បាត់ដំបងៈ ជនប្រុស-ស្រី ៣ នាក់ ត្រូវបានកម្លាំងសមត្ថកិច្ចនគរបាលស្រុកថ្មគោលចាប់ខ្លួនពាក់ព័ន្ធករណីប្រើប្រាស់អាវុធ និងជួញដូរគ្រឿងញៀនខុសច្បាប់ និងបានបញ្ជូនទៅស្នងការដ្ឋាននគរបាលខេត្តបាត់ដំបងពីម្សិលមិញ ហើយនឹងត្រូវបញ្ជូនទៅតុលាការថ្ងៃនេះ ក្រោយពីពួកគេបង្ហោះរូបភាពកាំភ្លើងបាញ់សត្វទំនើបជាច្រើនដើមតាមបណ្តាញសង្គមហ្វេសប៊ុក។
លោក ហ៊ាង ប៊ុនថា អធិការរងនគរបាលស្រុកថ្មគោលថ្លែងពីម្សិលមិញថា ក្រុមជនសង្ស័យឈ្មោះ ហឿន ប៉ែល អាយុ ៣៨ ឆ្នាំ យ៉ូន វិឆ័យ អាយុ ១៥ ឆ្នាំ និងស្ត្រីឈ្មោះ គឿន កេត អាយុ ២៥ ឆ្នាំ។ អ្នកទាំង ៣ មានលំនៅភូមិឆ្កែកូន ឃុំគោកឃ្មុំ ស្រុកថ្មគោល ត្រូវបានចាប់ខ្លួនកាលពីរសៀលថ្ងៃទី ២៩ ខែធ្នូ បន្ទាប់ពីពួកគេបានបង្ហោះរូបភាពកាំភ្លើងបាញ់សត្វប្រភេទ PCP Airgun ទំនើបៗជាច្រើនដើមនៅក្នុងហ្វេសប៊ុករបស់ពួកគេក្នុងចេតនាស្វែងរកអតិថិជន ដើម្បីទិញ-លក់កាំភ្លើងទាំងនោះខុសច្បាប់។
លោកថ្លែងថា៖ «កាំភ្លើងបាញ់សត្វប្រភេទ PCP Airgun ១ ដើម និងគ្រាប់កង់ ៤០០ គ្រាប់ រួមទាំងគ្រឿងញៀន Ice Methamphetamine ចំនួន ៣០ កញ្ចប់តូច រួមទាំងសម្ភារបម្រើឱ្យការប្រើប្រាស់គ្រឿងញៀនមួយចំនួនទៀតត្រូវបានរឹបអូសជាវត្ថុតាង»។
បើតាមលោក ប៊ុន ថា ក្នុងអំឡុងពេលនៃការស៊ើបសួរចម្លើយក្នុងជំហានបឋម ជនសង្ស័យទាំង ៣ បានសារភាពថា កាំភ្លើងបាញ់សត្វដ៏ទំនើបនោះ គឺពួកគេបានបញ្ជាទិញតាម Online ក្នុងតម្លៃ ៨៥០ ដុល្លារ ក្នុង ១ ដើមហើយវាត្រូវបានគេបញ្ជូនមកតាមរថយន្តក្រុង។
ចំណែកគ្រឿងញៀន គឺពួកគេបានទិញពីក្រុមកម្មករអូសរទេះនៅតាមច្រកព្រំដែនខ្មែរ-ថៃក្នុងអំឡុងពេលពួកគេចេញដើរបរបាញ់សត្វនៅតាមដងព្រៃជាប់អូរព្រំដែន។ នៅរសៀលថ្ងៃទី ៣០ ធ្នូ ជនសង្ស័យទាំង ៣ និងវត្ថុតាងត្រូវបានមន្ត្រីនគរបាលបញ្ជូនទៅកាន់ស្នងការដ្ឋានខេត្តបាត់ដំបងដើម្បីចាត់វិធានការបន្ត។
ដោយសារសំណុំរឿងរបស់ជនសង្ស័យទាំង ៣ មានជាប់ពាក់ព័ន្ធករណីប្រើប្រាស់ និងជួញដូរគ្រឿងញៀនលោក ស៊ាន គឹមសាន ស្នងការនគរបាលខេត្តបាត់ដំបងបានចាត់ឱ្យលោក កុយ ហៀង ស្នងការរងទទួលបន្ទុកបង្ក្រាបបទល្មើសគ្រឿងញៀន ចាត់មន្ត្រីជំនាញឱ្យស៊ើបសួរចម្លើយពួកគេបន្ថែមដើម្បីស្រាវជ្រាវស្វែងរកអ្នកពាក់ព័ន្ធក្នុងអំពើជួញដូរគ្រឿងញៀនឆ្លងដែន។
ទោះយ៉ាងណានៅចំពោះមុខមន្ត្រីនគរបាលជនសង្ស័យឈ្មោះ ហឿន ប៉ែល បានឆ្លើយសារភាពថា គ្រឿងញៀនទាំងនោះគឺខ្លួនទិញយកមកទុកប្រើប្រាស់ផ្ទាល់ខ្លួនប៉ុណ្ណោះ មិនសម្រាប់ការជួញដូរនោះទេ។ នេះបើតាមលោក កុយ ហៀង។
លោក ហៀង ថ្លែងថា៖ «ក្រោយស្ដាប់ចម្លើយសារភាពរបស់ពួកគេក្រុមមន្ត្រីនគរបាលបានសម្រេចកសាងសំណុំរឿងចោទប្រកាន់ពួកគេចំនួន ២ បទល្មើស គឺបទប្រើប្រាស់ និងរក្សាទុកអាវុធខុសច្បាប់ និងបទប្រើប្រាស់ និងជួញដូរគ្រឿងញៀនខុសច្បាប់»។
បើតាមលោក ហៀង ពួកគេនឹងត្រូវបញ្ជូនទៅតុលាការថ្ងៃនេះ៕