The Phnom Penh Post Search

Search form




Logo of Phnom Penh Post newspaper Phnom Penh Post - ជប៉ុន​ផ្តល់​ថវិកា​ជិត​ $២០ ​ម៉ឺន​ដល់​ខេត្ត​ចំនួន​ ២ ​សម្រាប់​ប្រព័ន្ធ​ទឹកស្អាត​ និង​សាងសង់​អគារសិក្សា




ជប៉ុន​ផ្តល់​ថវិកា​ជិត​ $២០ ​ម៉ឺន​ដល់​ខេត្ត​ចំនួន​ ២ ​សម្រាប់​ប្រព័ន្ធ​ទឹកស្អាត​ និង​សាងសង់​អគារសិក្សា

Content image - Phnom Penh Post
លោក​ មិកាមិ ម៉ាសាហ៊ីរ៉ូ ឯកអគ្គរាជទូត​ជប៉ុន​ប្រចាំ​កម្ពុជា ក្នុង​ពិធី​ចុះហត្ថលេខា​លើ​កិច្ចសន្យា​ផ្តល់​ជំនួយ​កាលពីថ្ងៃ​ទី​ ១៥ មករា។ រូបថត ស្ថានទូត​ជប៉ុន​ប្រចាំ​កម្ពុជា

ជប៉ុន​ផ្តល់​ថវិកា​ជិត​ $២០ ​ម៉ឺន​ដល់​ខេត្ត​ចំនួន​ ២ ​សម្រាប់​ប្រព័ន្ធ​ទឹកស្អាត​ និង​សាងសង់​អគារសិក្សា

ភ្នំពេញៈ ថវិកា​ជិត​ ២០ ​ម៉ឺន​ដុល្លារ​អាមេរិក​ ត្រូវបាន​រដ្ឋាភិបាល​ជប៉ុន​ផ្តល់​ដល់​ខេត្ត​ចំនួន​ ២ ​សម្រាប់​ការដំឡើង​ប្រព័ន្ធ​​ផ្គត់ផ្គង់​ទឹកស្អាត​បំពង់​ខ្នាតតូច និង​សាងសង់​អគារសិក្សា​ក្រោម​គម្រោង​ជំនួយ​ឧបត្ថម្ភ​ឥត​សំណង​សម្រាប់​គម្រោង​ទ្រង់ទ្រាយ​តូច សន្តិសុខ​មនុស្សជាតិ​ (​ជំនួយ​គូសាណូណិ) កាលពី​សប្តាហ៍​មុន​។

ជប៉ុន​ផ្តល់​ថវិកា​ចំនួន​ ១៨៧ ៦៨២ ​ដុល្លារអាមេរិក​ ទៅដល់​គម្រោង​ទាំង​ ២ ដែល​គម្រោង​ទី​១ ​សម្រាប់​កសាង​ប្រព័ន្ធ​ផ្គត់ផ្គង់​ទឹកស្អាត​បំពង់​ខ្នាតតូច​នៅ​កោះ​ពាមរាំង ក្នុង​ខេត្តព្រៃវែង និង​គម្រោង​ទី​២ សម្រាប់​ការសាងសង់​អគារសិក្សា​នៅ​អនុវិទ្យាល័យ​ខ្យង​ក្នុង​ស្រុក​ជ័យសែន ខេត្តព្រះវិហារ​។

លោក​ មិកាមិ ម៉ាសាហ៊ីរ៉ូ ឯកអគ្គរាជទូត​ជប៉ុន​ប្រចាំ​កម្ពុជា​ថ្លែង​ពីថ្ងៃ​ទី​ ១៥ មករា ​ក្នុង​ពិធី​ចុះហត្ថលេខា​លើ​កិច្ចសន្យា​ផ្តល់​ជំនួយ​សម្រាប់​គម្រោង​ទ្រង់ទ្រាយ​តូច​សនិ្តសុខ​មនុស្ស​ជាតិ​ថា​ក្នុង​គម្រោង​ទី​១ ​សម្រាប់​សមាគម​ទឹក​កម្ពុជា រដ្ឋាភិបាល​ជប៉ុន​ផ្តល់​ថវិកា​ចំនួន​ ៩៦ ៧៧៥ ​ដុល្លារ​អាមេរិក ដើម្បី​ធានា​ការទទួល​បាន​ទឹកស្អាត និង​សេវាកម្ម​អនាម័យ​គ្រប់គ្រង​ដោយ​សុវត្ថិភាព តាមរយៈ​ការសាងសង់​ប្រព័ន្ធ​ផ្គត់ផ្គង់​ទឹក និង​ការដំឡើង​បណ្តាញ​ចែកចាយ​ទឹក​នៅ​កោះ​ពាមរាំង ខេត្ត​ព្រៃវែង​។

