ភ្នំពេញៈ រដ្ឋាភិបាលជប៉ុន កាលពីម្សិលមិញ បានសម្រេចផ្ដល់ថវិកាប្រមាណ ៥២៩ ០៦៨ ដុល្លារអាមេរិកបន្ថែមទៀតដល់អង្គការសន្ដិស្ម័គ្រចិត្ដ (SVA) ក្រោមគម្រោងអង្គការក្រៅរដ្ឋាភិបាលជប៉ុន សម្រាប់ផ្ដល់ជូនគម្រោងសាលាមត្ដេយ្យសិក្សាធនធានគំរូផ្ដោតលើបណ្ណាល័យក្នុងខេត្តបាត់ដំបង។
តាមរយៈសេចក្ដីប្រកាសព័ត៌មានរបស់ស្ថានទូតជប៉ុន ប្រចាំព្រះរាជាណាចក្រកម្ពុជាកាលពីម្សិលមិញបានឲ្យដឹងថា រដ្ឋាភិបាលជប៉ុន បានឯកភាពផ្ដល់ថវិកាដល់អង្គការសន្ដិស្ម័គ្រចិត្ដនេះ ក្រោមគម្រោងជំនួយឥតសំណង។ នៅក្នុងគម្រោងនេះ អង្គការសន្ដិស្ម័គ្រចិត្ដ នឹងធ្វើឲ្យប្រសើរឡើង នូវគុណភាពនៃការអប់រំកុមារតូច តាមរយៈការបង្កើតសាលាមត្ដេយ្យគំរូបំពាក់ដោយបណ្ណាល័យ និងការបង្កើនសមត្ថភាពគ្រូមត្ដេយ្យសិក្សា និងបណ្ណារក្សនៅក្នុងក្រុងបាត់ដំបង។
គម្រោងនេះ កុមារប្រមាណ ៤៥០ នាក់ នៅសាលាមត្ដេយ្យសិក្សាធនធានក្រុងបាត់ដំបង នឹងអាចទទួលបាននូវបរិយាកាសល្អប្រសើរ ហើយកុមារប្រមាណ ១០ ០០០ នាក់ នៅខេត្ដបាត់ដំបងត្រូវបានរំពឹងថា នឹងទទួលបានការអប់រំកាន់តែល្អប្រសើរ។
លោក HORINOUCHI Hidehisa ឯកអគ្គរាជទូតជប៉ុនប្រចាំកម្ពុជា ថ្លែងថា៖ «អង្គការនេះ នឹងបង្កើតសាលាមត្ដេយ្យគំរូ បំពាក់ដោយបណ្ណាល័យលើកកម្ពស់ការអានសៀវភៅ ក្នុងការអប់រំកុមារតូច និងបង្កើនសមត្ថភាពគ្រូបង្រៀន នៅសាលាមត្ដេយ្យ ក្នុងខេត្ដបាត់ដំបង ដើម្បីកែលម្អគុណភាព នៃការអប់រំកុមារតូច និងអភិវឌ្ឍឲ្យកាន់តែប្រសើរឡើង សម្រាប់កុមារតូច»។
លោកបន្ថែម៖ «តាមរយៈគម្រោងនេះ ខ្ញុំសង្ឃឹមថា សកម្មភាពរបស់បណ្ណាល័យ នឹងរីកចម្រើននៅទូទាំងខេត្ដហើយការអប់រំកុមារតូចក្នុងខេត្ដបាត់ដំបងនឹងអភិវឌ្ឍកាន់តែខ្លាំង»។
បើតាមស្ថានទូតជប៉ុន ចាប់តាំងពីឆ្នាំ ២០០២ មក រដ្ឋាភិបាលជប៉ុនបានផ្ដល់ថវិកាជាង ៣៥ លានដុល្លារហើយ ដល់គម្រោងចំនួន ១១៤ គម្រោង ដែលផ្ដោតសំខាន់ទៅលើវិស័យអប់រំ នៅកម្រិតមូលដ្ឋានវិស័យសុខាភិបាល វិស័យកសិកម្ម និងសកម្មភាពបោសសម្អាតមីន។
លោក KASE Takashi នាយកអង្គការសន្ដិស្ម័គ្រចិត្ដប្រចាំកម្ពុជាបានប្ដេជ្ញាថា អង្គការរបស់លោកសម្រេចបាននូវគុណភាពនៃការអប់រំកុមារតូចតាមរយៈការសាងសង់អគារមតេ្តយ្យសិក្សា និងការលើកកម្ពស់សកម្មភាពបណ្ណាល័យ នៅសាលាមត្ដេយ្យសិក្សាធនធានក្រុងបាត់ដំបង។
លោកថា៖ «បច្ចុប្បន្នចំនួនសិស្សមត្ដេយ្យសិក្សាជាមធ្យមក្នុងថ្នាក់រៀននីមួយៗមានច្រើនជាង ៥០ នាក់ ឈានទៅដល់លើស ២ ដងនៃស្តង់ដាដែលក្រសួងអប់រំ បានកំណត់។ ដោយមិនមានជម្រើសគ្រូជួបការលំបាកក្នុងការបង្រៀនសិស្សក្នុងថ្នាក់រៀនចង្អៀត ហើយគ្រូ និងសិស្សលំបាកធ្វើសកម្មភាពក្នុងថ្នាក់»៕