតហេតុ។ តាមរយៈការពិនិត្យក្នុងកាមេរ៉ាសុវត្ថិភាពនោះបង្ហាញឱ្យឃើញថា ហេតុការណ៍នេះបានកើតឡើងនៅម៉ោងជាង ១ រំលងអធ្រាត្រឈានចូលថ្ងៃទី ២៥ ឧសភា ហើយជនសង្ស័យមានគ្នា ២ នាក់។
ជនសង្ស័យបានបើកម៉ូតូកង់បីដេញវាយជនរងគ្រោះ និងមានការវាយប្រតាយប្រតប់គ្នាផង។ នៅពេលនោះក្រុមជនសង្ស័យបានយកដំថ្មជើងឆត្រវាយក្បាលជនរងគ្រោះបែករួចក៏យកដែកវាយបំបាក់ជើងម្ខាងទៀតហើយក៏នាំគ្នាជិះម៉ូតូកង់បីគេចខ្លួនបាត់។
លោកថ្លែងថា៖ «យើងពិនិត្យតាមកាមេរ៉ាសុវត្ថិភាពបានតម្រុយ រួចមកគឺសមត្ថកិច្ចយើងបានបើកការស្រាវជ្រាវ និងឃាត់ខ្លួនពួកគេបាន ២ នាក់ ដែលជាជនដៃដល់ក្រោយបង្កហេតុប៉ុន្មានម៉ោង»។
បើតាមលោក វេជ្ជបណ្ឌិត នង សុវណ្ណរ័ត្ន ជាគ្រូពេទ្យឯកទេស ផ្នែកធ្វើកោសល្យវិច័យសាកសពនៃក្រសួងសុខាភិបាលបានប្រាប់ ភ្នំពេញ ប៉ុស្តិ៍ បន្ទាប់ពីចេញពីធ្វើកោសល្យវិច័យសាកសពបុរសរងគ្រោះនៅព្រឹកថ្ងៃទី ២៥ ឧសភាថា សាកសពជនរងគ្រោះឈ្មោះ ម៉ុក អង្គារស្មី នៅមុនពេលលោកចូលទៅពិនិត្យត្រូវបានគ្រូពេទ្យឯកទេសផ្នែកជំងឺកូវីដ ១៩ មកពិនិត្យឃើញថា គ្មានមេរោគកូវីដទើបអនុញ្ញាតឱ្យលោកចូលទៅធ្វើកោសល្យវិច័យជាក្រោយ។
លោកបញ្ជាក់ថា ជាលទ្ធផលឃើញថា ផ្នែកក្បាលខាងក្រោយបានប៉ះទង្គិចនឹងវត្ថុរឹងធ្ងន់ធ្ងរហើមខ្លាំង និងមានបាក់ជើងខាងឆ្វេងម្ខាងទៀតផង។ ក្រោយពីនគរបាលជំនាញពិនិត្យ និងក្រោយពីលោកធ្វើកោសល្យវិច័យរួចមកក៏ប្រគល់សាកសពជូនក្រុមគ្រួសារយកទៅធ្វើបុណ្យតាមប្រពៃណី៕
