.jpg)
ភ្នំពេញៈ រាជរដ្ឋាភិបាលជប៉ុននឹងផ្ដល់ជំនួយជាឧបករណ៍ សម្ភារ និងបរិក្ខារពេទ្យ ដែលគិតជាទឹកប្រាក់សរុបប្រមាណ ១៨ លានដុល្លារអាមេរិក ដល់ក្រសួងសុខាភិបាលកម្ពុជាសម្រាប់ការប្រយុទ្ធប្រឆាំងការរីករាលដាលនៃជំងឺកូវីដ១៩ និងជំនួយហិរញ្ញប្បទានឥតសំណងជិត ២៣ លានដុល្លារបន្ថែមទៀត សម្រាប់គាំទ្រដល់វិស័យអប់រំ និងសុខាភិបាលនៅកម្ពុជា។ នេះបើយោងតាមសេចក្ដីជូនដំណឹងរបស់ក្រសួងសេដ្ឋកិច្ច និងហិរញ្ញវត្ថុដែលភ្នំពេញប៉ុស្តិ៍ទទួលបានកាលពីម្សិលមិញ។
សេចក្ដីជូនដំណឹងនេះបានដកស្រង់ប្រសាសន៍របស់លោក MIKAMI Masahiro ឯកអគ្គរាជទូតជប៉ុនប្រចាំនៅកម្ពុជាក្នុងជំនួបពិភាក្សាការងារមួយចំនួនជាមួយលោក អូន ព័ន្ធមុនីរ័ត្ន ឧបនាយករដ្ឋមន្ត្រី និងជារដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុកាលពីថ្ងៃទី ២៧ ខែឧសភា ឆ្នាំ ២០២០ ថា រាជរដ្ឋាភិបាលជប៉ុននឹងផ្ដល់ជំនួយជាឧបករណ៍ សម្ភារ និងបរិក្ខារពេទ្យ ដែលគិតជាទឹកប្រាក់សរុបប្រមាណ ១៨ លានដុល្លារដល់ក្រសួងសុខាភិបាលសម្រាប់ការប្រយុទ្ធប្រឆាំងការរីករាលដាលនៃជំងឺកូវីដ១៩។
លោក Masahiro មានប្រសាសន៍ថា៖ «ជំនួយជាឧបករណ៍ សម្ភារ និងបរិក្ខារពេទ្យទាំងនោះនឹងមកដល់ក្នុងប្រទេសកម្ពុជានាពេលឆាប់ៗខាងមុខ»។
លោក Masahiro បន្តថា ការផ្ដល់ជំនួយឧបករណ៍សម្ភារ និងបរិក្ខារពេទ្យដល់ក្រសួងសុខាភិបាលកម្ពុជា សម្រាប់ការប្រយុទ្ធប្រឆាំងការរីករាលដាលនៃជំងឺកូវីដ ១៩ នេះគឺផ្អែកតាមស្មារតីនៃកិច្ចប្រជុំកំពូលអាស៊ានបូក ៣ ស្ដីពីជំងឺកូវីដ ១៩ កាលពីថ្ងៃទី ១៤ ខែ មេសា ឆ្នាំ ២០២០ ដែលរាជរដ្ឋាភិបាលជប៉ុនបានបង្ហាញជំហរជួយដល់បណ្ដាប្រទេសក្នុងតំបន់អាស៊ានក្នុងការប្រយុទ្ធប្រឆាំងការរីករាលដាលនៃជំងឺកូវីដ ១៩ ដែលក្នុងនោះក៏មានកម្ពុជាផងដែរ។ ជាមួយគ្នានេះរាជរដ្ឋាភិបាលជប៉ុននឹងបន្តផ្តល់ជំនួយបច្ចេកទេសហិរញ្ញប្បទានឥតសំណងជាពិសេស ប្រាក់កម្ចីឥណទានសម្បទានផងដែរ សម្រាប់ជួយគាំទ្រដល់រាជរដ្ឋាភិបាលកម្ពុជាក្នុងការប្រយុទ្ធប្រឆាំងនឹងជំងឺកូវីដ ១៩ និងការស្ដារសម្បទាសេដ្ឋកិច្ចកម្ពុជាឡើងវិញ បន្ទាប់ពីរងផលប៉ះពាល់ដោយសារជំងឺកូវីដ១៩ ។
លោក Masahiro បញ្ជាក់ទៀតថា៖ «ក្នុងពេលឆាប់ៗខាងមុខនេះ រាជរដ្ឋាភិបាលជប៉ុនគ្រោងនឹងបន្តផ្ដល់នូវហិរញ្ញប្បទានឥតសំណងសម្រាប់គម្រោងចំនួន ២ ដែលមានទឹកប្រាក់សរុប ២២,៧៣ លានដុល្លារអាមេរិក សម្រាប់គាំទ្រដល់វិស័យអប់រំ និងសុខាភិបាលកម្ពុជា»។
លោក អូន ព័ន្ធមុនីរ័ត្ន បានសម្ដែងការសាទរចំពោះការផ្តល់ជំនួយនេះ ដោយបានថ្លែងអំណរគុណយ៉ាងជ្រាលជ្រៅ ចំពោះទឹកចិត្តរបស់រាជរដ្ឋាភិបាល និងប្រជាពលរដ្ឋជប៉ុនដែលជានិច្ចកាលបានគាំទ្រដល់កិច្ចខិតខំប្រឹងប្រែងរបស់រាជរដ្ឋាភិបាល និងប្រជាពលរដ្ឋកម្ពុជាក្នុងការអភិវឌ្ឍប្រទេសជាតិ និងការរក្សាបាននូវសុខសន្តិភាពក្នុងសង្គម៕
