The Phnom Penh Post Search

Search form




Logo of Phnom Penh Post newspaper Phnom Penh Post - ជន​ ៣​ នាក់ ​​ត្រូវ​​តុលាការ​ចោទ​ប្រកាន់​ និង​បញ្ជូន​ទៅ​ឃុំ​ខ្លួន ​ពាក់​ព័ន្ធ​ការ​ជួញ​ដូរ​គ្រឿង​ញៀន​ជិត ​​១០ គីឡូក្រាម​

ជន​ ៣​ នាក់ ​​ត្រូវ​​តុលាការ​ចោទ​ប្រកាន់​ និង​បញ្ជូន​ទៅ​ឃុំ​ខ្លួន ​ពាក់​ព័ន្ធ​ការ​ជួញ​ដូរ​គ្រឿង​ញៀន​ជិត ​​១០ គីឡូក្រាម​

Content image - Phnom Penh Post
​ជន​ដែល​ត្រូវបាន​តុលាការ​ចោទ​ប្រកាន់​ពីបទ​ជួញ​ដូរ​គ្រឿង​ញៀន​ជិត ​១០​ គីឡូក្រាម។ រូប​ថត នគរបាល​ខេត្ត​ស្វាយ​រៀង​

ជន​ ៣​ នាក់ ​​ត្រូវ​​តុលាការ​ចោទ​ប្រកាន់​ និង​បញ្ជូន​ទៅ​ឃុំ​ខ្លួន ​ពាក់​ព័ន្ធ​ការ​ជួញ​ដូរ​គ្រឿង​ញៀន​ជិត ​​១០ គីឡូក្រាម​

ស្វាយរៀងៈ ជន​សង្ស័យ​ ៣​ នាក់ ​ក្នុង​ចំណោម ​៤​ នាក់ ត្រូវ​បានសាលាដំបូង​ខេ​ត្ត​ស្វាយរៀង ​ចោទ​ប្រកាន់​​និង​បញ្ជូន​ទៅ​ឃុំ​ខ្លួន​នៅពន្ធនាគារខេត្ត​នៅ​ថ្ងៃ​ទី ១​៥ ​ខែ​ធ្នូ ពាក់​ព័ន្ធ​នឹង​ការ​ជួញដូរ​គ្រឿងញៀន ហេរ៉ូ​អីុនដឹក​តាម​ម៉ូតូ​ ជិត ​១០​ គីឡូ​​ក្រាម។

លោក ទេព ផល្លា អ្នកនាំ​ពាក្យ​តុលា​កា​រ​ខេត្ត​ស្វាយ​រៀង ​​បាន​ថ្លែង​នៅ​ថ្ងៃ​ទី​ ១៥​ ខែ​ធ្នូ​ថា ជនទាំង​ ៣ ដែល​ត្រូវ​ឃុំ​ខ្លួន​នោះ​ទី​១ ឈ្មោះ កាវ គ័រវ៉ៃ ភេទ​ប្រុសអាយុ ៥៩ ឆ្នាំ ជន​ជាតិ​ចិន ​ទី២ ឈ្មោះ ង្វៀង យ៉ាន​ហា​យ ​ភេទ​ប្រុស អាយុ ៣៦​ ឆ្នាំ ជន​ជាតិ​វៀត​ណាម ​និងទី៣ ​ឈ្មោះ តាម សុធា​ណា​ ភេ​ទ​​ប្រុស អាយុ ២៨ ឆ្នាំ ជន​ជាតិ​វៀត​ណា​ម​។

បើតាម​លោក​ ផល្លា ព្រះរាជ​អាជ្ញា​បាន​ចោទ​ប្រកាន់ ហើយ​ចៅ​ក្រម​បាន​សម្រេច​ឃុំ​ខ្លួន​ជន​ទាំង ​៣ ពីបទ​ជួញ​ដូរ​គ្រឿង​ញៀន តាម​មាត្រា ៤០ នៃ​ច្បាប់​ស្តីពី​ការ​ត្រួពិនិត្យ​គ្រឿង​ញៀន។

លោក​ថ្លែង​ថា៖ «កា​រ​សម្រេច​ឃុំ​ខ្លួន​បណ្តោះ​អាសន្ន​ហ្នឹង មាន​រយៈ​ពេល​ប៉ុន្មាន មាន​ចែង​នៅ​ក្នុង​ក្រមនីតិ​វិធី​ព្រហ្ម​ទណ្ឌ ខ្ញុំ​មិន​ហ៊ាន​បញ្ជាក់​ពី​​ទោស​របស់​ពួក​គេទេ ដោយ​សារ​នេះ​ជា​នីតិ​វិធី​របស់​តុលាការ​» ។