លោក​ថ្លែងថា​៖ «​យើង​រំពឹងថា ប្រជាជន​ប្រមាណ​ ១ ៣០០ ​នាក់ ​នឹង​អាច​ទទួល​បាន​ទឹកស្អាត​ប្រើប្រាស់ និង​មានតម្លៃ​សមរម្យ តាមរយៈ​គម្រោង​នេះ​។ ខ្ញុំ​សង្ឃឹម​យ៉ាង​មុតមាំ​ថា គម្រោង​នេះ​នឹង​នាំទៅរក​អនាម័យ​ល្អប្រសើរ និង​ការកែលម្អ​ជីវភាព​រស់នៅ​របស់​ពួកគាត់​»​។

ចំពោះ​គម្រោង​ទី​២ ជប៉ុន​បានផ្តល់​ថវិកា​ចំនួន​ ៩០ ៩០៧ ​ដុល្លារ​អាមេរិក​ សម្រាប់​ការសាងសង់​អគារសិក្សា​ ១ ​ខ្នង ៥ ​បន្ទប់សិក្សា និង​ ៤ ​បន្ទប់ទឹក កន្លែង​លាងដៃ​ ១ និង ធុង​ស្តុក​ទឹក​ ១ នៅ​អនុវិទ្យាល័យ​ខ្យង ខេត្តព្រះវិហារ​។ គម្រោង​ទី​ ២ ​នេះ​លោក​មិកាមិ ម៉ាសាហ៊ីរ៉ូ រំពឹងថា​ នឹង​ផ្តល់​អត្ថប្រយោជន៍​ដល់​សិស្ស​ចំនួន​ ២១០ ​នាក់ និង​គ្រូ​ ៩ ​នាក់​ តាមរយៈ​ការលើកកម្ពស់​គុណភាព​អប់រំ និង បរិយាកាស​សិក្សា​រៀនសូត្រ​ក៏​ដូចជា​ចូលរួម​ចំណែក​ដល់​ការធំ​លូតលាស់​ប្រកប​ដោយ​សុខភាព​ល្អ​របស់​សិស្ស​ផងដែរ​។

តាម​សេចក្តីប្រកាស​ព័ត៌មាន​របស់​ស្ថានទូត​ជប៉ុន​កាលពី​ចុង​សប្តាហ៍ ចាប់តាំងពី​ឆ្នាំ​ ១៩៩១ បន្ថែម​លើ​គម្រោង​ឥណទាន​និង ជំនួយ​ឥតសំណង​ខ្នាត​ធំ រដ្ឋាភិបាល​ជប៉ុន​បាននិង​កំពុង​អនុវត្ត​កម្មវិធី KUSANONE នៅ​កម្ពុជា​ដើម្បី​ជួយ​ដល់​អាជ្ញាធរ​មូលដ្ឋាន​ និង​អង្គការ​ក្រៅ​រដ្ឋាភិបាល​ក្នុង​ការអនុវត្ត​គម្រោង​របស់​ពួកគាត់​។ ក្នុង​រយៈពេល​ ៣០ ​ឆ្នាំ​ចុងក្រោយ​នេះ ស្ថានទូត​ជប៉ុន​ប្រចាំ​ប្រទេស​កម្ពុជា​ បាន​ចូលរួមចំណែក​ក្នុង​គម្រោង​ជាង​ ៦០០ តាមរយៈ​ជំនួយ​ឥតសំណង KUSANONE ។

កាលពី​ថ្ងៃទី​ ១៣ មករា ស្ថានទូត​ជប៉ុន​ប្រចាំ​កម្ពុជា​ក៏បានផ្តល់​ថវិកា​ជាង​ ១៨០ ០០០ ​ដុល្លារ​អាមេរិក​ ដល់​អង្គការ​មូលនិធិ​ជប៉ុន PHJ សម្រាប់​ការពង្រឹង​ការថែទាំ​សុខភាព​សហគមន៍​ក្នុង​ខេត្តកំពង់ចាម​។ លោក​ មិកាមិ ម៉ាសាហ៊ីរ៉ូ ថ្លែង​នៅក្នុង​ពិធី​នោះ​ថា សម្រាប់​គម្រោង​ដែល​អនុវត្ត​ដោយ​អង្គការ PHJ នេះ រដ្ឋាភិបាល​ជប៉ុន​ផ្តល់​ថវិកា​ចំនួន​ ១៨២ ០៣៥ ​ដុល្លារ​អាមេរិក​។

កម្មវិធី​ជំនួយ​ឥតសំណង​សម្រាប់​គម្រោង អង្គការ​ក្រៅ​រដ្ឋាភិបាល​ជប៉ុន ចាប់ផ្តើម​នៅ​កម្ពុជា​តាំងពី​ឆ្នាំ​ ២០០២​។ តាំងពី​នោះ ជប៉ុន​ផ្តល់​ថវិកា​ជាង​ ៤១ ​លាន​ដុល្លារ​អាមេរិក ​ដល់​គម្រោង​ ១៣១ ​ដែល​ផ្តោតលើ​វិស័យ​អប់រំ​នៅ​កម្រិត​បឋមសិក្សា វិស័យ​សុខាភិបាល វិស័យ​កសិកម្ម​ និង​បោសសម្អាត​មីន​នៅ​កម្ពុជា​៕

អត្ថបទគួរចាប់អារម្មណ៍