.jpg)
មន្ត្រីជប៉ុន និងកម្ពុជាក្នុងពិធីចុះហត្ថលេខាផ្តល់ជំនួយកន្លងមក។ រូបថត ទូតជប៉ុន
ភ្នំពេញៈ ជប៉ុនផ្តល់ជំនួយអភិវឌ្ឍន៍ប្រមាណ ៣១០ លានដុល្លារអាមេរិកបន្ថែមទៀតដល់កម្ពុជា សម្រាប់គម្រោងហិរញ្ញប្បទានឥតសំណងចំនួន ៣ គម្រោង និងឥណទាន ២ គម្រោងដោយគម្រោងទាំងនេះត្រូវបានរដ្ឋាភិបាលអះអាងថា នឹងជួយឱ្យសេដ្ឋកិច្ចកម្ពុជាមានការអភិវឌ្ឍបន្ថែមទៀត។
លោកនាយករដ្ឋមន្ត្រី ហ៊ុន សែន នឹងធ្វើជាអធិបតីក្នុងពិធីចុះហត្ថលេខាលើលិខិតប្តូរសារស្តីពីការផ្តល់ជំនួយអភិវឌ្ឍន៍ជប៉ុននៅថ្ងៃទី ២៤ ខែមីនានេះ ខណៈដែលលិខិតប្តូរសារនេះនឹងចុះហត្ថលេខាដោយលោក ប្រាក់ សុខុន រដ្ឋមន្ត្រីការបរទេស និងលោក មិកាមិ ម៉ាសាហ៊ីរ៉ូ (Mikami Masahiro) ឯកអគ្គរាជទូតជប៉ុនប្រចាំកម្ពុជា។
ក្រសួងការបរទេសបញ្ជាក់ក្នុងសេចក្តីប្រកាសព័ត៌មានកាលពីថ្ងៃចន្ទថា ហិរញ្ញប្បទានឥតសំណងគឺសម្រាប់អនុវត្តគម្រោងពង្រីកប្រព័ន្ធផ្គត់ផ្គង់ទឹកស្អាតក្នុងក្រុងតាខ្មៅដែលមានទឹកប្រាក់ប្រមាណ ៣១ លានដុល្លារអាមេរិកគម្រោងសមាហរណកម្មការបោសសម្អាតមីន និងសង្គ្រោះជនពិការដោយសារមីនដែលមានទឹកប្រាក់ប្រមាណ ៩ លានដុល្លារ។
គម្រោងមួយទៀតគឺគម្រោងកម្មវិធីអភិវឌ្ឍសេដ្ឋកិច្ច និងសង្គមដែលមានទឹកប្រាក់ប្រមាណ ២,៧ លានដុល្លារ។ ក្រសួងការបរទេសបញ្ជាក់ថា ចំណែកឯគម្រោងឥណទានសម្បទានវិញគឺសម្រាប់អនុវត្តគម្រោងធ្វើឱ្យប្រសើរឡើងនូវផ្លូវជាតិលេខ ៥ ដំណាក់កាលទី ២ ពីធ្លាម្អមដល់បាត់ដំបង និងពីសិរីសោភ័ណដល់ក្រុងប៉ោយប៉ែតដែលមានទឹកប្រាក់ប្រមាណ ១៦១ លានដុល្លារ និងដំណាក់កាលពី ៣ ចាប់ពីព្រែកក្តាមដល់ធ្លាម្អមដែលមានទឹកប្រាក់ប្រមាណ ១០៦,៥ លានដុល្លារ។
ក្រសួងបញ្ជាក់ថា៖ «ហិរញ្ញប្បទានឥតសំណង និងឥណទានសម្បទានដែលផ្តល់ដោយរដ្ឋាភិបាលជប៉ុននេះនឹងជួយលើកកម្ពស់បន្ថែមទៀតនូវការអភិវឌ្ឍសេដ្ឋកិច្ច និងសង្គមនៃព្រះរាជាណាចក្រកម្ពុជាហើយព្រមទាំងពង្រីកទំនាក់ទំនងមិត្តភាព និងកិច្ចសហប្រតិបត្តិការរវាងប្រជាជាតិទាំង ២ ផងដែរ»។
កាលពីថ្ងៃទី ២០ ខែមីនា ជប៉ុនបានចុះហត្ថលេខាផ្តល់ជំនួយឥតសំណងជាង ៣១០ ០០០ ដុល្លារ សម្រាប់អនុវត្តគម្រោងចំនួន ៤ ក្នុងការសាងសង់បរិក្ខារសុខាភិបាល ការស្តារប្រព័ន្ធធារាសាស្ត្រឡើងវិញ និងការដំឡើងឧបករណ៍ជំនួយដើម្បីផ្តល់ភាពងាយស្រួលដល់ជនមានពិការភាពរាងកាយ។