​តាម​មាត្រា ៤​០ នៃ​ច្បាប់​ស្តីពីការ​ត្រួតពិនិត្យ​គ្រឿង​ញៀន ត្រូវ​ផ្តន្ទា​ទោស​ដាក់​ពន្ធ​នាគារ​ពី​ ២០​ ឆ្នាំ ទៅ​ ៣០ ​ឆ្នាំ ឬ​អស់​មួ​យ​ជីវិត និង​ផ្តន្ទា​ទោស​ពិន័យ​ជា​ប្រាក់ ​៤០​ លានរៀ​ល ទៅ​ ១០០​ លាន​រៀល ក្នុង​ករ​ណី​​ដែល​ប្រព្រឹត្តបទ​ល្មើស​ជួញ​ដូរ​គ្រឿង​ញៀ​ន​ប្រភេទ ម័រហ្វីន ​ហេរ៉ូ​អីុន ឬកូកា​អីុន មាន​បរិមាណ​សុទ្ធ​ចាប់​ពី ​៨០ ​ក្រាម​ឡើង​ទៅ​។

លោក ស្រី វត្ថា មេបញ្ជាការ​រង​កង​រាជ​​អាវុធ​ហត្ថ​ខេត្ត​ស្វាយ​រៀង​បាន​ឲ្យដឹង​ថា ​សមត្ថកិច្ច​អាវុធ​ហត្ថខេត្ត​ស្វាយ​រៀង​ចាប់​បាន​ថ្នាំញៀន​នៅថ្ងៃ​ទី​ ៧ ខែធ្ នូខណៈ​ពេ​ល​ដែលជន​សង្ស័យ​បាន​ឃើញ សមត្ថ​កិច្ច​ហើយ​ផ្តួល​ម៉ូតូរត់​គេចខ្លួន​ ស្ថិត​នៅ​ភូមិ​ប្រសូត្រ​១ ឃុំ​កណ្តៀង​រាយ ស្រុក​ស្វាយ​ទាប។

បើតាម​លោក​ វត្ថា ក្រោយ​ពេល​ចាប់​បាន​គ្រឿង​ញៀនក​ម្លាំង​អាវុធ​ហត្ថ​បា​ន​​ធ្វើការ​ស្រាវជ្រាវ​ចាប់បាន​ ជន​សង្ស័យ​ជា​បន្ត​បន្ទាប់ ដែល​ក្នុង​នោះ​មាន​បីនាក់​ត្រូវ​ចាប់​បាន​កាល​ពីថ្ងៃទី ​៨​ ខែធ្នូ នៅក្នុង​អគារ​អូឡាំ​ព្យា ​ស្ថិត​នៅផ្លូវ​ ២១៧ ​ ភូមិ​លេខ ​៧ សង្កាត់​វាល​វង់ ខណ្ឌ ៧ ​មករា រាជ​ធានី​ភ្នំ​ពេញ បន្ទាប់​មក​ទៀត នៅ​ថ្ងៃទី​ ១១ ខែធ្នូ ទើប​ចាប់​បាន​ម្នាក់​ទៀត​នៅ​ក្រុង​បាវិត។

លោ​កថ្លែង​ថា៖ «ពេល​ប្រតិបត្តិ​ការ​យើង​ត្រូវឃា​ត់ខ្លួ​ន​ទាំង​អស់ឲ្យ​បាន​សិន ទើប​យើង​យក​មក​សួរ​នាំក្រោយ​ពេល​សួរ​នាំ​តាម​នីតិវិ​ធី​ចប់ ទើប​បញ្ជូន​ទៅ​តុលាកា​រ​​។ ក្នុង​ចំណោម​មនុស្ស ​៤​ នាក់​ ត្រូវ​បញ្ជូន​ទៅ​តុលា​ការ ​មាន​ប្រុស ​៣​ នាក់ និ​ង​ស្រីម្នាក់​»​។

លោក​បញ្ជាក់​ថា ​ក្រោយ​មក​ជន​សង្ស័យ​ឈ្មោះ ​ចឹង ធីវី ភេ​ទ​ស្រី អាយុ​ ២៩ ឆ្នាំ ជន​ជាតិ​វៀត​ណាមត្រូវ​តុលា​ការ​ដោះ​​លែង ​ព្រោះ​គ្មាន​ពាក់​ព័ន្ធ​ករណី​គ្រឿង​ញៀន​។

​បើ​តាម​លោកស្រី វត្ថា វត្ថុតាង​ដែល​ដក​ហូត​បាន​មាន​គ្រឿង​ញៀន ប្រភេទ ​ហេរ៉ូអីុន ជិត​ ១០​ គីឡូ​ក្រាម រួ​ម​នឹង​វត្ថុ​តាង​ផ្សេងៗ ទៀត​ដូច​ជា​ជញ្ជីង​សម្រាប់​ថ្លឹង​គ្រឿ​ង​ញៀន​ប្រាក់​ដុល្លារ​ ​​​ប្រាក់​អឺរូ​ ​ប្រាក់​សិង្ហបុរី​ ប្រាក់​ចិន និង​​ប៉ាស្ព័រ​ចំនួន​៤​៕

អត្ថបទគួរចាប់អារម្មណ៍