ស្ថានទូតជប៉ុនបញ្ជាក់ក្នុងសេចក្តីប្រកាសព័ត៌មានកាលពីថ្ងៃទី ២០ ខែមីនា ថា សម្រាប់គម្រោងសាងសង់អគារសម្ភពក្នុងមណ្ឌលសុខភាពកំពង់ល្ពៅ ខេត្តបាត់ដំបងជប៉ុនផ្តល់ជំនួយប្រមាណ ៨៦ ០០០ ដុល្លារ ដែលនឹងធានាឱ្យបាននូវបរិស្ថានសម្រាលកូនមានសុវត្ថិភាព និងសមស្របជាងមុន។ ក្នុងគម្រោងសាងសង់មណ្ឌលសុខភាពល្បាំងមួយក្នុងខេត្តរតនគិរីជប៉ុនផ្តល់ជំនួយប្រមាណ ៩១០០០ ដុល្លារ។
ស្ថានទូតជប៉ុនបញ្ជាក់ថា៖ «ប្រជាជនប្រមាណ ៣ ៥០០ នាក់ ក្នុងតំបន់គ្របដណ្តប់នឹងទទួលបានសេវាវេជ្ជសាស្ត្រដែលល្អប្រសើរជាងមុន ហើយមណ្ឌលសុខភាពនឹងផ្គត់ផ្គង់សេវាវេជ្ជសាស្ត្រដែលមានគុណភាពទៅដល់អ្នកជំងឺរបស់ពួកគេ»។
ស្ថានទូតជប៉ុនប្រកាសទៀតថា ចំពោះគម្រោងស្តារឡើងវិញនូវប្រព័ន្ធធារាសាស្ត្រពញាលាង ខេត្តព្រៃវែង ជប៉ុនផ្តល់ជំនួយចំនួនប្រមាណ ៨៩ ០០០ ដុល្លារ។ ប្រជាជនក្នុងតំបន់ជាង ១ ០០០ នាក់ នឹងទទួលបានប្រយោជន៍ពីគម្រោងនេះតាមរយៈការបង្កើនផលិតកម្មដំណាំស្រូវហើយទំនប់ដែលត្រូវបានស្តារឡើងវិញនឹងរួមចំណែកដល់ការដឹកជញ្ជូនដំណាំកសិកម្មបានដោយងាយស្រួលនៅក្នុងតំបន់គម្រោង។
ស្ថានទូតជប៉ុនបន្តថា សម្រាប់គម្រោងដំឡើងឧបករណ៍នៅសមាគមជំនួយ និងជំនួយសង្គ្រោះរទេះរុញសម្រាប់អភិវឌ្ឍន៍ (សរសអ) ដើម្បីផ្តល់ភាពងាយស្រួលដល់ជនមានពិការភាពរាងកាយនៅកម្ពុជា ជប៉ុនផ្តល់ជំនួយប្រមាណ ៤៨ ០០០ ដុល្លារ។ មនុស្សជាង ៧០០ នាក់ នឹងទទួលបានឧបករណ៍ជំនួយ។
លោក មិកាមិ ម៉ាសាហ៊ីរ៉ូ បានថ្លែងក្នុងពិធីចុះហត្ថលេខានេះថា រហូតមកដល់ពេលនេះស្ថានទូតជប៉ុនប្រចាំកម្ពុជាបានផ្តល់ជំនួយជាង ៦០០ គម្រោងតាមរយៈគម្រោងទ្រង់ទ្រាយតូចសន្តិសុខមនុស្សជាតិ (KUSANONE)។ គម្រោងទាំងនេះបានចូលរួមចំណែកដោយផ្ទាល់ក្នុងការលើកកម្ពស់គុណភាពជីវភាពរបស់ប្រជាពលរដ្ឋនៅថ្នាក់មូលដ្ឋាននៅកម្ពុជា។
លោកថ្លែងថា៖ «ប្រទេសកម្ពុជាបាននិងកំពុងមានការអភិវឌ្ឍយ៉ាងឆាប់រហ័ស។ ទោះជាយ៉ាងណាក៏ដោយខ្ញុំក៏ទទួលស្គាល់ថា នៅតែមានបញ្ហាប្រឈមមួយចំនួនដែលត្រូវដោះស្រាយដើម្បីលើកកម្ពស់គុណភាពជីវភាពរបស់ប្រជាជន។ ប្រទេសជប៉ុននឹងបន្តចូលរួមចំណែកក្នុងការដោះស្រាយបញ្ហាប្រឈមទាំងនោះតាមរយៈក្របខ័ណ្ឌសហប្រតិបត្តិការសេដ្ឋកិច្ច និងអភិវឌ្ឍន៍ផ្សេងៗរួមទាំង KUSANONE»។
កាលពីថ្ងៃទី ១៩ ខែមីនា ជប៉ុនបានផ្តល់ជំនួយឥតសំណងចំនួនប្រមាណ ៤០០ ០០០ ដុល្លារសម្រាប់ការសាងសង់អគារសិក្សាក្នុងខេត្តចំនួន ៣ គឺ រតនគិរី ក្រចេះ និងមណ្ឌលគិរី ព្រមទាំងការសាងសង់ប្រព័ន្ធផ្គត់ផ្គង់ទឹកក្នុងភូមិរាំងខ្វាវ ខេត្តពោធិ៍សាត់៕
